Хогны ногоон уутыг үйлдвэрлэхэд жилд нийслэлийн төсвөөс 3 тэрбум төгрөгийг зарцуулдаг. Тэгвэл энэ жил дээрх мөнгийг нэмж 4.5 тэрбум төгрөг болгохоор төлөвлөж байгаа. Үүнийг жиргээч залуус эсэргүүцэж “Үнэгүй тарааж буй хогны уутны мөнгөөр хүүхдийн эмнэлэг баръя” гэсэн санаачилга гаргасан билээ. Жиргээч залуусын хэлж буйгаар нэг айл өрх сард хогны уутанд зориулж 2600-3000 төгрөг өгдөг. Үүнээс 90 төгрөгийг хуримтлуулж хүүхдийн эмнэлэг барих бүрэн боломжтой гэж байгаа юм. Тус санаачилга  ч өнгөрсөн өдрүүдэд хүрээгээ тэлж олон хүний дэмжлэгийг аваад байгаа юм. 

Харин энэ талаар хотын дарга Э.Бат-Үүл “Хогны уутыг цаашид үргэлжлүүлэн үйлдвэрлэнэ. Хог ил задгай хаягдаад байгаагийн гол учир нь уут байхгүйгээс болсон. Тэгэхээр хогийг цэгцлэхийн тулд хогны уутыг үйлдвэрлэх ёстой. Дэлхийн бусад орнуудад ч ийм байдаг. Өмнөх жил хоёр л үйлдвэр хогны уут үйлдвэрлэдэг байсан бол энэ жил 4-5 компани тендерт оролцож байна. Мөн ногоон уут маань өөрөө хог болж байна гэх шүүмжлэл байсан. Тэгвэл энэ жилээс хогны уутыг дахин боловсруулж бүтээгдэхүүн болгож байна. Ийм төрлийн үйлчилгээ явуулдаг олон үйлдвэр манайд байна. Хогны уутаар хашаа хайс хийх, траншейны таг, сандал үйлдвэрлэж буй туршлага бидэнд байна” гэлээ. Ямартай ч түүний хэлж буйгаар хогны уутны мөнгөөр эмнэлэг барих санаачилгыг дэмжихгүй аж.

Өнгөрсөн жил нийт  317 мянга 131 өрхөд 33,3 сая ширхэг хогны уут үйлдвэрлэхэд 3,1 тэрбум төгрөг зарцуулжээ.  Харин энэ жил 335 мянган өрхөд буюу илүү олон айлд тараахаар төлөвлөгдсөн тул 4.5 тэрбум төгрөгөөр хогны уут үйлдвэрлэж тараахаар болжээ. Харин уутны хувьд төрөл нь олон болж дөрөв болсон байна. Мөн 80х40 хэмжээтэй байсан уутыг 65х40 хэмжээтэй болгох аж. Хогны уут эзэндээ хүрч чадахгүй байна гэх шүүмжлэл байдаг. Тэгвэл хотын удирдлагууд хогны уут эзэндээ хүрч байгаа. Азийн сантай хамтраад өнгөрсөн хоёрдугаар сард судалгаа хийхээд нийслэлийн нийт өрх айлын 90.8 хувь нь хогны уутаа авсан гэсэн хариуг өгсөн гэлээ.