-
2016 оны 10 сарын 06
Эм, эмнэлгийн хэрэгслийн тухай хуулийн 5 дугаар зүйлийн 5.5.3 дах хэсэгт заасны дагуу эм, биологийн идэвхт бүтээгдэхүүнийг бүртгэх, өөрчлөлт оруулах асуудлыг эмийн үндэсний бодлогын хүрээнд шийдвэрлэдэг. Энэхүү заалтын дагуу Монгол Улсын Малын эмийн бүртгэлд бүртгэгдсэн эмийн жагсаалтыг шинэчлэн танилцууллаа. Цаашид энэхүү мэдээллийг улирал тутам шинэчилж байх ажээ.
-
2016 оны 10 сарын 06
Засгийн газраас Улаанбаатар-Хөшигийн хөндийн олон улсын шинэ нисэх онгоцны буудал чиглэлийн хурдны авто зам барих төслийг хэрэгжүүлж эхэлсэн. Уг авто зам нь 32.226 км урт, 32.5 м өргөн асфальтбетон хучилттай, 2 урсгал 6 эгнээтэй болох юм .Хурдны замын 22.5 км замын зураг төсөл батлагдсан бөгөөд үлдсэн хэсгийн зураг төсөл батлуулах шатанд байна. Зураг төсөл нь батлагдсан эхний 22.5 км замд барилгын ажил хэвийн үргэлжилж байгаа юм. Уг хурдны зам нь 2018 оны наймдугаар сарын 18-н гэхэд ашиглалтад орох гэнэ.
Б.Цэцэг
-
2016 оны 10 сарын 06
Засгийн газрын мөрийн хөтөлбөрийн хүрээнд Эрүүл мэндийн салбарт дөрвөн зорилт бүхий 22 үйл ажиллагаа, 140 гаруй ажил хэрэгжүүлэхээр төлөвлөөд буй. Уг хөтөлбөрт 5 хүртэлх насны хүүхдийн эмийн зардлыг эрүүл мэндийн даатгалын сангаас гаргаж байхаар тусгажээ. Эрүүл мэндийн яамнаас НҮБ-ын хүүхдийн сангийн шугамаар үйлдвэрлэгч газраас нь худалдан авалт хийх хүсэлт тавьсан байна. Түүнчлэн ирэх онд түргэн тусламжийн машин дутагдалтай байгаа 151 сумыг түргэний машинаар хангах, орон нутгийн нэгдсэн эмнэлгийг рентген аппаратаар хангах зэрэгт шаардлагатай төсөв хөрөнгийг шийдвэрлүүлж байгаа аж.
Б.Цэцэг
-
2016 оны 10 сарын 06
Сонгуулийн маргаашаас эхэлсэн халаа сэлгээ томилгоо хоёр сарын хугацаанд дэндүү хурдан өрнөж байна. Энд иргэдээ өмөөрдөг төр засаг, энэрэн нигүүлсдэг удирдлага гэж алга. “Дээрээс” ирсэн шийдвэрийн дагуу гарын үсэг, тамгаар бүхэл бүтэн айл гэрийн амьдрал, хувь заяаг шийдвэрлэж байна. Хэдхэн хоногийн емнө нийслэлийн агентлагуудаас 200 гаруй хүнийг хууль бусаар ажлаас чөлөөлсөн гэж байсан бол өнөөдөр хоёр дахин нэмэгджээ. Мөн эрчим хүчний салбарын төрийн өмчит 18 компанийн 14компанийн гүйцэтгэх захирлыг улс төрийн шалтгаанаар сольсон байна.
