Говь-Алтай аймгийн Цээл сумын нутагт хүдрийн олборлолт явуулдаг “Алтайн хүдэр” ХХК-ийн үйл ажиллагааг холбогдох газраас түр зогсоосон байна.

“Алтайн хүдэр” ХХК Таян нуурын төмрийн хүдрийн уурхайгаас Бургастай хилийн боомт хүртэлх 168.3 км авто замд хатуу хучилт хийгээгүйгээс, түүнчлэн уурхай, баяжуулах үйлдвэрийн тоосжилтоос Цээл сумын байгаль орчин бохирдож, хөрс бэлчээр доройтох, хүн, малын эрүүл мэндэд сөргөөр нөлөөлөх, авто замын осол аваар гарах үндсэн нөхцөл бүрдсэн байсан юм. Тус компанийн үйл ажиллагаанаас болж Говь-Алтай аймгийн Цээл, Төгрөг, Бугат, Алтай гэсэн дөрвөн сумын газар нутгийг тахлагдаж цагаан шороонд дарагдаад байгаа юм. Мөн цагаан зээрийн нутагт олборлолт явуулснаас болж амьтад дайжиж алга болжээ. Эдгээр зөрчил, дутагдлыг арилгуулахын тулд “Алтайн хүдэр” ХХК-д хугацаатай үүрэг даалгаварыг холбогдох газруудаас өгөөд байгаа аж.

Тухайлбал, Таян нуурын уурхайгаас Бургастайн хилийн боомт хүртэлх 168.3 км авто замаас энэ онд барихаар төлөвлөсөн 80 км замын эхний хэсгийг зургадугаар сарын 15-ны дотор, ирэх онд замыг бүрэн хэмжээгээр барьж дуусган ашиглалтад оруулах, мөн ирэх тавдугаар сард багтаан өмнө хийгдсэн Байгаль орчинд нөлөөлөх байдлын нарийвчилсан үнэлгээний тайланд нэмэлт тодотгол хийлгэх, тоосжилтыг бууруулах зорилгоор замын усалгааг тогтмол хийх, зэрлэг амьтан нүүдэллэх гарцыг шийдвэрлэх зэрэг найман үүрэг өгчээ.