Таныг аль загварын даашинз хамгийн гоё харагдуулж болохыг бодон толгойгоо гашилгаж сууна уу? Хувцасны шүүгээгээ ухан өөртөө төгс таарахаар даашинзыг хайсаар байна уу. Тийм бол миний бэлтгэсэн энэ өчүүхэн мэдээлэл та бүхэнд тусална гэж найдаж байна. Таны хэрхэн хувцасласнаар хүмүүс тэгж л дүгнэдэг гэдэг нийтлэг ойлголт байдаг. Анхны сэтгэгдлийг хүмүүс хэрхэн хувцасласнаар л олж авдаг шүү дээ. Тиймээс ч бид “сэтгэгдэл төрүүлэх”-ээр хувцаслах нь зүйн хэрэг. Даашинзаа сонгоход мэдээж хэрэг таны биеийн галбир их шалтгаалах боловч орхигдуулж болохгүй хэдэн зүйлийг та мэдэж байх хэрэгтэй байдаг. Үе үеийн туршид загвараа хэзээ ч алдаж байгаагүй, стил нь хэзээ ч мөхөхгүй гэгддэг даашинзуудыг танд танилцуулъя.
Танд “заавал байх” ёстой : Богино хар даашинз
Сонгодог богино хар даашинз
Богино хар даашинз ямар ч эмэгтэй хүний хувцасны шүүгээнд заавал байх нэг гол стил юм. Хэдийгээр энэ өнгө 100 жилийн өмнөх эмэгтэйчүүдийн хувьд гашуудлыг илэрхийлдэг байсан ч өнөө үед хар өнгө нь охид бүсгүйчүүдийн хувьд хамгийн дээд зэргийн, универсал, сонгодог өнгө болсон. Энэ өнгөгүйгээр хэний ч хувцасны шүүгээ төсөөлөхийн аргагүй.Дуртай хар даашинзаа өмсөхдөө нэгэн хэвийн харагдахаас зайлсхийхийн тулд та ээмэг, бөгж, бугуйвч, энгэрийн зүүлт, ороолт, хүзүүний зүүлт зэрэг гоёл чимэглэлийг даашинзтайгаа хослуулвал та үлгэрийн дагина мэт л харагдах болно.
Гандан бууршгүй улаан даашинз, дур булаам төрх
Цоглог улаан даашинз
Энэ бол гал халуун хайр дурлалын илэрхийлэл болсоор ирсэн.
Мөн эрч хүч, амжилттай байхыг ч бэлгэддэг. Хамгийн гол нь улаан өнгө ямар ч арьсан дээр маш тансаг харагддаг онцлогтой. Бүсгүй та өөрийн эмэгтэйлэг байдал, төрөлхийн гоо үзэсгэлэнгээ гайхамшигт улаан даашинзаар гоёорой.Корсэтэн даашинз: Таны галбирыг бүтээнэ
Ягаан корсет
Зуун зууны өмнө барууны эмэгтэйчүүд даашинзан дотуураа корсетийг давхар өмсдөг байжээ. Олон давхар өмсгөлийнх нь цаана корсет нь эмэгтэйчүүдийг нарийхан бэлхүүс дур булаам цээжтэй харагдуулах үүргийг гүйцэтгэдэг байсан бол өнөөдөр корсет нь бүсгүйчүүдийн төрөлхийн бие галбирыг засч харагдуулах гол үүрэгтэй болсон. Туранхай хэрнээ шув шулуун харагддаг эмэгтэйчүүдэд зөвлөхөд корсетэн даашинз нь танд сайхан галбирыг өгч чадна. Түүнчлэн та илүү унжсан харвиндаа санаа зовж явдаг бол корсеттай даашинзыг сонгоорой. Дур булаам гуалиг бэлхүүстэй болсон та өөрийгөө толинд хараад танихгүй л болов уу.Нэг мөртэй даашинзууд (Dare to Bare)
Нэг мөртэй даашинз нь сайхан гартай эмэгтэйчүүдийг төгс харагдуулдаг.