Мэргэжлийн хүмүүсийг сольсны цаана улс орны эрх ашиг яригдаж байгаа гэдгийг харьяа үйлдвэрчний эвлэлийнхэн халаглан ярьж, хаана хандахаа мэдэхгүй будилж явна. Халаа сэлгээний талаар АН-ын хуульч, Хяналтын хорооны нарийн бичгийн дарга Б.Батхуяг судалгааг гаргаж байгаа аж. Одоогоор бүтэцийн өөрчлөлт, янз бүрийн шалтгаанаар ажлаасаа чөлөөлөгдсөн хүмүүсийн тоо 21 аймаг орон нутагт 800, яам, нийслэлийн агентлаг, дүүргүүдэд 1200 орчим байна. Тухайлбал, Хүн ам нийгмийн хамгааллын яамнаас 33, нийгмийн даатгалын салбараас 40, Хөдөлмөрийн яамнаас 110, Гадаадын хөрөнгө оруулалтын газраас ес, Хүүхдийн төлөө үндэсний газраас 28. Мөн нийслэлийн харьяа 17 агентлагийн дарга, НИТХ-ын ажлын албаны 40 хүний 35- ыг нь сольжээ. Хүмүүс ажлаас чөлөөлөгдсөн тушаалаа аваад эхнээсээ шүүхэд хандаад явж байгаа гэнэ.
Б.Цэцэг
-
2016 оны 10 сарын 06
Нийслэлийн статистикийн газраас аравдугаар сарын эхний долоо хоногийн үнийн танилцуулгыг гаргажээ. Үүнд:
-
2016 оны 10 сарын 06
Аймгийн Засаг даргын 2016 оны 09-р сарын 16-ны өдрийн А/353 дугаар захирамжийн дагуу Дархан-Уул аймгийн Дархан сумын нутаг дэвсгэрт дараах байршлуудад газар эзэмших эрхийн гэрчилгээний дуудлага худалдаа зохион байгуулна. Үүнд:
-
2016 оны 10 сарын 06
Оюутнууд сургалтын төлбөрийн зээл авах эрхтэй боллоо
-
2016 оны 10 сарын 06
Нийгмийн даатгалын сангаас олгох тэтгэвэр, тэтгэмжийн тухай хуулийн төслийг УИХ-д өргөн барина
Өнгөрсөн оны байдлаар тэтгэврийн насанд хүрсэн иргэдийн дийлэнх нь буюу 90 гаруй хувь нь нийгмийн даатгалын сангаас тэтгэвэр авч байгаа бөгөөд ийм тэтгэвэр авах болзол, шалгуурыг хангаагүй ахмад настнууд нийгмийн халамжийн сангаас тэтгэвэр авч байна.
Харин эдийн засгийн идэвхтэй хүн амын 30 гаруй хувийг бүрдүүлдэг малчдын нийгмийн даатгалын хамрагдалт хангалтгүй байгаа нь ирээдүйд тэтгэвэр авах эрх үүсэхгүй эрсдэлтэй болжээ.
Малчид сайн дурын даатгал төлөх боломжтой хэдий ч маш бага хувь нь шимтгэл төлж, даатгуулж байна. Тухайлбал өнгөрсөн оны жилийн эцсийн байдлаар 189 мянга гаруй хүн даатгуулсны 42 мянга гаруй нь малчид байсан нь нийт малчдын ердөө 15 хувь нь юм.
Малчнаар ажиллах иргэдийн тоо жил бүр багасаж байгааг нэмэгдүүлэх, малчнаар ажиллах сонирхол бий болгох, малчдын нийгмийн баталгааг хангах, байгаль, цаг уураас шууд хараат нөхцөлд мал маллаж байгаа малчдын өндөр насны тэтгэвэр тогтоолгох насыг өөрчлөхийг зорьж байна.
Хуулийн төсөлд тэтгэврийн даатгалын шимтгэл төлсөн хугацааны болзол хангасан малчин эрэгтэй 55, эмэгтэй 50 насандаа тэтгэвэр тогтоолгох эрхтэй байхаар тусгажээ. Төсөл батлагдвал малчдын нийгмийн баталгаа сайжирч, малчдад ирээдүйд үзүүлэх нийгмийн халамжийн зардал буурна гэж Засгийн газар үзэж байна. Мөн хууль хэрэгжсэнээр 2019 онд 20 гаруй мянган малчин шинээр тэтгэвэр тогтоолгож, тэтгэврийн зардалд 96 тэрбум, 2020 онд 22.8 мянган малчинд 112 тэрбум гаруй төгрөг шаардагдахаар байна.
