Хоёр компанийн хоорондох газрын маргааны асуудалд 28 иргэн хохироод байгаа талаар бид хүргэж байсан. Тодруулбал, “Цаст импекс” компанийн барьж буй орон сууцанд захиалга өгсөн иргэд газрын маргаанаас болж хохирч байгаа юм. Өөрөөр хэлбэл, ашиглалтанд удахгүй орох гэж байгаа “Цаст импекс”-ийн байранд захиалга өгсөн иргэд байрандаа орох хугацаа нь болчихоод байхад өнөөх байр нь газрын асуудлаар шүүхдэлцсээр байгаа юм. Тодруулбал, “Цаст импекс”-ийн орон сууц барьж байгаа газрын хажууд байрлах “Монгол глобаль”, “Монгол эм импекс” зэрэг газрууд тус орон сууц барих газрыг өөрсдийнх нь газраас хумсаллаа хэмээн шүүхдэлцэж эхэлсэн юм. Энэ хэрэгт Нийслэлийн газрын алба ч буруутай юм байна. Тиймээс “Монгол глобаль” компанийн зүгээр Нийслэлийн газрын алба, Засаг даргыг хариуцагчаар татаж Захиргааны хэргийн шүүхээр явсаар өдгөө 4 жилийн нүүрийг үзэж байгаа юм.

Юутай ч газрын албаныхны хайхрамжгүй байдлаас болж нэг компани нөгөө компанийн эрхэд халдах болов уу, эсвэл “Цаст импекс” буруутай юу гэдгийг одоогоор тогтоогоогүй ч шүүхээс нэг хэргийг 4 жил болгон сунжруулж байгаа нь иргэдийн бухимдлыг төрүүлж байна.

Бид энэ хэргийг араас сурвалжлахаар “Цаст импекс” компанийн хуулийн зөвлөхтэй очиж уулзахад “Хэрэг шүүхийн шатанд явж байхад би мэдээлэл өгч болохгүй. Ямар ч байсан дөрвөн жил энэ хэрэг сунжирч байгаа нь ямар учиртай талаар Захиргааны хэргийн шүүхээс тодруул. Манай зүгээс бол нэн даруй шүүхээр орж хэргийг шийдвэрлэх л чухал байна” хэмээсэн юм.

Хэрэг явдлын талаар байр захиалагч иргэн Н.Энхбаатараас зарим зүйлийг тодрууллаа.

-28 иргэн байрандаа ч  орж чадаагүй байж хохироод байна гэсэн үү?

-2010 оны гуравдугаар сараас 28 захиалагч “Цаст импекс” гэх компанид 1-4 өрөө байрны захиалга өгсөн. Мэдээж иргэдэд шууд байр захиалах бэлэн мөнгө байхгүй учир амьдарч байсан хашаа байшингаа зарж, банкнаас зээл авах аргаар байраа захиалсан. Бүр хоёр өрөө байртай байсан иргэд энэ компаниас гурван өрөө байр авахаар өмнөх орон сууцаа зарсан тохиолдол ч байгаа.

Гэтэл газрын маргаан гэнэт үүсч, дөрвөн жил дамнан яригдсаар өдий хүрч байна.

-Газрын маргаан гэдэг нь ямар учиртай юм бэ?
-Сүхбаатар дүүргийн дөрөвдүгээр хороонд  “Цаст импекс” компани нэг хашаанд хоёр орон сууц барьж эхэлсэн байдаг. Эхний байр нь ашиглалтанд ороод захиалагчдаа ч байрандаа оруулчихсан. Харин бидний захиалсан хоёр дахь орон сууцыг барьж байх явцад өөр компаниудаас наад газар чин асуудалтай гээд маргаан хийж эхэлсэн. Улмаар шүүхийн шатанд энэ хэрэг явж бид байрандаа ч орж чадахгүй, юу болохыг хүлээсээр дөрвөн жил болж байна.

-Тэгэхээр өөр компани тухайн орон сууц баригдаж байгаа газрыг өөрсдийнх гээд байгаа гэж ойлгож болох уу?
- Бид урьдчилгаа мөнгөө өгөөд орон сууцаа захиалчихсан байж байтал гэнэт л  газартай давхацал үүссэн байна гэх асуудал гарч ирсэн. Тодруулбал, “Цаст импекс” компанийн  хажуугийн компани болох “Монгол глобал”, “Монгол эм импекс” зэрэг компаниуд  өөрсдийн газартай тухайн газрыг давхацсан байна гээд шүүхдэлцэж эхэлсэн. Улмаар энэ асуудал 4 жил болж байгаа гэсэн үг.

