Монголдоо хиймэл дагуул бүтээх зорилготой "Сансар дахь Бидний Мөрөөдөл"
төсөл өнөөдөр нээлтээ хийлээ. Тэд төслийн хүрээнд ЕБС-ийн сурагчид болон их дээд сургууль коллежийн оюутан залуусын дунд хиймэл дагуул бүтээх уралдаан зарлаж байгаа юм.
Ингэхдээ Cubesat хэмээх стандартын дагуу хиймэл дагуулаа бүтээх бөгөөд энэ нь 10х10 см хэмжээтэй байх гэнэ. Үүнийг төслийг санаачлагч Ц.Наранбаатар тайлбарлахдаа "Та бүхэн хиймэл дагуулыг компьютертэй харьцуулж бодож болно. Компьютер анх зохион бүтээгдэхдээ маш том байсан. Харин хөгжлийнхөө явцад жижгэрээд өгсөн. Үүн шиг хиймэл дагуулын хэмжээ ч мөн жижгэрч байгаа. Мөн энэ хиймэл дагуулын хэрэглээ нь юу байх вэ гэдэг асуулт гарч ирнэ. Бид хиймэл дагуулынхаа хэрэглээг яг энэ уралдаанд оролцох хүүхдүүдээрээ бодож гаргуулах юм. Хүүхдүүд маань эхлээд зохиомжоо гаргана. Гол нь яаж сэтгэж чадах вэ гэдгээс хамаараад хиймэл дагуулын маань үр ашиг хэрэглээ гарч ирэх юм. Cubesat стандартыг хиймэл дагуул гэж үзэх үү гэдэг асуудал байдаг. 2009 онд Швейцарь улс анхны хиймэл дагуулаа яг энэ стандартаар хийгээд гаргачихсан байгаа. Ганц Швейцарь ч биш Эстони, Унгар, Польш зэрэг улсууд энэ стандартын хиймэл дагуултай. Хиймэл дагуулыг хүүхдүүд хийж чадах юм уу гэж асуудаг л даа. Гэвч 2013 оны 12 сарын 20-ны өдөр АНУ-ын ахлах сургуулийн хүүхдүүд хийгээд хөөргөчихсөн. Үүнийг 2015-2016 онд Америкийн дунд сургуулийн хүүхдүүд хиймэл дагуул хийж хөөргөнө гэсэн мэдээлэл байна" гэсэн юм.
Уралдааны эхний гурван шатанд оролцогчдын хиймэл дагуулаа бүтээх шилдэг санаануудыг уралдуулах ба мэргэжлийн хүмүүс шүүн хамгийн боломжит хувилбаруудыг дараагийн шатанд үлдээнэ. Улмаар ирэх долдугаар сард эцсийн шатанд тунаж үлдсэн гурван баг хиймэл дагуулаа бүтээж эхлэх бөгөөд тэдгээр хиймэл дагуулуудыг энэ оны 12 дугаар сараас олон нийтийн хүртээл болох аж.
Бага дунд ахлах ангийн сурагчид, их дээд сургууль коллежийн оюутнууд насны хязгаарлалтгүйгээр оролцох боломжтой дээрх уралдаан “Залуу зохион бүтээгч”, “Робокон” зэрэг танин мэдэхүйн уралдаант тэмцээний нэгэн адилаар дөрвөн үе шаттай реалити нэвтрүүлэг болон олон нийтэд хүрнэ.
А.Анар