Товч мэдээ
- УИХ-ын гишүүн Х.Болорчулууны санаачлан боловсруулсан Хүнсний тухай хуульд нэмэлт, өөрчлөлт оруулах тухай, Хүнсний бүтээгдэхүүний аюулгүй байдлыг хангах тухай хуульд нэмэлт, өөрчлөлт оруулах тухай хуулийн төслүүдийг зарчмын хувьд дэмжив.
- Дипломат паспорт эзэмшигчдийг визээс чөлөөлөх тухай Монгол Улсын Засгийн газар, Япон Улсын Засгийн газар хооронд нот бичиг солилцохыг Гадаад харилцааны сайд Ц.Мөнх-Оргилд зөвшөөрөв.
- “Монгол-Кувейтын байгаль хамгаалах төв” аж ахуйн тооцоотой үйлдвэрийн газар байгуулахаар Засгийн газрын тогтоол баталлаа. Тус төв нь байгаль хамгаалал болон нэн ховор ан амьтан, ургамал хамгаалах, хөрс ус агаарын бохирдлоос урьдчилан сэргийлэх чиглэлээр ажиллах үндсэн зорилготой юм.
- Эрүүл мэндийн салбарт нэн шаардлагатай, тасралтгүй 24 цагаар ажилладаг улсын төв III эмнэлгийн ангиографын аппаратын гэмтлийг засварлахад шаардлагатай 453 сая 800 мянган төгрөгийг Засгийн газрын нөөц сангаас гаргахаар боллоо.
- Хэнтий аймгийн Хэрлэн сумын 928 хүүхдийн суудалтай нэгдүгээр сургуулийн өргөтгөлд шаардагдах 350 сая 600 мянган төгрөгийг Засгийн газрын нөөц сангаас гаргахаар болов.
Томилгоо
-Б.Баярсайханыг БСШУСЯ-ны, З.Мэндсайханыг Эрчим хүчний яамны, Д.Очирбатыг Эрүүл мэндийн яамны Төрийн нарийн бичгийн даргаар тус тус томиллоо гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
-
2016 оны 10 сарын 06
Сүхбаатар дүүргийн Засаг даргын Тамгын газар Монголын Хуульчдын холбоотой хамтран хөдөлмөрийн маргаан, гэр бүл, газартай холбоотой асуудлаар иргэдэд үнэ төлбөргүй зөвлөгөө, мэдээлэл өгнө.
Энэ арга хэмжээ өнөөдөр буюу энэ сарын 6-нд болох бөгөөд дүүргийн Засаг даргын Тамгын газрын Иргэний танхимд 13:30-17:30 хооронд болох юм. 10 гаруй өмгөөлөгчдийн бүрэлдэхүүнтэй баг Эрүү, иргэн, захиргааны чиглэлээр иргэдэд дэлгэрэнгүй мэдээлэл өгөх юм.
-
2016 оны 10 сарын 05
МҮЭ-ийн Соёлын төв ордныг төрийн дээд шагнал “Хөдөлмөрийн гавъяаны улаан тугийн одон”-гоор өнөөдөр шагналаа. Шагнал гардуулах ёслолд Монгол Улсын Ерөнхийлөгчийн Тамгын газрын дарга Ц.Баярсайхан, МҮЭХ-ны ерөнхийлөгч Х.Амгаланбаатар, дэд ерөнхийлөгч С.Эрдэнэбат, ЕНБД Г.Адъяа, МҮЭСТО-ны дэд захирал С.Гэрэлмаа, дэд захирал Ц.Мөнхбаяр болон МҮЭСТ-ны үе үеийн ажилчид, ахмадууд, мэргэжил үйлдвэрлэлийн салбарын дарга нар оролцжээ.
