Баянхонгор аймгийн прокурорын газраас санаачлан өчигдөр “Албадан ажил хийлгэх ялын чанар, үр нөлөөг дээшлүүлэхэд анхаарах асуудлууд”  сэдэвт нэгдсэн зөвлөгөөнийг зохион байгуулсан байна.

Зөвлөгөөнийг аймгийн Прокурорын газраас 2013 оны 4 дүгээр улиралд хийсэн албадан ажил хийлгэх ял шийтгэгдсэн ялтнуудын ял эдлэлтийн байдлыг шалгасан дүн, шалгалтаар илэрсэн зөрчил дутагдалд дүгнэлт хийж, уг ялыг нэг мөр бодитой хэрэгжүүлэхэд төр, захиргааны байгууллагуудын идэвхи оролцоо, хамтын ажиллагаа, шийдвэр гүйцэтгэгчээс ялтанд тавих хяналтыг сайжруулах зорилгоор зохион байгуулжээ.

Зөвлөгөөнд Сум дундын 3 дугаар шүүхийн шүүгч нар, аймгийн Засаг даргын тамгын газрын Хууль зүйн хэлтэс, Хөдөлмөрийн хэлтэс, Шүүхийн шийдвэр гүйцэтгэх алба, Баянхонгор сумын Засаг дарга, Тамгын газрын дарга, Хот тохижилт, үйлчилгээ, орон нутгийн өмчит үйлдвэрийн газрын удирдлагууд оролцсон байна.

Зөвлөгөөнөөр аймгийн Прокурорын газрын ял эдлүүлэх ажиллагаанд тавих хяналт хариуцсан хяналтын прокурор, хууль цаазын зөвлөх П.Мөнхтуяа “Албадан ажил хийлгэх ялын чанар, үр нөлөөг дээшлүүлэх нь” сэдвээр, Шүүхийн шийдвэр гүйцэтгэх албаны ахлах шийдвэр гүйцэтгэгч, дэслэгч Б.Бурмаа “Албадан ажил хийлгэх ял оногдуулсан шүүхийн шийтгэх тогтоолыг хэрэгжүүлэх нь” сэдвээр тус тус илтгэл хэлэлцүүлж, тус зөвлөгөөнд оролцсон төр, захиргааны байгууллагын албан тушаалтан, алба хаагчдад Хууль зүйн сайдын 2013 оны А/131 дугаартай тушаалаар батлагдсан “Албадан ажил хийлгэх ял оногдуулсан шүүхийн шийтгэх тогтоолыг гүйцэтгэхэд хяналт тавих журам”-ын талаар танилцуулжээ.

Зөвлөгөөн хийгдсэнээр уг ялыг хэрэгжүүлэхэд сумын Засаг даргын үүрэг оролцоо, ажлын байрыг тогтоож, нийтэд мэдээлэх ажлыг хэрхэн зохион байгуулах, Шүүхийн шийдвэр гүйцэтгэх алба, сумын Засаг дарга нарын ажлын уялдаа холбоог сайжруулж, ялтны ажлын цагийг бодитойгоор тооцож, шүүхээс оногдуулсан ялыг бүрэн тооцож эдлүүлэх, хяналтын ажлын чанар, үр нөлөөг дээшлүүлэх талаар харилцан санал солилцож, тодорхой ойлголтонд хүрсэн үр дүнтэй ажил болж оролцогч байгууллага тус бүрийн хийх ажил, үүрэг оролцоо хариуцлагыг тусгасан зөвлөмжийг аймгийн Прокурорын газраас гаргахаар  шийдвэрлэсэн байна.