Монголын худалдаа эрхлэгчдийн нэгдсэн холбооноос өнөөдөр УИХ-ын гишүүн Л.Эрдэнэчимэгийн санаачилсан Архидан согтуурахтай тэмцэх хуулийн төслийг эсэргүүцэж мэдээлэл хийлээ.

Тэд энэ үеэр уг хуулийн зарим зүйл заалт амьдрал дээр хэрэгжих боломжгүй, хэрэгжлээ гэхэд нийгэмд олон сөрөг үр дагавар авчирна гэдгийг онцолсон юм. Тухайлбал архи зардаг дэлгүүрүүдийг цөөлж зөвхөн тусгай дэлгүүрээр архи заруулах заалт нь архины далд хэлбэрийн наймаа, авилгал хээл хахуулийг өөхшүүлээд зогсохгүй, 7000 гаруй архи худалдан борлуулах зөвшөөрөлтэй дэлгүүрүүдийг дампууралд хүргэж болзошгүйг тэд хэллээ.

Ингээд тэдний заримынх нь байр суурийг сонслоо.

М.Ганбаатар: Л.Эрдэнэчимэг гишүүн архидалтын жинхэнэ шалтгааныг олж харсангүй

-Л.Эрдэнэчимэг гишүүн сүүлийн зургаан сар монголын бүх хэвлэл мэдээллийн хэрэгслээр архидан согтуурахтай тэмцэх тухай хуулиа ярьж сурталчиллаа. Гэтэл энэ хуулийн төслийг уншаад үзэхэд ёстой нөгөө нуухийг нь авах гээд нүдийг нь сохлов гэдэг шиг л хууль болж. Гишүүн маань архидалтын жинхэнэ шалтгаан гол хөрс нь юу гэдгийг олж харж чадсангүй. Архидалт гэмт хэрэг биеэ үнэлэлт зэрэг нь ажилгүйдэл ядуурлаас үүдэлтэй гэдгийг дэлхий нийтээрээ тогтоочихсон. Гэтэл хуулинд тэр талаарх зүйл заалт юу ч байхгүй. Энэ хуулинд шинээр орж байгаа гол заалт нь Монголд архи борлуулах цэгийн тоо хэтэрхий олон болсон учраас тэдгээрийг цөөлөөд зөвхөн тусгай дэлгүүрүүдээр заруулаад, үлдсэнд нь дарс пиво заруулах юм. Ийм өчүүхэн юмаар хууль гаргаж УИХ-ын нэр хүндийг унагааж байна. Хэрэв энэ зөв байсан юм бол Засгийн газрын тогтоол юм уу Хотын даргын захирамжаар хэдэн дэлгүүрүүдийг нааш цааш нь болгочихно шүү дээ. Архи зардаг дэлгүүрүүдийг цөөлснөөр архидал зогсохгүй. Монголд 1980-аад оны сүүлчээр архийг картын бараанд оруулсан. Гэтэл энэ үед Монголчууд юу сурсан бэ гэхээр нэрмэл, самгон, барашиг хийж спиртээ найруулж сурсан, шаг гэдэг зүйл дэлгэрсэн байдаг. Түүнийгээ арайхийж засч залруулсны дараа дахин тийм нөхцөл байдал үүсгэх хууль батлах гээд байгааг бид эсэргүүцэж байна. Үнэхээр архидалт манай нийгмийн зовлон зүдгүүр болсон нь үнэн. Гэхдээ үүнийг хорьж цагдаж шийдэхгүй. Архидалтын эсрэг нийгмээрээ хөдөлж, цогц арга хэмжээ авч байж л энэ бүхэн нааштайгаар шийдэгдэнэ.

Г.Дашдаваа: Л.Эрдэнэчимэг гишүүнд саналаа хэлэхэд "Та нар яахаа өөрсдөө мэд" гэсэн

-Бид энэ гуравдугаар сарын 17-нд Сонгинохайрхан дүүрэгт УИХ-ын гишүүн Л.Эрдэнэчимэгтэй яг энэ хуулиар хэлэлцүүлэг хийсэн. Энэ үеэр Л.Эрдэнэчимэг гишүүн “Би тусгай дэлгүүр байгуулах гэж байгаа бодлогоосоо буцахгүй. Гэхдээ энэ хуулийг ганцаараа батлахгүй шүү дээ. Бусад УИХ-ын гишүүд батална. Тийм учраас та нар яахаа өөрсдөө мэд. Миний энэ хуулийн гол бодлого бол тусгай дэлгүүр байгуулах асуудал” гэсэн. Бид тэр хэлэлцүүлэг дээр учир жанцангаа ололцоогүй учраас дараагийн шатны арга хэмжээгээ авч эхэлж байна. Архи гээд ярихаар тэр санаачилж байгаа гишүүнийг Монголын ард түмэн дэмжих нь тодорхой. Энэ хууль бол нэг л юм яриад байгаа. Тэр архи зардаг цэгийг нь хаязгаарлачихвал Монгол улс архигүй болчих юм шиг. Энэ чинь асуудал биш. Архидалтыг ажилгүйдэл ядуурал, тансаглал, шил шилээ дагасан баяр тэмдэглэлт өдрүүд гээд олон хүчин зүйл бий болгож байгаа шүү дээ. Бүр баасан гараг бүрийг наргиж цэнгэдэг өдөр болгосон байна. Гэтэл гишүүн архи зардаг цэгийг цөөлөөд архи нь хүнд сурталтай  олддог болчихвол архидалт багасна гэж ойлгоод байна.

24tsag.mn