2001 онд батлагдсан Галт зэвсгийн тухай хуульд нэмэлт өөрчлөлт оруулахаар санал аваад эхэлсэн билээ. Үүнтэй холбогдуулан Монголын мэргэжлийн анчдын холбооны тэргүүн Б.Хурцгэрэл өнөөдөр хэвлэлийнхэнд мэдээлэл хийлээ.

Тэрээр "Энэ хууль батлагдахдаа хүн бүрийг байлдааны буу эзэмших эрхтэй болгосон. Оросоос байлдааны бууг ангийн болгоод, нэрийг нь өөрчлөөд оруулаад ирсэн. Байлдааны сумаар бууддаг болсон. Тиймээс энэ хуулинд өөрчлөлт оруулж өгөөч гэж төрийн өндөрлөгүүдэд хандаж байсан. Хэлэлцэнэ гэж явсаар өдий хүрлээ. Гэтэл одоо гэнэт санаж, энэ хуульд нэмэлт өөрчлөлт оруулах гэж байна. Нийгэмд хор хөнөөл учруулах нь ээ гэдгийг хаа хаанаа ойлгож эхэлжээ гэж их баярлаж байна. Мөнхбаяр нөхдийн хамт урт нэртэй хуулийг эсэргүүцлээ шүү дээ. Телевиз бүрээр байлдааны буу ашигласан гээд зарлачихсан. Тэгэхээр одоо хуулинд оруулах нэмэлт өөрчлөлтдөө байлдааны бууг хасах хэрэгтэй гэж тусгах хэрэгтэй байна" гэв.

Мөн тэрээр ан гөрөө хийх уламжлал эвдэгдэж байгаа талаар "Өвөг дээдсээс анчин хүний тухай сургааль, ёс заншил өвөлж ирсэн өвгөд бид тэрнийгээ залуу үеийнхэндээ, байлдааны буу эзэмшиж байгаа хүмүүст өвлүүлж чадаагүй. Бидний буруу. Ард иргэдээсээ, төр засгаасаа ахмад үеийнхэн бид уучлал гуйж байна. Хуулинд буруу заалт оруулсан төр засгийнхны буруу бас бий. Одоо бие бие рүүгээ бурууг чихэхгүй, гол нь зөв замаар явах хэрэгтэй. Социализмын үед Сайд нарын зөвлөлийн тогтоолоор яг энэ бүс нутагт л ан хийнэ, тэдэн толгой ан бэлдэнэ шүү гээд зааж өгдөг байсан. Олоо бол тийм зүйл байхгүй. Газар нутаг зааж өгдөг үе өнгөрч, хэн дуртай нь чөлөөтэй буугаа үүрдэг, ан руугаа дайрдаг болчихсон. Дарга нар ч юм уу, хэн нь ч юм, бүү мэд. Нэг аймагт очдог. Тэднийхээ хийморийг сэргээх гэж чоно авлахаар явдаг. Дургүй байхад нь хүртэл агнаад нөгөө даргадаа бэлэглэдэг зусарч зан мнголчуудад байна. Энэ нь залуучуудад хэн дуртай нь талд чоно хөөж агнаж болдог гэсэн ойлголт төрүүлээд байгаа юм" хэмээн байр сууриа илэрхийллээ.