1956 онд Японы Кумамото арлын Минамато хотод улсынхаа түүхэнд байгаагүй хамгийн аюултай үйлдвэрийн бохирдол үүссэн юм. Энд гажигтай амьтад ихээр мэндлэхийн зэрэгцээ нутгийн оршин суугчдад толгой өвдөж, ой ухаан балартах зэрэг шинж тэмдгүүд илрэх болсон байна. Эрдэмтэд Минаматагийн химийн үйлдвэрийн мөнгөн усны хаягдал орчныг хордуулж, муудсан далайн хүнсээр хооллосон 2000 гаруй хүн амиа алдаж, олон мянган хүн бүх насаараа өвчнөөр шаналахад хүргэсэн гэдгийг нотолсон юм. Энэ бол “Чиссо” корпораци хүрээлэн буй орчныг бохирдуулахад нөлөөлсөн гэдгээ хүлээн зөвшөөрөхөөс ч өмнөх тоо гэнэ.

Далай руу цутгаж буй мөнгөн устай хаягдлыг планктон хэмээх далайн жижиг биетүүд идэж, түүгээр нь хооллодог загасаар дамжин хүний биед очиж өвчлүүлдэг болохыг эрдэмтэд хөдөлшгүй баримтаар нотолсон байна.

Өнөөдрийн байдлаар “Минамата өвчин” гэдэг нэр томьёо нэгэнт буй болж энэ өвчнөөс болж хохирогчдын тоо 200 мянгад хүрээд байна. Японы засгийн газар “Чиссо” компанитай гэрээ хийн хордсон 60-хан га газрыг нөхөн сэргээх ажилд 50 тэрбум иен зарж, 1977 оноос эхлэн 13 жилийн турш өдөр шөнөгүй нойр хоолгүй ажиллаж байж хордсон энэ газрын суурин дээр дурсгалын цэцэрлэг болон спорт комплекс барьжээ.

 “Чиссо” компаниас хохирогчдод төлсөн нөхөн төлбөрийн хэмжээ өнөөдрийн байдлаар 145.5 тэрбум иен буюу 15 тэрбум долларт хүрчээ. Гэвч үүний цаана энэ өвчнөөсөө болж нийгмээс гадуурхагдсан иргэд,  тэсэшгүй шаналгаанаасаа болоод амиа хорлосон хүмүүс, эхийнхээ хордлогыг биедээ тээн зулбаж гарсан нялх үрс, цаашдаа хүүхэд төрүүлэхгүй байх анхааруулга авч аборт хийлгэж байсан мянга мянган эхчүүд, төрөлхийн мэдрэлийн эдгэшгүй өвчиндөө нэг насаараа шаналж байгаа хүмүүсийн биет хохирлыг хэзээ ч ямар ч мөнгө нөхөхгүй.