Дүүргийн 2 дугаар прокурорын газраас Сонгинохайрхан дүүргийн Цагдаагийн 1,2,3 дугаар хэлтсүүдэд шүүхээс тэнсэн ял авсан, хорих ялыг хугацаанаас нь өмнө суллаж тэнсэн харгалзсан, ял хойшлогдсон ялтнуудад цагдаагийн байгууллагаас тавьж байгаа захиргааны хяналтын ажилтай шалган танилцаж үүрэг, чиглэл өгсөн байна.

Цагдаагийн хэлтсүүдэд нийт 560 гаруй хүн захиргааны хяналтанд байгаа бөгөөд тэдэнд тус дүүргийн 32 хорооны хэсгийн байцаагч, ахлах байцаагч, хэв журам хамгаалах тасгийн дарга нар өдөр тутам хяналт тавьж ажиллаж байгаа ажээ.

Шалгаж танилцсан дүнгээс үзэхэд цагдаагийн эрх бүхий албан хаагч нь дээр дурьдсан ялтнуудын батлан даагчид, харгалзан дэмжигчид болон өөрсөдтэй нь тогтмол хугацаанд уулзаж ярилцах, зөвлөгөө өгөх зэрэг хүн нэг бүртэй шаардлагатай арга хэлбэрээр тулж ажиллахад онцгой анхаарч, энэ талаараа тэдний хувийн хэрэгт нь дэлгэрэнгүй тэмдэглэл хийж байх ажлыг эрчимжүүлэх нь зүйтэй байгаа гэж дүгнэжээ.

Мөн дээрх хүмүүсийн оршин суугаа хороо, дүүргийн засаг дарга, нийгмийн ажилтан, олон нийтийн байцаагч, иргэдийн, нийтийн хурлын төлөөлөгчид зэрэг төр, захиргааны албан тушаалтан, байгууллагатай нягт хамтран ажиллаж тэдний дэмжлэг туслалцааг авах, нийгэмшүүлэх, засрал хүмүүжлийн чанартай арга хэмжээнүүдийг авч ажиллаж байх хууль журмын хэрэгжилтийг хангаж ажиллахыг анхаарахад прокурорын байгууллагаас үүрэг болгожээ.