Ерөнхий сайд Н.Алтанхуягийг цөөн хэдэн ахмадууддаа муухай зан гаргаж, илтэд ялгаварлан гадуурхсан хэмээн Монголын ахмадын холбооны ерөнхийлөгч Ц.Сүхбаатар гуай гомдоллон ярьж байна.

Тодруулбал Ерөнхий сайд Н.Алтанхуяг нэг ижил статустай хоёр байгууллагыг ялгаварлаж зөвхөн нэгэнд нь төсөв мөнгө хувиарлажээ. Монголд ахмадуудын төлөө үйл ажиллагаа явуулдаг хоёр л холбоо байдаг. Нэг нь  "Монголын ахмадын холбоо" нөгөөх нь "Монголын чөлөөт ахмадын холбоо". Уг нь тус хоёр газрын зорилго нь нэг. Ахмадуудын төлөө ажиллах. Гагцхүү байгууллагынх нь нэр "чөлөөт" гэдэг үгээр ялгаатай, нэг нь есөн жил, нөгөө нь 90 жилийн түүхтэй.

90 жилийн түүхтэй "Монголын ахмадын холбоо"-г Ц.Сүхбаатар гэдэг эрэгтэй тэргүүлдэг бол нөгөөхийг нь олонд Г.Баасан “авгай” нэрээр танигдсан эмэгтэй удирддаг юм. Харин Ерөнхий сайд Н.Алтанхуяг, Г.Баасангийн тэргүүлдэг “Монголын чөлөөт ахмадын холбоо”-ны үйл ажиллагааг илүү дэмждаг байна. Арга ч үгүй юм. Учир нь Г.Баасан бол Ерөнхий сайдын орон тооны бус зөвлөх. Тэгэхээр зөвлөхдөө илүү нааштай хандах нь ойлгомжтой. Гэхдээ үүний цаана Монголын олон мянган ахмадууд хохирч байна гэдгийг "Монголын ахмадын холбоо"-ны ерөнхийлөгч Ц.Сүхбаатар хэлж байна.

Түүний хэлж буйгаар энэ онд "Монголын ахмадын холбоо"-ны санхүүжилтийг нь зогсоож хөрөнгө мөнгө, эрх мэдлийг Г.Баасангийн тэргүүлдэг "Ахмадын чөлөөт холбоо"-нд хүчээр шилжүүлсэн байна. Энэ нь өөрөө хууль зөрчсөн үйлдэл бөгөөд үүнээс болж ахмадууд талцаж, эв түнжигүй байгаа аж. Хууль зөрчсөн үйлдэл биш байлаа ч хоёр адилхан байгууллагад нэгэнд нь давуу эрх өгч ажиллуулна гэдэг нь өөрөө хэр зохимжтой үйлдэл вэ?. Нөгөө талаар тус хоёр байгууллагыг нэгтгэж, захиргаа эрх мэдэл, хөрөнгө мөнгийг нь талцуулалгүй зохицуулчих боломж Засгийн тэргүүнд бий. Нэгтгэсэн тохиолдолд хамтраад ажлаа хийх боломж ч бий ахмадууд ярьж байна.

Мөн "Ахмадын чөлөөт холбоо"- нь ТББ-ын тухай хуулийг зөрчиж шийдвэр гараагүй, дүрэм нь батлагдаагүй, улсын бүртгэлд бүртгүүлж хуулийн этгээдийн эрх эдлээгүй байхдаа зарим аймаг, сумдын засаг дарга нарыг захиргаадан санхүүжилтийг шууд шилжүүлэн авч байгаа аж. Ер нь аймгуудын ахмадын тэргүүнийг Г.Баасангийн шийдвэрээр төвөөс шууд томилон ажиллуулж тамга, тэмдэг олгож байгаа нь ТББ-ын тухай хуулийн холбогдох заалтыг зөрчиж байгаа хэмээн Ц.Сүхбаатар хэллээ.Энэ мэт хууль зөрчсөн олон үйлдлийг Г.Баасан Ерөнхий сайдаар далимдуулж гаргаж байгаа аж.

Хөндлөнгөөс харвал Ерөнхий сайдын энэ үйлдэл Монголын ахмадуудын мөнгийг өөрийн зөвлөхдөө өгч бусдыг нь үл тоосон шинж гаргасан байна.  Энэ нь ч цаашдаа маш том асуудал дагуулах нь. Тодруулбал Ерөнхий сайдын дээрх үйлдлийг эсэргүүцэж "Монголын ахмадын холбоо"-ны ахмадууд хаврын чуулганы үеэр жагсаал хийхээр бэлтгэж байгаа аж. Ямартай ч хаврын жагсаалын нэг хэсэг Н.Алтанхуягт гомдсон ахмадууд байх нь.