МҮЭ-ийн Соёлын Төв Ордны барилга байгууламж нь ЗХУ (хуучин нэрээр), БНМАУ (хуучин нэрээр)-ын засгийн газар хоорондын гэрээгээр Бүх Холбоотын ҮЭ-ийн хөрөнгөөр баригдаж, МҮЭ-ийн төв зөвлөлд бэлэглэсэн Оросын ард түмний бэлэг юм. Тус ордон 1975 онд ашиглалтанд орж, соёл урлагийн ажил үйлчилгээг өргөн олон нийтэд үзүүлж, соён гэгээрүүлэх үйл ажиллагааг өнөө хүртэл тасралтгүй 41 жил явуулж ирсэн мэргэжлийн соёлын байгууллага билээ. МҮЭСТО нь дээрх чиг үүрэгтэйгээр тасралтгүй 41 жил үйл ажиллагаа явуулж үзвэр үйлчилгээ, урлаг соёл, биеийн тамирын арга хэмжээнд олон нийтийг өргөнөөр хамруулж, нийт 18 сая гаруй хүнд үйлчилсэн байна.
МҮЭСТО байгуулагдсан цагаас эхлэн өнөөг хүртэл Соёл урлагийн мэргэжилтэн бэлтгэдэг их дээд сургуулиудын оюутны дадлагын бааз болж СУИС, Соёлын дээд сургуулиудтай хамтран ажилладаг юм. 1990-ээд оноос тус ордон зах зээлийн харилцаа, эрэлт хэрэгцээнд нийцүүлэн зорилго үйл ажиллагаа, бүтэц зохион байгуулалтыг шинэчилж соёл урлагийн салбарт анхдагч алхмуудыг хийсээр ирсэн билээ.
-
2016 оны 10 сарын 05
2016 онд улсын хэмжээгээр 377.2 мянган га-д үр тариа, үүнээс 355.3 мянган га-д улаанбуудай, 14.5 мянган га-д төмс, 8.2 мянган га-д хүнсний ногоо, 63.8 мянган га-д тосны ургамал, 28.0 мянган га-д тэжээлийн ургамал, 4.2 мянган га-д эмийн ургамал, нийтдээ 495.9 мянган га-д тариалалт хийсэн.Ургацын урьдчилсан балансаар 501.0 мянган тонн үр тариа, үүнээс 482.1 мянган тонн буудай, 174.7 мянган тонн төмс, 117.5 мянган тонн хүнсний ногоо, 32.5 мянган тонн тосны ургамал, 43.4 мянган тонн малын тэжээлийн ургамал тус тус хураан авахаар тогтоогдоод байна.
Өчигдрийн байдлаар 72.5 мянган га-г ангилан хадаж, нийтдээ 215.1 мянган га-гаас 324.9 мянган тонн үр тариа, 12.0 мянган га-гаас 126.8 мянган тонн төмс, 6.1 мянган га-гаас 72.5 мянган тонн хүнсний ногоо, 12.8 мянган га-гаас 28.5 мянган тонн тэжээлийн ургамал, 10.6 мянган га-гаас 5.1 мянган тонн тосны ургамал тус тус хураан аваад байна.
Ургац хураалтын ажилд 1150 гаруй цэргийн албан хаагч, 600 оюутан, 150 сурагч, нийтдээ 1900 хүн гэрээгээр ажиллаж байна.
-
2016 оны 10 сарын 05
Шинэ цагийн боловсрол үүсч хөгжсөний 95 жил, нийслэлийн Боловсролын удирдах байгууллагын 85 жил, Монголын багш нарын баярын 50 дахь өдрийн ойн баярын “Нийслэлийн боловсрол 85 жил” хүндэтгэлийн ажиллагаа боллоо. Хүндэтгэлийн ажиллагаанд БСШУС-ын сайд Ж.Батсуурь, нийслэлийн Засаг дарга бөгөөд Улаанбаатар хотын захирагч С.Батболд, Засаг даргын орлогч Ш.Анхмаа нар оролцлоо.
