Шүлхий өвчний талаар Мал эмнэлэг үржлийн газрын дэд дарга П.Болортуяатай ярилцлаа.

-Манай улсад дэгдсэн шүлхий өвчний өнөөдрийн нөхцөл байдлын тухай ярихгүй юу?
-Шүлхий өвчин гурван аймгийн 13 суманд бүртгэгдэж өнөөдрийн байдлаар нийт 3454 мал устгагдсан. Одоогоор өвчний дэгдэлт намжиж байна. Аливаа өвчин гарснаас 21 хоногийн дараа хорио цээр цуцалдаг журмын дагуу зарим сумдад хорио цээрийн дэглэм цуцалж байгаа. Үүнийг өнөөдрийн Засгийн газрын хуралдаанаар авч хэлэлцэнэ. Тэр дундаа Сүхбаатар, Хэнтий, Дорноговь аймгуудын зарим бүс нутгуудын хорио цээрийг цуцалж хязгаарлалтын бүсд шилжүүлж байна. Харин Дорноговь аймгийн Айраг, Даланжаргалан, Эрхт сумуудын хувьд хамгийн сүүлд өвчин бүртгэгдсэн голомтуудын 21 хоног нь гүйцээгүй. Гэхдээ өнгөрсөн 10 хоногийн хугацаанд шинээр өвчлөл бүртгэгдээгүй байна.

-Вакцинжуулалт хэрхэн хийгдэв?
-Голомтын бүс нутагт яаралтай вакцинжуулалт хийж үхрээ хоёр удаа тарьсан байгаа. Халдварыг төв болон баруун бүс рүү тархаахгүй байх үүднээс хамгаалалтын бүсд мөн хоёр удаа тарилга хийж байна. Хоёр дахь тарилга 50 гаруй хувьтай явж байгаа. Энэ долоо хоногтоо дуусчих байх.

-Одоо шүлхийн голомтод ямар ажил хийгдэж байгаа вэ?
-Шүлхийн голомтод одоо хорио цээр дэглэм тогтоочихсон, хөдөлгөөнийг хориглочихсон байгаа. Тэгэхээр тодорхой бүс нутагт өнөөдрөөс эхлэн хорио цээрийн дэглэм цуцлагдаж байгаа учраас хязгаарлалтын дэглэм рүү орно. Тэгэхээр бид голомтын бүс нутагт аль болох шилжилт хөдөлгөөн хийхгүй байхыг зөвлөж байгаа.

-Шүлхий өвчнийг гарсан шалтгааныг малчид малаа вакцинжуулалтанд хамруулаагүйтэй холбон тайлбарлаж байх шиг байна. Гэтэл өөрсдийн буруугаас өвчин тусгаж малаа устгуулж байгаа малчдын малыг нөхөн төлөх нь хэр зөв зохистой асуудал вэ?
-Бид үнэхээр малаа вакцинжуулаагүй малчинд хариуцлага тооцох асуудлыг ярьж байгаа. Тэдэнд нөхөн төлбөр өгөх үү үгүй гэдэг асуудал яригдаж байна. Үнэхээр зарим сумдад таригдаагүй асуудал гарсан.