Хотын удирдлагууд УИХ-ын гишүүдэд хандаж ил захидал илгээжээ. Тэд нийслэлийн бүтээн байгуулалтын ажлыг дэмжихгүй байгаад ихэд бухимдалтай байгаа ажээ. Учир нь энэ жил Нийслэлд хийгдэх бүтээн байгуулалтын хэд, хэдэн ажлын хөрөнгө мөнгийг танасан байгаа юм.

 Тухайлбал “Гудамж” төслийн хүрээнд нийт 13 уулзвар засварлах байсныг гурав болгосон. Мөн  тус төслийн хүрээнд хэрэгжүүлнэ гэж байсан 100 гаруй км замыг 10 км болгож багасгаад байгаа юм. Энэ мэт олон асуудлаас болж Нийслэлийн Засаг дарга Э.Бат-Үүл Эдийн засгийн хөгжлийн яамны сайд Н.Батбаяртай муудалцсан гэх мэдээлэл ч байгаа.

Тиймээс Нийслэлийн засаг дарга Э.Бат-Үүл, НИТХ-ын дарга Д.Баттулга нар УИХ-ын гишүүдэд хандаж ил захидал илгээсэн байна.

 Тэд захидалдаа “Энэ жилийн хувьд нийслэлд 20 байршилд гэр хорооллын дахин төлөвлөлтийн барилгажилтыг эхлүүлж, 50 гаруй км автозамын өргөтгөл шинэчлэл хийж, 20-иос илүү цэцэрлэг, бага сургуулийг шинээр барих, иргэдийн орон сууцны хангамжийг цогцоор нь шийдвэрлэхэд чиглэсэн шинэ хөтөлбөрийг хэрэгжүүлж эхлэх зэрэг бүтээн байгуулалтыг хийхэд бэлэн болсон байна. Улаанбаатар хотын иргэдийн олон жил хүсч хүлээсэн хотын төвлөрлийг багасгахад чухал ач холбогдолтой Баянхошуу, Сэлбэ дэд төвийг бүтээн байгуулах ”Азийн хөгжлийн банк”-ны 320 сая доллар, тусгай замын автобус буюу BRT-ийн 265 сая долларын зээлийн төсөл, “Улаанбаатар метро”-г 2020 онд ашиглалтад оруулахын тулд зураг төслийн ажлыг энэ онд хийж гүйцэтгэхэд шаардагдах 46 сая долларын  зээл зэрэг нийслэлээ өөрчлөн шинэчлэх өргөн далайцтай бүтээн байгуулалтын ажлуудын хөрөнгө оруулалт хүлээгдсэн хэвээр байна. Энэхүү томоохон бүтээн байгуулалт, төслийн санхүүжилтийн асуудлыг өрийн хэмжээ хэтэрсэн үндэслэлээр УИХ-аар хэлэлцэхгүй цаг алдаж байгаад харамсч байна. Хөрөнгө оруулалтын төслүүдээ ач холбогдолоор нь эрэмбэлэн Улаанбаатар хотын цахилгаан хангамжийг эрс сайжруулах 110 квт-ын цагираг, Яармагийн гүүр, Нисэхийн хурдны хос зам Биокомбинат Шувуун фабрикийн 22 км авто зам гэх мэт нийслэлчүүдэд амин хэрэгцээтэй байгаа, хойшлуулж боломгүй бүтээн байгуулалтад оруулах хөрөнгө оруулалтыг зогсоохгүй байх бүх талын арга замыг хайх хэрэгтэй байна. Сүүлийн үед “Гудамж” төслөөс нийслэлд хэрэгжүүлж буй ажлууд, орон сууцны санхүүжилтийг ч зогсоох тухай болчимгүй үгс зарим сайд, дарга нарын амнаас унах болов. Бидний ажлыг дэмжинэ гэдэгт итгэлтэй байна” гэжээ