Оюутолгойн хөрөнгө оруулагч “Туркиз Хилл Ресурс” компани Засгийн газартай харилцан буулт хийх замаар тохиролцож байгаа талаар манай сайт өмнө нь мэдээллэж байсан. Тэгвэл энэ нь бодитой болохыг баталсан үйл явдал боллоо. Тодруулбал Оюутолгой компанид татварын ерөнхий газраас тавиад байсан 130 сая ам.долларын торгуулийн актыг 30 сая ам.доллар болгон бууруулсан болохыг “Туркиз Хилл Ресурс” компани албан ёсоор мэдэгдсэн байна. Энэ талаар татварын ерөнхий газрын дарга Т.Батмагнай “Оюутолгой компани Монгол Улс, БНХАУ гэсэн хоёр талд татварын бичиг баримт бүрдүүлдэгээс асуудал эхэлсэн” гэж тайлбарласан байна. Татварын маргаантай асуудал ийнхүү шийдэгдсэн нь уг төслийн дараагийн шатны хөрөнгө оруулалт нааштай шийдэгдэхэд том түлхэц болно гэж эх сурвалж онцолж байна. Одоо талууд анхан шатны хөрөнгө оруулалтын өссөн дүнг нягтлах, дараагийн шатны хөрөнгө оруулалтын хэмжээг тохирох асуудал дээр шийдэл олох л үлдээд байгаа гэв. Оюутолгой төсөлд 4 тэрбум ам.долларын зээл олгох 15 банкны баталгааны хугацаа энэ сарын 30-ний өдөр дуусна. Харин энэ хугацаанд талууд эцсийн байдлаар тохиролцож амжихгүй, гэхдээ хугацааг бага зэрэг сунгаж асуудлаа шийдэх боломжтой талаар байр сууриа илэрхийлжээ.