Засаг дарга С.Батболд “Миний бие 2016-2020 оны үйл ажиллагааны мөрийн хөтөлбөртөө багш нарын ажлын ачааллыг бууруулах, сургууль цэцэрлэгийн хүртээмжийг нэмэгдүүлэх, сургуулийн өмнөх насны хүүхдийг цэцэрлэгт бүрэн хамруулахад шаардлагатай бүхий л арга хэмжээ аван ажиллах болно гэдгээ тусгасан бөгөөд энэхүү ажлаа бүрэн хэрэгжүүлэх болно. Боловсролын салбартай хамааралгүй айл өрх нэгээхэн ч үгүй юм. Боловсролын салбарын үе үеийн удирдлага, ажилтан, албан хаагч, багш сурган хүмүүжүүлэгчид Та бүхний түүхэн гавьяаг үргэлж өндрөөр үнэлж ирсэн бөгөөд цаашид ч өндрөөр үнэлж байх болно. Та бүхэнд дахин баяр хүргэе” гэв.
Тус салбарынхан өнгөрсөн онд ажил хөдөлмөр, ур чадвараараа бусдыгаа манлайлан ажилласан “Шилдэг”-үүдээ тодруулан, шагнаж урамшууллаа. Баянгол дүүргийн “Оюуны ундраа” цогцолбор сургууль, Баянзүрх дүүргийн 48-р сургууль 2016 оны тэргүүний төрийн өмчийн сургуулиар, Сонгинохайрхан дүүргийн 111, Баянзүрх дүүргийн 115, Хан-Уул дүүргийн 65-р цэцэрлэг тэргүүний төрийн өмчийн цэцэрлэгээр шалгарсан бол 2016 оны тэргүүний төрийн бус өмчийн сургуулиар Баянзүрх дүүргийн “Их засаг” лицей сургууль, цэцэрлэгээр Хан-Уул дүүргийн “Номин” цэцэрлэг шалгарлаа. Мөн нийслэлийн Засаг даргын Тамгын газраас санаачлан дөрөв дэх жилдээ уламжлал болгон гардуулж байгаа “Боловсролд ээлтэй Засаг дарга” шагналаар нийслэлийн Чингэлтэй дүүргийн Засаг дарга Ж.Эрдэнэбатыг шагналаа. Засаг дарга Ж.Эрдэнэбатыг боловсролын салбарын хөрөнгө оруулалт, гадаад харилцаа, хамтын ажиллагааг дэмжиж ажилласанд нь талархаж энэхүү шагналыг олгож байгаа юм.
Мөн үе үеийн багш сурган хүмүүжүүлэгчдээс төрийн дээд шагнал “Алтан гадас” одон, Хөдөлмөрийн хүндэт медаль, “Боловсролын тэргүүний ажилтан” цол тэмдгээр тус бүр хоёр хүнийг, нийслэлийн Боловсролын газрын хүндэт тэмдэг, Шилдэг ажилтан, Багшийн алдар, Ахлах багш, Заах арга зүйчээр тус бүр нэг нэг хүнийг шалгаруулан шагнаж урамшууллаа гэж нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 10 сарын 05
Эх хүүхдийн эрүүл мэндийн үндэсний төвийн эмч нарын баг Сүхбаатар аймагт ажиллаж байна. Энэ үеэр эрүү нүүр, чих хамар хоолойн үзлэг оношилгоо эмчилгээ, шаардлагатай мэс заслуудыг орон нутагт үнэ төлбөргүй хийх гэнэ. Тус аймгийн хувьд эрүү нүүр, чих хамар хоолойн гажигтай хүүхдийн тоо бусад аймгуудтай харьцуулахад бага байдаг ч жилдээ нэгээс хоёр хүүхэд заавал ийм төрлийн хагалгаанд ордог аж. Аймгийн нэгдсэн эмнэлгийн эрүү нүүрний их эмчийн хяналтад байдаг 10 гаруй хүүхдийг нэн түрүүнд үзлэгт хамруулж, хагалгаанд оруулахаар болжээ. Мөн энгийн хүүхдүүдийг ч урьдчилан сэргийлэх үзлэгт хамруулна.
