Нийслэлийн агаарын бохирдлыг бууруулах, иргэдийн амьдрах орчныг сайжруулах зорилгоор “Гэр хорооллын дахин төлөвлөлт” төсөл өнгөрсөн жилээс хэрэгжиж эхэлсэн.

Тэгвэл өнөөдөр болсон төслийн удирдах хорооны өргөтгөсөн хурлаар төсөл хэрэгжүүлэгч 15 компани өөрсдийн ажлын явц, тулгамдсан асуудлуудаа тайлагналаа.

15 компаниас долоо нь барилгын ажлаа эхлүүлжээ

Дахин төлөвлөлтийг нийт 21 байршилд хийх журам гарснаас одоогоор 16 компани төсөл хэрэгжүүлэх эрх бүхий батламжаа гардан авсан юм. Үүнээс “Хера пропертиз” ХХК, “Асар Өргөө” ХХК, “Буурал Сутай” ХХК , “Цэлмэг Ази” ХХК, “Баганат Өргөө” ХХК,  “Бэрэн Групп” ХХК-иуд өнгөрсөн жилийн намраас барилгын ажлаа эхлүүлээд байна.

Харин үлдсэн компаниуд барилгын ажил эхлүүлэх бэлтгэлээ базааж байгаа бөгөөд зарим компаниудад зайлгүй нийслэлээс шийдвэрлүүлэх шаардлагатай асуудлууд тулгарчээ. Тухайлбал “Гангар Инвест”  ХХК өнгөрсөн жил хундаам цутгах нүхээ ухсан боловч ойролцоох хороодын бохирын систем гэмтсэнээс нүх нь бохироор дүүрч барилгын ажил эхлүүлэх боломжгүй болсон байна.

Төсөл хэрэгжүүлэгч компаниуд ТББ байгуулжээ

Өргөтгөсөн хурлын бас нэгэн гол зорилго бол төсөл хэрэгжүүлэгчдийн өмнө тулгамдсан асуудлуудыг сонсох байсан. Тэгвэл тэдэнд айлуудын газар эзэмших, өмчлөх эрхийн зөрчлөөс авахуулаад дэд бүтцийн хүрэлцээгүй байдал, хөрөнгө оруулалт татах боломжгүй, ажиллах хүч дутмаг зэрэг олон саад бэрхшээл тулгарч эхэлжээ.

Тиймээс тэд дээрх асуудлуудаа шийдвэрлүүлэх зорилгоор “Гэр хорооллын дахин төлөвлөлтийн төсөл хэрэгжүүлэгчдийн нэгдсэн холбоо” ТББ –ыг байгуулснаа дуулгаад дахин төлөвлөлтийг хууль эрх зүйн талаас баталжуулах, эдийн засгийн хувьд төрөөс дэмжлэг үзүүлж, зээл авах, хөрөнгө оруулалт татах боломжуудыг олгох, дэд бүтэц, ажиллах хүч зэрэгт анхаарч ажиллахыг хотын удирдлагуудаас хүслээ.

Холбооны гишүүд дараа долоо хоногт нийслэлийн удирдлагуудыг зангиагүй уулзалтанд урьсан бөгөөд хотын удирдлагууд тэдний урилгыг хүлээн авсан юм.