Прокурорын ерөнхий газрын хэвлэл мэдээлэл, олон нийттэй харилцах хэлтсийн дарга Т.Сүхбаатараас төрийн албан хаагчдын гэмт хэргийн талаар хэдэн зүйл тодрууллаа.

-Төрийн албан хаагч гэмт хэрэг үйлдэж байгаа асуудал сүүлийн үед хурцаар тавигдаж байгаа ч дорвитой ажил хийгдэхгүй байна. Танай байгууллагын зүгээс энэ хэргээс урьдчилан сэргийлэн зүйл зохион байгуулах боломжтой байдаг уу?
- Прокурорын байгууллага Монгол улсын үндэсний аюулгүй байдлын зөвлөлд төрийн албан хаагчдын үйлдсэн гэмт хэргийн талаар улирал бүр судалгаа гаргаж өгдөг. Харин Үндэсний аюулгүй байдлын зөвлөлөөс манай судалгааны дагуу тодорхой арга хэмжээ явуулдаггүй. Би доторхой ажлыг зохион байгуулаач, судалгааг үндэслэн чухал шийдвэрүүдийг гаргахыг Үндэсний аюулгүй байдлын ажлын албанд удаа дараа шаардлага тавьж байсан. Ер нь сүүлийн үед төрийн албан хаагч гэмт хэрэгтэй үйлдэж байгаа явдал өсөн нэмэгдэж байгаа.

Одоогоор манай Улсын Ерөнхий прокурорт судалгааны төв гэж нэгж байгуулж байгаа.  Яваандаа тус судалгааны төвийг мэргэжсэн хүмүүсээр бүрдүүлж төрийн албан хаагчдын үйлдсэн гэмт хэрэг, зөрчил, үүний улмаас хохирсон иргэдийн талаар судалгаа хийх төлөвлөгөөтэй байгаа. Төрийн албан хаагчийн үйлдэл хууль зөрчих л юм бол иргэдийн эрхийг зөрчдөг талтай.

-Ер нь зарим хөдөлгөөн холбоодууд энэ төрлийн гэмт хэргийн талаар ил захидал гаргаж, үндэсний хөтөлбөр боловсруулъя гэж яриад байгаа. Энэ тал дээр ямар байр суурьтай байна?
-Үндэсний хөтөлбөр байх хэрэгтэй. Үүний цаана монгол төрийн хар хайрцагны бодлого гэж юм байх ёстой. Төрийн албан хаагч нь шударга үнэнч, хуулийнхаа хүрээнд ажилласан цагт тухайн улс орон хөгждөг. Тиймээс бид ийм ажлыг зохион байгуулвал дэмжиж оролцоно.

-Төрийн албан хаагчдыг сургах асуудал үнэхээр хоцрогдсон. Бусад орнуудад төрийн албан хаагчийн маш том академи байна. Тэгэхээр манайх үндэсний хөтөлбөрөө гаргаж, их хуралд батлуулж чадвал энэ дотор олон зүйлийг шингээж өгөх юм. Эхний ээлжинд төрийн албаны сургалт,  шалгалтын талаар тусгаж өгч болно. Мөн энэ хөтөлбрийн дагуу мэдээлэл солилцох чухал.

Тухайлбал, төрийн албан хаагчаас үүдсэн хэргийг хэргийнх нь төрлөөр нь судалгаа хийж болно. Учруулсан хохирлын хэмжээгээр, ямар ял оногдуулж байгаагаар нь судалгаа хийж болох юм. Төрийн аль салбарт гэмт хэрэг зөрчил их байна гэх мэт.

-Ер нь сүүлийн хэдэн жилийн судалгаагаар аль салбарт төрийн албан хаагчийн үйлдсэн гэмт хэрэг зонхилж байна вэ?
-2011 оны байдлаар аймгийн төрийн албан хаагчдын үйлдсэн гэмт хэргийн судалгааг үзэж байхад төрийн албан хаагч хамгийн их гэмт хэрэгт холбогдож байсан газраар Баян-Өлгий аймаг тодорч байсан.

-Төрийн албан хаагчдын үйлдэж байгаа гэмт хэргүүдэд тэдний гаргадаг авир, зан харилцааны хүнд суртал, хэрэг байцаах зэрэг ч орно биз дээ?
-Ер нь дээхин үеэс хойш манай мөрдөн байцаагч, байцаагч нар хүнээс мэдүүлэг авч хийнэ гэж "зовоодог" байсан. Тухайлбал, Өмнөговь аймагт бусдын гарт хүүхдээ алдсан эхийг хохирогчоор тогтоохдоо есөн удаа байцаасан байдаг. Ингэж байцаахдаа "танай хүүхэд нас барсан нь үнэн үү" гэж асуудаг байсан байгаа юм. Энэ бол төрийн албан хаагч, цагдаа, хуулийн байгууллагынханд байж боломжгүй асуудал шүү дээ.