Б.Цэцэг
-
2016 оны 10 сарын 05
Шүүх хараат бус байх ёстой ч Монгол Улс сүүлийн жилүүдэд тус байгууллагад нэг тоосго ч нэмж барих төсөвгүй болжээ. Нурах аюултай, хөгц мөөгөнцөрт баригдсан, актлагдсан байшинд үйл ажиллагаа явуулж байгаа шүүхүүд олон гэдгийг салбарынхан нь онцолж байна. Мөн орон нутгийн шүүхүүд үйл ажиллагаа явуулах өөрсдийн гэсэн байр байхгүй 20 гаруй жилийн нүүрийг үзжээ. Тодруулбал, Дархан-Уул аймаг дах анхан шатны шүүх ОХУ-ын Ерөнхийлөгчийн хэрэг эрхлэх газрын газрын “Хилийн чанад дахь өмчийн удирдах үйлдвэрийн газар”-ын байрыг түрээсэлж үйл ажиллагаа явуулаад удаж байгаа аж. ОХУ-ын хилийн чанад дахь өмчийн удирдах үйлдвэрийн газрын байрыг Монголын аж ахуйн нэгжүүд түрээсэлсэнтэй холбоотой маргаантай хэрэг жилд 10 гаруй удаа гарч, тус шүүхээр шийдүүлдэг. Харин зарим хэргийн оролцогчид танайх өөрсдөө түрээсийн байранд байж, энэ хэргийг хөндлөнгийн нөлөөлөлгүй шийдэж чадах уу хэмээн ам асуух тохиолдол ч гардаг гэнэ.
Сэлэнгэ аймгийн Сайхан суман дахь сум дундын шүүх, шүүх хуралдааны ганц танхимтай. Шүүх хуралдааны танхим нь прокурорын байранд байрладаг төдийгүй шүүгч нар зөвлөлдөх тасалгаандаа орохдоо түр саатуулах өрөөгөөр дамждаг аюултай нөхцөлд шүүн таслах ажиллагааг явуулдаг гэлээ. Шүүхийн бие даасан хараат бус байдал, шүүгчийн аюулгүй байдал алдагдаж болзошгүй хүндхэн нөхцөлд Монголын шүүгч нар ажиллаж байгаа хоёрхон жишээг дурдахад ийм байна. Цаашид шүүхийн хөрөнгө оруулалтад анхаарахгүй бол шүүх засаглалын хараат бус байдал, шүүгчийн амь насанд ч халгаатай нөхцөл байдал бүрдээд байгааг салбарынхан мэдээллээ.
-
2016 оны 10 сарын 05
Гарчиг: Аймгийн төвийн эмнэлэгт анхаарлаа хандуулах цаг нь болжээ
Өнөөдрийн байдлаар Нэгдсэн эмнэлэгт 65 их эмч, 156 сувилагч, тусгай мэргэжилтэн, 136 туслах ажилчин, нийтдээ 357 ажиллагсадтайгаар аймгийн иргэдэд эмчилгээ, үйлчилгээ үзүүлж байгаа талаар эмнэлгийн дарга Т.Ганбямба танилцууллаа. Тус эмнэлэг 14 тасаг нэгжтэй, амбулторийн эмчилгээ, үйлчилгээг жилд дунджаар 89000 гаруй иргэн авдаг бол нийт 224 ортой хэвтэн эмчлүүлэх тасгуудад жилдээ 9280 орчим үйлчлүүлэгч хэвтэн эмчлүүлжээ. Тус эмнэлгийн дарга Т.Ганбямба төрөх тасгийн барилгад сүүлийн 25 жил их засвар хийгдээгүй болохгүй дуулгаж, уг асуудлыг шийдвэрлүүлэхийг хүслээ. Нэгдсэн эмнэлгээс жилд 1562 иргэн 13А маягтаар гуравдугаар шатлалын эмнэлэгт үзүүлэхээр Улаанбаатар хотыг зорьдог байна. Үүний 60 хувь буюу 1000 орчим иргэн ердөө компьютер томограф аппаратаар оношлогоо хийлгэхээр явдаг аж. Түүнчлэн Архангай аймаг нь элэгний С вирусээрээ улсад дээгүүр бичигддэг болохыг УИХ-ын гишүүн Ё.Баатарбилэг онцлов. Иймд аймгийн төвийн эмнэлгүүдэд компьютер томографф шаардлагатайгаас гадна эмч, ажилтнуудыг илүү мэргэшүүлэх чухал болохыг онцоллоо.
