Өнөөдөр Олон улсын хүний эрхийн өдөр. Энэ өдрийг тохиолдуулан  МАХН-ын нарийн бичгийн дарга нар Хүний эрхийн үндэсний комисст шаардлага хүргүүлэх болсон талаараа мэдээлэл хийлээ. Тэд жил бүрийн энэ өдрийг ХЭҮК баяр наадам, тэмдэглэлт өдрийн байдалтай өнгөрөөж ирсэн гэтэл эл өдөр тухайн улс оронд хүний эрх хэрхэн хангагдаж байгааг үнэлж дүгнэх ёстой гэв.

Түүнчлэн МАХН-ын бага хурлын гишүүн Ц.Батбаяр “ХЭҮК-ийн дарга, гурван гишүүд нь төрийн өндөрлөгүүдийн адил эрх дарх цалин хөлстэй боловч хуулиар хүлээсэн үүргээ хангалтгүй биелүүлж байгаа нь олон зүйлээс харагддаг. Энэ байгууллага хэдэн албан тушаалтанд зориулсан дүгнэлт гаргаж дүр исгэсэн байдлаар ажилдаа хандаж байна. Уг нь тэд эрх нь зөрчигдөж буй иргэдэд үйлчилж тэдэн рүү хандсан зүйл хийх ёстой. Гэтэл эсрэгээ төрийг иргэдээс хамгаалдаг байгууллага болсон” хэмээн ХЭҮК-ын үйл ажиллагааг шүүмжиллээ. Тэдний шаардлага гурван үндсэн хэсэгтэй. Үүнд:

Нэг. ХЭҮК-ийн тухай хуульд заасны дагуу жил бүр гаргадаг тайлангаа ард түмэнд нээлттэй тайлагнаж, өнөөгийн Монгол Улсад тулгамдаад байгаа хүний эрхийн хамгийн гол зөрчил нь морь унаач хүүхдийн эрх, ижил хүйстнүүдийг ялгаварлан гадуурхах асуудал мөн гэсэн дүгнэлтээ ямар судалгааны үндсэн дээр гаргаснаа нийтэд тайлбарлах, ийнхүү тайлбарлахдаа УБ хотын утааны асуудал, гэмт хэрэг зөрчлийн тоо, хөрсний бохирдол, гол горхи ширгэж байгаа асуудлууд яагаад хүний эрхийн зөрчилд тооцогдохгүй байгаа тухай үндэслэлийг 2014 оны 01 дүгээр сарын 10-ны өдрийн дотор нийтэд танилцуулах,

Хоёр. Монгол Улсад Үндсэн хуулиар баталгаажсан хүний үндсэн эрх, эрх чөлөө хэрхэн хамгаалагдаж байгаа талаар Монгол Улсын Үндсэн хуулийн 2 дугаар бүлгийн 16 дугаар зүйлийн заалт тус бүр дээр дүгнэлт гаргаж, гаргасан дүгнэлтийн дагуу хийх шаардлагатай байгаа ажлуудын жагсаалт, төлөвлөгөөг 2014 оны нэгдүгээр улиралд багтаан эрх бүхий байгууллагаар хэлэлцүүлэх,

Гурав. Монгол Улсын нэгдэн орсон хүний эрхийн олон улсын гэрээний биелэлт болон шинээр батлагдсан хууль тогтоомж, захиргааны шийдвэрүүд хүний эрхийн үндсэн зарчимд нийцэж байгаа эсэх талаар хэдийд ямар зөвлөмж, санал, дүгнэлтүүд гаргасан, тэдгээр нь хэрхэн биелсэн тухай УИХ- д нээлттэйгээр яаралтай тайлагнах зэргийг шаардаж байна.

Хэрэв дээрх шаардлагуудыг ХЭҮК дурдсан хугацаанд биелүүлээгүй болон үл тоох аваас тэд МАХН-ын УИХ дахь “Шударга ёс эвсэл” бүлгээр дамжуулан зохих хууль тогтоомжийн дагуу асуудлыг тавина гэлээ.