Охидыг бэлгийн хүчирхийллээс урьдчилан сэргийлэхийн төлөө хүний эрх, хүүхэд залуучуудын төлөө ажилладаг байгууллагууд нэгдэж байна.

Монголын Эмэгтэйчүүдийн Сан нь “Охид, эмэгтэйчүүдийг бэлгийн хүчирхийллээс хамгаалъя” сэдэвт 88 өдрийн хөрөнгө босгох аяныг 2004 оноос эхлэн 10 дахь жилдээ зохион байгуулж байгаа аж. Улмаар аяны хүрээнд босгосон хөрөнгийг охид эмэгтэйчүүдийг бэлгийн хүчирхийллээс урьдчилан сэргийлэхэд зориулахаар болжээ. Хөрөнгө босгох аян жил бүрийн Хүний эрхийн өдөр 12-р сарын 10-наас Эмэгтэйчүүдийн эрхийг хамгаалах өдөр 03-р сарын 08-ныг хүртэл 88 өдөр үргэлжилдэг юм.  Энэ удаагийн 88 өдрийн аянд Монголын эмэгтэйчүүдийн сангаас гадна Охид, эмэгтэйчүүд, хүүхэд, залуучуудын чиглэлээр ажилладаг Охид, залуу эмэгтэйчүүдийн эрхийг хамгаалах “Гүнж” төв, “Лантуун дохио” ТББ, Өөрчлөлтийн төлөө залуу эмэгтэйчүүд ТББ, Түгээмэл хөгжил төв, ЛГБТ төв, НҮБ-ын Залуучуудын Зөвлөх хороо Монголын өсвөр үеийнхний үйлчилгээний төв, Казак эмэгтэйчүүдийн Арулар холбоо, Хөөрхөн зүрхнүүдийн аян, Хүчирхийллийн эсрэг Үндэсний төв зэрэг 10 байгууллага нэгдэж, хандив хамтран цуглуулж, бага насны хүүхдийг бэлгийн хүчирхийллээс урьдчилан сэргийлэхэд зориулах гэнэ.

Сүүлийн жилүүдэд бэлгийн хүчирхийлэлд өртөж буй бага насны охидын тоо нэмэгдэж байна. Статистик баримтаар 2012 оны эхний 10 сарын байдлаар насанд хүрээгүй хүүхдийг хүчиндэх гэмт хэрэг 37 бүртгэгдсэн бол 2013 оны байдлаар 54 бүртгэгдсэн нь өмнөх онтой харьцуулахад 45,9 хувиар нэмэгдсэн байна.

Хэлж ярихад хэцүү энэ хэргийн хохирогч хувийн ноцтой шалтгаанаар бусдад бараг хэлдэггүй, гэмт хэрэгтэн ихэвчлэн хохирогчийн ойр дотны хүн байхын дээр эдийн засаг болоод ёс суртахууны хувьд эрх мэдэлтэй этгээдүүд байдаг тул дарагдаад өнгөрдөг юм. Дарагдах хэрээрээ даамжирдаг учир энэ асуудалд олон нийт, эцэг эхчүүдийн анхаарлыг байнга хандуулж, хүүхдийг энэ төрлийн хэргийн хохирогч болохоос урьдчилан сэргийлэх хэрэгтэй байдаг учир байгууллагууд энэ асуудалд олон нийтийн анхаарлыг хандуулах, залуучуудын дуу хоолойг нэмэгдүүлэхийг зорьж байна.