Олон нийтээрээ тэмдэглэдэг ямарваа нэг баяр ёслолын үеэр эрүүгийн хэв журам хүндрэх байдалтай болоод байдаг гэдгийг Цагдаагийн байгууллагаас хэлж байна. Тэгвэл хэдхэн хоногийн өмнө Олон улсын эмэгтэйчүүдийн баяр болсон. Энэ үеэр гэмт хэргийн гаралт хэр байсан талаар ЦЕГ-ын хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэнгээс тодрууллаа.

-Өнгөрсөн шинэ жилээр гэмт хэргийн гаралт бага байсан гэж байсан. Харин эмэгтэйчүүдийн баяраар гэмт хэргийн үзүүлэлт хэр байсан бол?

 -Бид нар 2013 оны шинэ жилийг архигүй тэмдэглэе гэдэг уриалгыг гаргаснаараа архи согтууруулах ундаанаас үүдэн гардаг гэмт хэрэг өмнөх оны мөн үетэй харьцуулахад 30-40 хувиар буурсан. Иргэд, байгууллагууд, хувь хүмүүс энэ уриалгыг дэмжиж ямарваа баярыг тэмдэглэхэд архи согтууруулах ундаа хэрэглэх нь багассан. Мөн сар шинийн баярын өдрүүдэд гэмт хэргийн гаралт бага байсан. Тэр дундаа архи согтууруулах ундаа хэрэглэчихээд тээврийн хэрэгсэл жолоодсон зөрчил энгийн өдрүүдийг бодвол 50 орчим хувиар буурсан үзүүлэлттэй байсан. Гэтэл 3 сарын 8-ны өдөр гэмт хэргийн гаралт эрс нэмэгдэж 108 гэмт хэргийн шинжтэй үйлдэл бүртгэгдсэн.

-Зөвхөн эмэгтэйчүүдийн баярын өдөр л гэмт хэргийн шинжтэй үйлдэл 108 бүртгэгдсэн юм уу?

-Тийм. Харин өнгөрөгч амралтын өдөр буюу Олон улсын эмэгтэйчүүдийн эрхийг хамгаалах энэ өдөр нийтдээ цагдаагийн байгууллагад 268 гэмт хэрэг бүртгэгдсэн. Өөрөөр хэлбэл баасан гарагаас ням гараг хүртэл 268 хэрэг бүртгэгдсэн байгаа юм.  Үүнээс 160 гаруй гэмт хэргийг цагдаагийн байгууллага цаг тухай бүрт нь илрүүлэн хэрэг бүртгэлт мөрдөн байцаалтын ажиллагааг хийсэн. 120  гэмт хэрэг бол цагдаагийн байгууллагад дуудлага мэдээлэл хожимдож өгсөнөөс үүдэлтэй шалгагдаж байгаа.

-Тухайн өдөр баярын өдөр байсан учир архи согтууруулах ундаанаас үүдэлтэй хэрэг цөөнгүй гарсан биз?

-Архи согтууруулах ундаанаас үүдэн танхайрах, бусдын биед гэмтэл учруулах, мөн дээр нь хулгайлах хэргүүд ихээр үйлдэгдсэн. Тиймээс иргэддээ нэг зүйлийг анхааруулж хэлэхэд, ямарваа нэгэн баяр ёслолыг архи согтууруулах ундаагүй тэмдэглэж занших хэрэгтэй. Статистик судалгаанаас харахад нийт үйлдэгдэн гарч байгаа гэмт хэргийн 35-40 орчим хувь нь архи согтууруулах ундаанаас үүдэлтэй байсан.

Тиймээс архи гэдэг маань гэмт хэргийн суурь болоод байгаа учраас иргэд тохируулж хэрэглэхийг цагдаагийн байгууллагаас уриалж байна.

-Удахгүй Цэргийн баяр болно. Энэ үеэр ч гэсэн залуусаа архи согтууруулах ундааг хэрэглэхгүй байх уриалгыг дэвшүүлж байгаа биз дээ?

-Зэвсэгт хүчний ойн өдөр удахгүй болно. Тэгэхээр энэ үеэр залуучууд маань архи согтууруулах ундаагүйгээр энэ баярыг тэмдэглэж заншихыг уриалж байна. Мөн иргэд баяраа тэмдэглэж байхдаа гэр орноо удаан хугацаагаар эзэнгүй орхих магадлалтай байдаг. Энэ үеэр нь гэмт этгээдүүд тухайн боломжийг ашиглаад айл гэрт хууль бусаар нэвтрэн орж бусдын эд хөрөнгийг хулгайлдаг. Тиймээс иргэд гэр орноо удаан хугацаагаар хаяж явж байгаа бол хажуу хөршдөө мэдэгдэх, шаардлагатай бол харьяа дүүргийн цагдаагийн байгууллага алба хаагчид тэмдэглүүлэх шаардлагатай. Нөгөөтэйгүүр ямарваа нэг гэмт хэргийн шинжтэй үйлдэл харсан иргэн цагдаагийн байгууллагад мэдээлэхгүй байх хандлага их байдаг. Өөрөөр хэлбэл, иргэд миний найз, гэр бүлийг зодож байгаа биш, энэ надад ямар хамаатай юм гээд дуугай өнгөрдөг. Гэтэл өнөөдөр танай хажуу талын айлыг ухаж байгаа нэгэн маргааш нь таны гэрийг ухах магадлал 90 хувь шүү гэдгийг анхааруулмаар байна. Тиймээс энэ гэмт хэрэг үйлдээд байгаа этгээдүүдийг цагдаагийн байгууллагатай хамтран ажиллаж гишгэх газар олгохгүй байх шаардлагатай байна. Ямарваа нэгэн зөрчлийг харсан даруйдаа цагдаагийн байгууллагын 102 дугаарын утсанд мэдэгдээд тухайн үйлдлийг таслан зогсоох юм бол дараа дараагийн гэмт хэрэг үйлдэх гэж байгаа этгээдүүд энэ үйлдлийг хийхээ болих юм. Тиймээс иргэд нийгмийн идэвхи сайтай байж цагдаагийн байгууллагад мэдээллийг өгдөг байх хэрэгтэй.

 Ерөнхийдөө урд оны үетэй харьцуулахад иргэд цагдаагийн байгууллагад итгэл үзүүлж гэмт хэргийн талаарх мэдээллийг өгдөг болсон. Улмаар цагдаа нар гэмт хэргийг үйлдэл дээр нь таслан зогсоодог болсон.