Дорнод аймгийн Прокурорын газраас Хэрлэн сумын Засаг даргын Тамгын газар, Цагдаагийн газар, Шүүхийн шийдвэр гүйцэтгэх алба, Хүүхэд гэр бүлийн хөгжлийн хэлтэстэй хамтран шалгалт, судалгаа, сургалтыг зохион байгуулахаар нэгдсэн 3 төлөвлөгөө, 40 ажлыг хийхээр тусган батлуулсан ба тус төлөвлөгөөний дагуу хүүхэд өсвөр үеийг гэмт хэрэг, зөрчлөөс урьдчилан сэргийлэх зорилгоор Хэрлэн сумын нутаг дэвсгэрт ажиллаж, амьдарч буй хараа хяналт сул, гэмт хэрэг зөрчилд холбогдож болзошгүй хүүхдүүдэд 2014 оны 03 сарын 05-ны өдөр Хэрлэн сумын Засаг даргын Тамгын газрын хурлын зааланд сургалтыг амжилттай зохион байгуулжээ.

Сургалтанд ял эдлүүлэх ажиллагаанд тавих хяналт хариуцсан хяналтын прокурор Э.Идэрбат “Гэмт хэргийн тухай ойлголт”, “Хүүхэд гэмт хэрэг, зөрчилд өртөх, хорт зуршилаас урьдчилан сэргийлэх нь” Цагдаагийн газрын хүүхдийн ахлах байцаагч, цагдаагийн хошууч Д.Жавзандулам “Хүүхдийн эрх үүрэг, анхаарах асуудлууд”, Хүүхэд гэр бүлийн хөгжлийн хэлтсийн мэргэжилтэн Д.Цэрмаа, сэтгэл зүйч Б.Лхагвасүрэн нар “Хүүхэд гэр бүлийг болзошгүй эрсдэлээс урьдчилан сэргийлэх нь” сэдвээр тус тус сургалт зохион байгуулж Хэрлэн сумын Ерөнхий боловсролын 9 сургууль, Политехникийн коллежийн оюутан, сурагчид, нийгмийн ажилтнууд нийт 118 багш сурагчид оролцлоо.

Мөн тус төлөвлөгөөний дагуу 2014 оны 03 сарын 06-ны өдрийн 10 цагт аймгийн Цагдаагийн газрын хурлын зааланд удаа дараа эрүүлжүүлэгдсэн, захиргааны журмаар баривчлагдсан, архидалттай гэр бүл, эцэг эхчүүд нийт 62 хүнд сургалтыг амжилттай зохион байгуулалаа.

Үүнд ял эдлүүлэх ажиллагаанд тавих хяналт хариуцсан хяналтын прокурор Э.Идэрбат, Цагдаагийн газрын хүүхдийн ахлах байцаагч, цагдаагийн хошууч Д.Жавзандулам “Гэр бүлийн ёс зүй анхаарах асуудлууд”, Цагдаагийн газрын ЭББ-ны эмч, цагдаагийн ахлах дэслэгч Г.Мөнхтуяа “Архины хор хөнөөл”, Хүүхэд гэр бүлийн хөгжлийн хэлтсийн мэргэжилтэн Д.Цэрмаа, Б.Мөнхжаргал нар “Эцэг эх, асран хамгаалагч нарын үүрэг хариуцлага” сэдвээр тус тус сургалт зохион байгуулав.

Мөн өдөр 14 цагаас хяналтын прокурор Э.Идэрбат хорих ял нь тэнсэгдсэн, ял хойшлогдсон ялтнууд, түүний эцэг, эх болон нийт захиргааны хяналтанд буй ялтнуудад “Хорих ял нь тэнсэгдсэн болон ял хойшлогдсон Цагдаагийн газрын захиргааны хяналтанд буй ялтнуудын эрх үүрэг, анхаарах зарим асуудал”, Цагдаагийн газрын ОНХАхлах  байцаагч, цагдаагийн хошууч Д.Ариунсанаа “Гэмт хэргээс урьдчилан сэргийлэх ажил, олон нийт цагдаатай хамтран ажиллах ажиллагаа, хууль журмын хэрэгжилт”, Цагдаагийн газрын хүүхдийн ахлах байцаагч, цагдаагийн хошууч Д.Жавзандулам “Хүүхдийн гэмт хэргийн шалтгаан нөхцөл, урьдчилан сэргийлэх нь” зэрэг сэдвээр тус тус сургалтыг зохион байгуулсан ба сургалтанд нийт 65 ялтан хамрагдсан төдийгүй сургалтын төгсгөлд хяналтын прокурор Э.Идэрбат, Цагдаагийн газрын Хэв Журмын Тасгийн дарга, дэд хурандаа Ц.Одчулуун нар дээрх ялтнуудаас гаргасан санал, хүсэлтийг хүлээн авч шийдвэрлэж ажиллалаа.

Эдгээр сургалтуудыг зохион байгуулсанаар Хорих ял нь тэнсэгдсэн болон ял хойшлогдсон Цагдаагийн газрын захиргааны хяналтанд буй ялтнууд эрх, үүргээ бүрэн ухамсарлаж дахин гэмт хэрэгт холбогдохоос өөрийгөө болон гэр бүл, найз нөхдөө хамгаалах, урьдчилан сэргийлэх, үлгэр дуурайл үзүүлэх зөв иргэн болж төлөвших ач холбогдолтой ба насанд хүрээгүй хүүхдүүдийн хувьд гэмт хэрэг, зөрчилд өртөх, хорт зуршил, болзошгүй эрсдэлээс урьдчилан сэргийлэх ойлголт, мэдээлэл авч бусдад буюу анги хамт олон, сургууль, үе тэнгийнхэндээ гэмт хэргээс урьдчилан сэргийлэх, өөрийгөө хамгаалах ойлголтуудыг өгөх, нөлөөллийн ажлыг зохион байгуулах ач холбогдолтой боллоо.

Мөн дээрх хараа хяналт сул хүүхдүүдийн судалгааг гарган Хүүхэд гэр бүл хөгжлийн хэлтэс, багийн засаг дарга нар, хүүхдийн байцаагч, хэсгийн төлөөлөгч нарт тус тус хүргүүлж хяналт тавьж ажиллахыг үүрэг болгосон ба сургалтын үеэр тус аймгийн “ДОРНОД”, “МИЖИ” зэрэг телевиз болон хэвлэл мэдээлэлийн байгууллагад Улсын Ерөнхий прокурорын газрын 2014 онд баримталж буй бодлого, зорилго зорилт, шинэчлэлт, өөрчлөлт, шинээр батлагдан гарсан хууль тогтоомж, орон нутгийн эрүүгийн нөхцөл байдлын талаар ярилцлага, мэдээлэл өгч ажиллалаа.