Завхан аймгийн прокурорын газраас  “Хүний амь бие, эрүүл мэндийн эсрэг” гэмт хэрэгт шүүхээс оногдуулсан ял, шийтгэлийн байдлыг 2012 он, 2013 оны эхний 10 сарын байдлаар судалсан байна.

 2012 он, 2013 оны эхний 10 сарын байдлаар тус прокурорын газраас хүний амь бие, эрүүл мэндийн эсрэг нийт 218 хэрэгт хяналт тавин ажилласнаас 4.1 хувь буюу 9 хэргийг яллах  дүгнэлтээр,1.8 хувь буюу 4 хэргийн яллагдагчаар татах тогтоолыг батлан харъяаллын дагуу шүүхэд шилжүүлж, хуульд заасны  дагуу 94.1 хувийг прокурорын шатанд хэрэгсэхгүй болгон шийдвэрлэжээ.

Анхан шатны шүүхэд 2012, 2013 оны эхний 10 сарын байдлаар хүний амь бие, эрүүл мэндийн эсрэг нийт 13 хэргийг шилжүүлснээс 12 хэргийг эцэслэн шийдвэрлэж 8 хүнд 1-15 жилийн хугацаагаар хорих ял, 2 хүнд 1-3 сарын хугацаагаар баривчлах ял, 2 хүнд Эрүүгийн хуулийн Ерөнхий ангийн 71 дүгээр зүйлд зааснаар хохирогчтой эвлэрсэн гэсэн үндэслэлээр эрүүгийн хариуцлагаас чөлөөлсөн, нэг хэргийг нэмэлт мөрдөн байцаалтанд буцаасан байна.

2013 оны эхний 10 сарын байдлаар  прокуророос шүүхэд  онц хүнд 1, хүнд 5, хүндэвтэр 2,  хөнгөн 5 хэрэг  шилжүүлсэн  бөгөөд шилжүүлсэн хэрэг өмнөх оноосоо 55.5 хувиар буурсан дүнтэй байна.

Шүүхээр  шийтгүүлсэн  хүмүүсийг насны ангиллаар нь авч үзвэл 20-30 хүртлэх насны хүн 4, 30-с дээш насны  7 хүн  байгаа бөгөөд эмэгтэй болон насанд хүрээгүй этгээд холбогдсон хэрэг байхгүй,  боловсролын түвшингээр боловсролгүй 3, бүрэн бус дунд 3, бүрэн дунд 4, тусгай дунд боловсролтой 1 хүн шийтгүүлсэн байна.  Дээрх гэмт хэргийг үйлдсэн этгээдүүд нь бүгд эрхэлсэн тодорхой ажилгүй байгаагаас гадна хэргийн  63.6 хувийг согтуугаар  үйлдэгдсэн, өмнө нь  удаа дараа ял шийтгэгдсэн этгээд үйлдсэн хэрэг нь  хэргийн 45.4 хувийг тус тус  эзэлжээ.

Прокуророос  шүүхэд шилжүүлсэн хэргийн   зүйлчлэл  нь  шийтгэх тогтоол, магадлал  зэрэг шүүхийн  шийдвэртэй зүйлчлэл тохирсон байгаа нь  ялын бодлого зохих  түвшинд байна гэж  дүгнэгджээ.

Судалгаанын хүрээнд хүний амь бие, эрүүл мэндийн эсрэг гэмт хэрэг үйлдсэн этгээдүүдэд хуулинд заасан хэмжээний дотор хэргийн ангилалд тохирсон хорих ялыг оногдуулж зарим этгээдэд эрүүгийн хуулинд заасан ял хүндрүүлэн шийдвэрлэх нөхцлүүдийг хэрэглэн оногдуулж байгаа нь шүүгдэгчийн хувийн байдал, үйлдсэн гэмт хэрэгт нь тохирсон байна. Харин улсын яллагчаас гэмт хэргийн нийгмийн аюулын шинж чанар, хэр хэмжээ, гэм буруутай этгээдийн хувийн байдал, гэмт хэрэг үйлдсэн нөхцөл байдалд нь тохируулан  ялын санал тавих асуудал дутагдалтай байна.

Иймд дээрх нөхцөл байдалд дүгнэлт хийх, шүүхээс уг хэргүүдэд оногдуулж буй ял шийтгэлийн бодлогыг судлан санал тавихад цаашид анхааран ажиллах шаардлагатай байна .