2012 оноос нэгдүгээр эгнээ буюу зөвшөөрөлгүй газар тавьсан тээврийн хэрэгслийг ачиж журамлахаар тогтсон.  Энэ нь мэдээж замын хөдөлгөөний нягтралыг бууруулах, жолооч нарын хөдөлгөөний соёлыг дээшлүүлэх зорилгоор хэрэгжүүлсэн ажил. Гэвч энэ ажлыг сайшаах нэгэн байгаа ч шүүмжлэх хүмүүс ч цөөнгүй байна.  Өөрөөр хэлбэл, машинаа журамлуулсан жолооч нар их л бухимдалтай байгаа юм. Учир нь нийслэлд машин тавих зогсоол зааг завсар тун цөөхөн шүү дээ.

Мөн торгуулийн мөнгө гэж жолооч нараас овоо хэдэн цаас чангааж байгаа нь зарим асуудлыг үүсгээд орхив. Өөрөөр хэлбэл, жолооч нар 70-80 мянган төгрөгний торгууль төлдөг байна.
Тэгвэл энэ мөнгө яг хаашаа орж байна гэдэг асуулт гарч байгаа юм. Улмаар зүгээр нэг аж ахуй нэгж компаниуд өөрсдийн ашиг олох хэрэгслээ болгосон юм биз гэх асуулт ч урган гарч ирж байна.
Энэ оны нэгдүгээр сарын 1-ны өдрөөс хойш Замын хөдөлгөөний удирдлагын төвийн 11 машин дангаараа 2379 машиныг нэгдүгээр эгнээнээс ачиж журамласан байгаа юм. Ачуулсан машины тоог торгуулийн доод хэмжээ болох 70 мянган төгрөгөөр үржүүлэхэд 166 сая 530 мянган төгрөг болж байгаа аж.

Тэгвэл ийм хэмжээний мөнгийг олж байгаа тэдгээр компаниуд машин ачих ажлыг хувийн бизнесээ болгочих вий гэсэн хардлага нийгэмд бий болж байгаа юм.
Түүнчлэн нийслэлд нэгдүгээр эгнээнд машинаа тавихаас өөр аргагүй нөхцөл байдал олон газар л үүсдэг. Гэхдээ одоо бүр машин ачих нь бизнес болчихоод байгааг  зарим иргэд хэлж байна.

Хэн хэзээ нэгдүгээр эгнээнд машинаа тавихыг нь отож байгаад л очоод аччихдаг болж. Тэгэхээр энэ журам жолооч нарт хэтэрхий хатуу тусаад  ч байгаа юм шиг. Уг нь хууль нэг талд биш бүх хүнд тэгш үйлчлэх ёстой шүү дээ.