Монголын циркийн өнөөгийн нөхцөл байдлын талаар циркийн уран бүтээлчид мэдээлэл хийлээ. Тодруулбал, “Монголын циркчдийн холбоо”-ны тэргүүн Л.Чулуунбаатар, “Шинэ цирк” төвийн захирал, найруулагч Д.Зоригт, ХБК-ийн циркийн тэнхмийн эрхлэгч Ю.Гэрэлбаатар болон "Монгол циркийн Ахмад зүтгэлтнүүдийн холбоо","Монголын циркийн холбоо", “Монголын үндэсний цирк", “Circus mongolia Khadgaa" зэрэг циркийн уран бүтээлчид хэвлэлийн хуралд оролцов.

Тэд Монголын циркчдийн нэгдсэн чуулганыг 2014 оны эхний хагас жилд багтаан зохион байгуулах ёстой гэдгийг онцоллоо. Мөн энэ үеэр Монголын үндэсний цирк буюу "АСА" циркийн хувьчлалын асуудлыг хөндсөн юм.

 2007 оны нэгдүгээр сард цирк хувьчлагдаж, “АСА” цирк нэртэй болсон. Ингэж циркийг менежментийн хувьчлалд оруулснаар 73 жилийн түүхтэй Монголын цирк болон уран бүтээлчдийг бутрахад хүргэсэн хэмээн өнөөдөр мэдээлэл хийсэн циркчид хэлэв. Тухайлбал, цирк анх хувьчлагдаж байх үед циркид найруулагч, туслах найруулагч, зураач, туслах зураач, оёдолчин, цахилгаанчин, мужаан, бүжиг дэглээч, дархан гээд бүхий л мэргэжлийн улс ажилладаг байсан. Гэтэл одоо циркийн жүжигчид бэлтгэл сургуулилт хийх өрөө ч үгүй болсон гэлээ. Цаашлаад цалингаа ч авч чадалгүй явж байна гэв. Циркид одоогоор 138 жүжигчин байгаа боловч хоёр ажилтнаас бусад нь цалин авдаггүй гэдгийг "Шинэ цирк" төвийн захирал Д.Зоригт хэллээ. Тэрээр цаашид  шинэчлэл хийж, цалинг  шаталсан хэлбэрээр олгохоор төлөвлөөд байгаа аж. Мөн 50 гаруй уран бүтээлч цалин авдаг, 80 уран бүтээлч гэрээгээр ажилладаг, 50 толгой мал, ан амьтантай, хоёр ээлжээр ажилладаг байсан аж. Гэтэл мөн адил одоо ганц ч сургуультай амьтангүй болсон байна. Тодруулбал найман ширхэг залуу адуу, гурван баавгай, нохой гээд залуу ан амьтан олон байжээ.

Нөхцөл байдал ийм болсон тул жүжигчид тарж тус, тусын зам мөрөө хөөн хувийн цирк байгуулан “АСА” циркд хамааралгүйгээр дэлхийн өнцөг булан бүрт Монголын нэрийг гаргасаар л яваа гэж тэд ярив. Түүнчлэн “АСА” циркэд 2007 оноос хойш уран бүтээлийн тоглолт тавигдаагүй бөгөөд түрээсийн тоглолт буюу гадны уран бүтээлчдийн тоглолт болсон аж.

Харин “Монголын циркчдийн холбоо”-ны тэргүүн Л.Чулуунбаатар "Монголын хүн ам 1.7 сая байхад Монголын үндэсний цирк жилд 1400 тоглолт хийж, 890500 хүн үздэг байлаа. Өнөөдөр манай улсын хүн ам гурван саяд хүрч байна. Гэтэл жилдээ 41 тоглолт хийж, 135 мянган хүн үзсэн гэсэн байх юм. Эндээс та бүхэн нэгийг бодох байх. Түүнчлэн бид циркийн урлаг хөгжсөн 156 орноос тавд жагсдаг байлаа. 1981 онд л гэхэд дэлхийн хэмжээний том наадмаас манай нугараачид “Мөнгөн арслан” авч байсан. Өнөөдөр Монгол Улсын циркийн урлагийн нэрийг бэлтгэл сургуулилалт хийх байр савгүй хэдэн студи, продакшн бор зүрхээрээ авч явж байна шүү дээ. Гэтэл циркийн урлагийн бэлтгэл сургуулилалт асар их орон зай шаарддаг юм" гэв.

Монголын үндэсний циркийг менежментээр хувьчлахдаа гурван зүйлийг үндэслэсэн байдаг аж.

  Тодруулбал,
    Үйл ажиллагааг нь урд урдынхаас сайжруулна.
    Циркийн жүжигчдийн цалинг хоёр дахин нэмнэ.
    Нийт орлогын 30 хувийг эргээд уран бүтээлдээ зарцуулна гэж заажээ.