Чингэлтэй дүүргийн Засаг даргын Тамгын газар, Хөдөлмөрийн хэлтэс, Жижиг дунд үйлдвэрлэлийг дэмжих / ЖДҮД/ Бизнес инкубаторын төв, Дэлхийн Зөн Монгол Олон улсын байгууллагын Чингэлтэй, Хайлааст салбарын Орон нутгийн хөгжлийн хөтөлбөр, Монголын Хүний Нөөцийн Менежментийн Холбоотой хамтран жижиг бизнес эрхлэгчдийг дэмжих, өрсөлдөх чадвартай, нэмүү өртөг шингэсэн Оёмол бүтээгдэхүүний үйлдвэрлэлийг дэмжих зорилгоор дүүргийн “Оёмол бүтээгдэхүүн үйлдвэрлэгчдийн 2 дугаар зөвлөлгөөн, үзэсгэлэн худалдаа”-г Чингис зочид буудлын хурлын танхимд амжилттай зохион байгууллаа.Зөвлөлгөөнөөр Монгол Улс дахь Оёдлын салбарын өнөөгийн байдал, цаашдын чиг хандлага, оёдол, оёмол бүтээгдэхүүн үйлдвэрлэгчдийг дэмжиж буй хөдөлмөр эрхлэлтийн бодлого, зээлийн батлан даалтын сангийн зорилт, түүний хэрэгжилт, Засгийн газар, Яам, Нийслэл, дүүргээс албан болон албан бус секторт ажилладаг жижиг дунд бизнес эрхлэгчдэд зориулсан төсөл хөтөлбөр, бодлого, олгогдож буй зээлийн батлан даалтын сангийн талаарх мэдээ, мэдээллийг хүргэлээ.
Энэхүү арга хэмжээний хүрээнд 2014 оны 03 дугаар сараас эхлэн Чингэлтэй дүүрэгт оршин суудаг оёдол эрхлэгчид, аж ахуйн нэгж, байгууллага, нөхөрлөл, хоршоо, бүлэг, оюутан сурагчид, иргэдийн дунд орчин үеийн загварын чиг хандлагыг харуулсан “ Оффис хувцас”-ны уралдааныг 1 сарын хугацаатай зарласан бөгөөд уралдаанд нийт 28 аж ахуйн нэгж, иргэний 57 бүтээл ирсэнийг зөвлөлгөөний үеэр шалгарууллаа. Тэмцээний1 дүгээр байрыг 4-р хорооны иргэн Ц.Батгэрэл, 2 дугаар байрыг 11-р хорооны иргэн Б.Батцэнгэл, 3-р байрыг 17-р хорооны иргэн Х.Ганчимэг нар тус тус эзлэн ДЗОУБ-ны нэрэмжит шагнал болох 0,5,-1,5 сая төгрөгийн өртөг бүхий тоног төхөөрөмжийн эрхийг бичгээр шагнагдсан. Оёдол, оёмол бүтээгдэхүүний үйлдвэрлэл эрхэлдэг тухайн салбартаа олон жил үр бүтээлтэй ажилласан 7,11,15-р хорооны иргэд А.Баярмаа, М.Уртнасан, Д.Дашцэрмаа, Д.Баасанжаргал, Д.Эрдэнэчимэг, Л.Бадамгэрэл нар “Үйлдвэр, Хөдөө Аж Ахуйн Яамны” 80 жилийн ойн медалиар шагнагсан бөгөөд Цэгцүгэн ХХК болон 10-р хорооны иргэн Д.Даваасүрэн, 19-р хорооны иргэн Ж.Баяраа нар дүүргийн Засаг даргын нэрэмжит шагналаар тус тус шагнагдлаа.
Үндэсний үйлдвэрлэлээ дэмжин сэргээж бэлэнчлэх сэтгэлгээг халах, цаашид дэлхийн жишигт хүрсэн бүтээгдэхүүн үйлдвэрлэж, бизнесийн цар хүрээ, ашиг орлогоо нэмэх, боломж бололцоог хангах үүднээс жижиг, дунд бизнес эрхлэгчдийн бүтээгдэхүүний үзэсгэлэн, худалдаа зохион байгуулагдаж 60 аж ахуйн нэгж, иргэний бүтээлүүд тавигдсан байна.
Энэхүү зөвлөлгөөн дүүргийн хэмжээнд 2 дахь удаагаа зохион байгуулагдаж байгаа бөгөөд цаашид ч уламжлал болгон тэргүүлэх нэмүү өртгийг ихээр шингээдэг, ажлын байрыг бий болгодог энэхүү салбарыг хөгжүүлэхэд дүүргийн зүгээс түлхүү анхаарч ажиллахаар боллоо.