Б.Цэцэг
-
2016 оны 10 сарын 05
Авлигатай тэмцэх газар 2016 оны 9 дүгээр сарын 26-30-ны өдрүүдэд нийтийн албанд томилогдохоор нэр дэвшсэн 311 иргэний хувийн ашиг сонирхлын урьдчилсан мэдүүлгийг шинээр хүлээн авчээ. Нийт 618 урьдчилсан мэдүүлгийг хянан шалгасан байна.
Өнгөрсөн долоо хоногт 297 мэдүүлгийг хянан шийдвэрлэсэн бөгөөд үүнээс 251 нь зөрчилгүй байсан бол 9-ийг нь буцааж, 37-г нь анхааруулсан байна. Одоогийн байдлаар 321 урьдчилсан мэдүүлэг ажиллагаанд хянагдаж байна. Ашиг сонирхлын илт зөрчилтэй гэж үзсэн урьдчилсан мэдүүлэг байсангүй.
Нийслэлийн газрын албаны орлогч даргаар томилогдохоор нэр дэвшсэн Д.Нямдаваа, Баянгол дүүргийн Газрын албаны даргаар томилогдохоор нэр дэвшсэн Г.Мөнхбаатар, Сонгинохайрхан дүүргийн Газрын албаны даргаар томилогдохоор нэр дэвшсэн Б.Алтанхундага нарын зэрэг 251 иргэний хувийн ашиг сонирхлын урьдчилсан мэдүүлгийг хянан үзээд тухайн албан тушаалд томилоход ашиг сонирхлын зөрчил үүсэх нөхцөл байдал тогтоогдоогүй гэж үзсэн байна.
Томилсон тушаал, захирамжийг хүчингүй болгуулах, ангилал зэрэглэл хамаарахгүй, хуулийн үйлчлэлд хамаарагдахгүй, орон нутгийн ИТХ-ын төлөөлөгчөөр сонгогдсон зэрэг үндэслэлээр 9 иргэний хувийн ашиг сонирхлын урьдчилсан мэдүүлгийг буцаажээ.
Ашиг сонирхлын зөрчилтэй гэж ойлгогдохуйц нөхцөл байдал бий болсон, ашиг сонирхлын зөрчилтэй нөхцөл байдлыг тогтоож анхааруулсан, ашиг сонирхлын зөрчил үүсэх нөхцөл байдал бий болсныг анхааруулсан, ажлын байрны тодорхойлолт болон хуульд заасан шаардлага хангаагүй зэрэг үндэслэлээр 37 иргэний урьдчилсан мэдүүлэгт анхааруулсан хариу өгсөн байна.
Өнгөрсөн долоо хоногт хянан шалгасан урьдчилсан мэдүүлгийн дийлэнх нь Төрийн өмчийн бодлого, зохицуулалтын газар, Төрийн банк, Эрүүл мэнд, нийгмийн даатгалын ерөнхий газар, Цагдаагийн ерөнхий газар, Улаанбаатар хотын зам засвар арчлалтын газар зэрэг байгууллагаас ирүүлсэн байв.
