Манай улсын иргэд ямарваа нэг баяр ёслол, тэмдэглэлт арга хэмжээний өдрүүдэд архи согтууруулах ундааг хэтрүүлэн хэрэглэх тохиолдол гардаг. Тэгвэл өнөөдөр Зэвсэгт хүчний 93 жилийн ой тохиож байна. Тиймээс ЦЕГ-ын хэвлэл мэдээллийн төвийн байцаагч, цагдаагийн ахмад Ё.Лхагвасүрэнгээс тодруулахад "Өнөөдөр Зэвсэгт хүчний ойн баярын өдөр. Тэгэхээр цагдаагийн байгууллагаас энэ өдөр эргүүл, хяналт шалгалтыг эрчимжүүлж ажиллаж байгаа. Ерөнхийдөө анги, хамт олон найз нөхдийнхөө хүрээнд энэхүү баярыг тэмдэглэх гэж байгаа бол архи согтууруулах ундааг зүй зохистой хэрэглэх болж өгвөл хэрэглэхгүй байхыг цагдаагийн байгууллагаас анхааруулж байна. Өмнөх 2013 оны шинэ жилээр цагдаагийн байгууллагаас архигүй баяр тэмдэглэе гэж уриалсан. Энэ уриалгын ачаар өмнөх онтой харьцуулахад шинэ жилийн баяраар үйлдэгддэг архи согтууруулах ундаатай холбоотой хэргийн гаралт 30-40 хувиар буурсан. Сар шинийн баяраар архи согтууруулах ундаатай холбоотой хэрэг гараагүй. Мөн согтуугаар тээврийн хэрэгсэл жолоодсон зөрчил харьцангуй багассан байсан. Харин Олон улсын эмэгтэйчүүдийн эрхийг хамгаалах өдрөөр гэмт хэргийн гаралт, хэв журмын нөхцөл байдал хүндрэх байдалтай байсан. Цагдаагийн байгууллага 3 хоногийн хугацаанд 288 гэмт хэргийн шинжтэй үйлдэл бүртгэн авч шалгасан байгаа. Үүнээс 160 гэмт хэргийг илрүүлэн, мөрдөн байцаалтыг явуулсан.  Өчигдрийн байдлаар 56 гэмт хэргийн шинжтэй үйлдэл бүртгэгдсэн. Тэр дундаас танхайрах төрлийн гэмт хэрэг 20 байсныг шалгаж байгаа. Өнөөдрийн хувьд Зэвсэгт хүчний ойн баярын өдөр. Энэ өдөр залуучууд архи согтууруулах ундаа хэрэглэхгүй байхыг анхааруулж байна. Ялангуай архины төрлийн зүйл хэрэглэсэн үедээ тээврийн хэрэгсэл жолоодохгүй байх чухал юм. Өнөөдөр өндөржүүлсэн бэлэн байдалд тухайн хэлтэс тасгийн албан хаагчид, өөрийн бололцоон дээр тулгуурлаад эргүүлийг эрчимжүүлж ажиллаж байна" гэв.