Чад улсын ерөнхийлөгч Идрисс Деби исламын хэт даврагч “Боко Харам” бүлэглэлийг “арчиж хаяна” хэмээн амлалаа. Тэрээр тус бүлэглэлийн толгойлогч Абубакар Шекауг хаана нуугдаж байгааг мэднэ гэсэн бөгөөд өөрийн саналаар бууж өгөхийг анхааруулсан байна.

Дотны түнш Нигери улсад айлчилж байгаа тэрээр хэвлэлийн хурлын үеэр “Абубакар Шекау бууж өгөх сонирхолтой байгаа. Учир нь бид түүний  байршлыг мэдэж байгааг тэр ч бас мэднэ. Хэрвээ тэр саналаараа бууж өгөхгүй бол хамтрагчдад нь тохидолдсон зүйлтэй учрах болно” гэжээ. Идрисс Дебигийн ярьснаар Шекау нь Нигерийн Диква хотын зүүн хойд хэсэгт орших тосгонд нуугдаж байгаа аж. 

Өнгөрсөн сард Чадын цэргүүд Диква хотод “Боко Харам”-ын дайчдыг ялсны дараа Шекау оргон зайлсан юм. Борно муж улсын Диква хотод өнгөрсөн сарын 15-нд болсон тулаанд Чадын хоёр цэрэг, алан хядагчдын 117 дайчин амиа алдсан билээ.
Абубакао Шекаугийн тухай мэдээлэл маш ховор бөгөөд НҮБ болон АНУ дэлхийн хэмжээний террорист хэмээн эрэн сурвалжилж байсан юм. Нигери улс өнгөрсөн сард хөрш зэргэлдээ орших Чад, Камерун улстай хамтын холбоо байгуулж тус улсад байршсан “Боко Харам” бүлэглэлтэй тэмцэх ажиллагааг эхлүүлээд байна.