-
2016 оны 10 сарын 05
Сүүлийн өдрүүдэд аймаг орон нутгаас хүмүүс ой модонд төөрч сураггүй болсон талаарх мэдээлэл цөөнгүй ирэх болсон байна. Тодруулбал, өчигдөр буюу 2016.10.04-05-нд шилжих шөнө гэхэд Булган аймгийн Хангал сумын Сөрт багийн Бүрэнгийн нуруу гэдэг газарт иргэн Б /44 настай, эрэгтэй/ самранд яваад сураггүй боллоо гэсэн мэдээлэл иржээ. Иргэн Б аравдугаар сарын 04-ний өдрийн 09.00 цагийн орчимд самранд явж байгаад модон дунд төөрч алга болжээ. Мөн өдөр Булган аймгийн Сэлэнгэ сумын Ингэт багийн Хантайн баруун бэлсэг гэдэг газарт иргэн Б /50 настай, эмэгтэй/ 18 цагийн орчимд жимс түүж яваад модон дунд төөрч сураггүй болсон байна. Дээрх мэдээллийн дагуу аймгийн ОБГ-ын ажилтан аврагч нар эрэл зохион байгуулж эхэлжээ. Одоогоор төөрсөн иргэдийг олоогүй аж.
-
2016 оны 10 сарын 05
ШЕЗ-ийн гүйцэтгэх нарийн бичгийн дарга Т.Мэндсайханыг Авлигатай тэмцэх газраас шалгаж эхэлжээ. АТГ-ын Хяналт шалгалт, дүн шинжилгээний хэлтэст Авлигын эсрэг хуулийн 9 дүгээр зүйлийн 9.2, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 26 дугаар зүйлийн 26.4 дэх хэсгийг үндэслэн Төрийн албаны зөвлөлийн Шүүхийн ерөнхий зөвлөлийн дэргэдэх салбар зөвлөлөөс ирүүлсэн гомдлыг хянан шалгаж байна. Уг гомдолд Шүүхийн ерөнхий зөвлөлийн Гүйцэтгэх нарийн бичгийн дарга Т.Мэндсайханы авлига, ашиг сонирхлын зөрчлийн эсрэг хууль тогтоомж зөрчсөн асуудлын талаар дурджээ.
-
2016 оны 10 сарын 05
Хүүхдийн мөнгийг хоёр сараар нь олгож эхэллээ
Сангийн яамнаас нийт хүүхдийн 60 хувьд бэлнээр олгох 20 мянган төгрөгийг өчигдөр шилжүүлж эхэллээ. Гэхдээ хүүхдүүдийн дансанд гурван сарын 60 мянган төгрөг бус нэг сарын 20 мянган төгрөг л орсон тухай иргэд мэдээлж байна. Энэ талаар албанхан ”Долоо, найм, есдүгээр сарын хүүхдийн мөнгийг олгож эхэлж байна. Энэ сарын 04-ний өдрийн байдлаар долдугаар сарын хүүхдийн мөнгөний санхүүжилт өчигдөр оройноос банкуудаар дамжин хүүхдийн дансанд орж байгаа. Энэ долоо хоногтоо багтан найм, есдүгээр сарын мөнгө орж дуусна” гэжээ.
-
2016 оны 10 сарын 05
Авто машины нээлттэй дуудлага худалдаа болно. Гаалийн хууль тогтоомж зөрчсөний улмаас хураагдаж, улсын орлого болгохоор 19 автомашиныг энэ сарын 13-нд нээлттэй дуудлага худалдаагаар борлуулахаар болжээ. Энэхүү дуудлага худалдааг Гаалийн ерөнхий газраас зохион байгуулж буй. Оролцогчдыг тус өдөр 8.30 цагаас бүртгэж, 9.30 цагт дуудлага худалдаа эхлэх юм байна.
Дуудлага худалдаанд 1997-2006 онд үйлдвэрлэсэн ”Volkswagen”, ”Toyota”, ”Nissan”-ы автомашинуудыг 360 мянгаас есөн сая хүртэл төгрөгөөр худалдах суурь үнийг тогтоожээ.
Б.Цэцэг