Нэг мөрөө тэр чигээр нь ил гаргаж, нөгөө мөр чинь далдлагдаж болох ба бүр урт ханцуйтай ч байж болно. Нэг мөртэй даашинз өмсөөд байх нь түгээмэл биш болохоор хэрэв та үүнийг өмсвөл маш өвөрмөц харагдахаас гадна, дээрээс нь гоёл чимэглэлээ зүүгээд л алдарт одууд шиг харагдаж болно шүү дээ.Хүүхэлдэйн даашинзны үе эргэн ирж байна (Doll dress)
60-аад оны үсний хэв маяг, хувцас загварын үе буцан ирж байна гэлтэй. Сүүлийн хэдэн жилд хүүхэлдэйн даашинз эргэн ирж, загвар өмсөгчид хүртэл илүү хүүхдэрхүү царайтай болох чиг хандлагатай болсон. Жишээлбэл, Дуучин Fergie спорт маягийн хүүхэлдэйн даашинз өмссөн нь ямар ч эмэгтэйчүүдийн нүдийг хужирлахаар байжээ. Ер нь богино даашинз моодонд орж байна. Та богино даашинзаа өндөр өсгийт, түүнчлэн урт түрийтэй гуталтай хослуулбал гайхалтай харагдах болно.
Цээж барьсан даашинз өндөр харагдуулна
Цээж барьсан даашинзны бүх төрлийн бие галбиртай эмэгтэйчүүдэд тохирдгийн нууц нь өндөр болгож харагдуулдагт оршдог. Энэ даашинз нь таны биеийн дээд хэсгийг өргөж, даашинзны уртын хэсгээс хамааран таны хөлийг урт харагдуулснаар та хамаагүй өндөр болж харагдана. Энэхүү даашинз нь хормой нь өөр өөр урттай, хүзүү, цээжний хэсэг нь өөр янз байж болдог. Зарим нь мөргүй, зарим нь урт ханцуйтай, урт дэрэвгэр хормойтой бүр богинохон хормойтой байх нь ч бий.
Цээж барьсан даашинзны загвар бол их хөөрхөн, чамин загвар төдийгүй үлгэр домгуудад үзэсгэлэнт гүнжүүдийн хамгийн өмсөх дуртай хувцас нь байсан гэдгийг санахад илүүдэхгүй. Магадгүй та ч үлгэрт гардаг гүнж болон хувирах юм билүү?
Мөргүй даашинз
Бүх насны эмэгтэйчүүд энэ сонгодог хэв маягийн даашинзанд дуртай байдаг. Улирлаас улирал дамжин загварын чиг хандлага, стил хэв маяг түүнчлэн өнгө ч мөн өөрчлөгддөг бол мөргүй даашинз мөнхөд стилээ авч үлдэж чаддагаараа давуу талтай. Хэрэв та өөрийн гоё эгэм, сайхан мөрөөрөө бахархаж, гоо үзэсгэлэнгээ нуухыг хүсдэггүй бол мөргүй даашинз таны төлөө үйлчлэх болно.Halter даашинз: Хүн бүрийн харцыг сайхан галбираараа байлдан дагуул
Halter буюу хүзүүнийхээ ард уядаг мөртэй цагаан даашинзтай домогт Мэрилин Монро гэхээр танд энэ даашинзны хамгийн сайн төсөөлөгдөж байгаа биз. Энэ даашинзны онцлог бол олон хэв загвартай байж болох ба мөн өөр өөр галбиртай эмэгтэйчүүдэд таардаг юм. Өөртөө тохирох өнгө, загвартайг нь сонгоод өмсөөрэй.
Sheath даашинз
Энэ даашинз нь ямар ч төрлийн бие галбиртай хүнд сайхан зохицохоос гадна биеийн өөг далдалдаг. Холливудын олон одууд, алдартнууд энэ даашинзаар гоёдог байна.
Slip даашинз: Шөнийн даашинз
Үдэшлэг, хүлээн авалт дээр очих, олны харцыг булаахыг хүсвэл энэ загварын даашинзыг сонгоорой. Slip даашинзны нэг гол давуу тал бол чиний арьсанд чинь торгомсог зөөлөн, чөлөөтөй байдлыг мэдрүүлж чаддаг.
Ер нь биенийхээ хэлбэрт тохируулан хувцаслахад заавал тухайн үеийн моодыг хөөх хэрэггүй. Чиний биед ямар төрлийн хувцас хамгийн гоё зохидог болохоо мэдэх нь чиний хамгийн сүүлийн үеийн FASHION юм шүү дээ.