-Шүүхээс эргэж буцсаар байгаа юм уу?
-Анхан шат, давж заалдахаар ороод овоо шийдэгдэх гэж байтал Дээд шүүхээс дахин нэмэлт мөрдөн байцаалтад буцаачихсан. Ингээд буцаад л шалгагдаж барьсаар байгаад 4 жилийн нүүр үзлээ. Монголын түүхэнд 4 жил болсон хэрэг нэг байдаг гэсэн. Харин энэ маргаантай нийлээд хоёр боллоо.  

-Та бүхэн урьдчилгаа мөнгө гэж яг хэчнээн төгрөг өгсөн бэ?
-Бид бараг 1 тэрбум төгрөг өгсөн. Улмаар орон сууц маань 5 давхар хүртлээ цутгачихсан байгаа.
Харин “Монгол глобаль” компанийн захирал анх энэ хэргийг эхэлж байхад ийн ярьж байжээ.

Тэрбээр “ “Цаст констракшн” манай хашаатай залгаад байшин барина гэхээр нь “Энэ чинь болохгүй ээ, барилгын стандарт норм зөрчинө” гэсэн. Гэвч болно гээд хөрөнгөөрөө “шатах” юм. Нийслэлийн Засаг дарга болон Мэргэжлийн хяналтын ерөнхий газар, Онцгой байдлын ерөнхий газар зэрэг мэргэжлийн байгууллагаас “Цаст констракшн” компанийг Газрын тухай хуулийн хэд, хэдэн зүйл, заалтыг зөрчиж, барилга барихаа зогсоо гэсэн шаардлага хүргүүллээ. Гэтэл “Өчнөөн сая төгрөг зарж байгаа та нар хохирч үлдэнэ шүү” гээд үнэнийг нь хэлэхээр над руу  дайраад байх юм. Өөрөө юу алдчихав аа гэдгээ ерөөсөө ухаарахгүй байна. “Монгол эм импекс” болон манай компанийн дундах газрыг  “Цаст констракшн” худалдаж авсныг бид анхнаас нь мэдсэн. Худалдаж авсан газартаа орон сууц барихад нь эсэргүүцээгүй. Тэр байшин бидний эрх ашигт нөлөөлөх нь бага юм байна гэж үзсэн. Гол нь Хан-Уул дүүргийн нутаг дэвсгэр, 120 мянгатад байдаг ногоон байгууламж дээр орон сууц барих гээд оршин суугчидтай хоёр сар тэмцээд хөөгдсөн. Тэндээсээ хөөгдөж энд ирээд “Бид хятад ажилчин олноор авчирсан. Барилгаа барихгүй бол “шатах” гээд байна” гэхээр нь хөрш болох “Монгол эм импекс”, манай компани хоёр зөвшөөрөөд барилгыг нь бариулсан. Гэтэл энэ хавар хоёр дахь барилгаа бариад эхэлчихлээ. Ингэхдээ хөрш байгууллагынхаа эрх ашгийг огт харгалзаагүй” гэжээ.
Ийн “Цаст констракшн” өөрийн эрх ашгийг бодохгүй бусдын газраас хумсалж давхар барилга барьж эхэлсэн нь эцэстээ шүүхээр явахад хүргээд байгаа аж. Уг нь  холбогдох байгууллагуудаас тухайн үед Цастыг үйл ажиллагаа явуулж болохгүй гэсэн албан тоотыг хүртэл өгч байжээ. Харин одоо энэ бүгдийг үл тоож оршин суугчдаасаа 1 тэрбум шахуу төгрөгийг урьдчилан авч барилга бариад эхэлсэн байгаа нь эцэстээ захиалга өгсөн иргэдээ чирэгдүүлэхэд хүргээд байна.

Дашрамд хэлэхэд, энэхүү газрын маргааны шүүх хурал өнөөдөр 15.00 цагаас Захиргааны хэргийн шүүхэд болно.