Монгол Улсын Ерөнхийлөгчийн долоо дахь удаагийн сонгуулийн санал хураалт өчигдөр болж өндөрлөлөө. Гэсэн ч нэр дэвшигчид 50+1 санал аваагүй тул дахин санал хураалт явуулахаар болоод буй. Эхний санал хураалтаар Х.Баттулга 517478, М.Энхболд 411748, С.Ганбаатар 409899 санал авч, АН-аас нэр дэвшигч Х.Баттулга илүүрхээд байгаа юм. Тэгвэл санал хураалт дууссан дараа намууд ямар байр суурь илэрхийлснийг багц 24 буландаа онцолж байна. Тухайлбал олонхийн саналыг аваад буй АН-ын нэр дэвшигч өөрийгөө дэмжсэн хүмүүст талархал илэрхийлсэн бол МАХН-ынхан СЕХ-г зориудаар сонгогчдын саналыг будилуулж байна хэмээн мэдээлсэн. Харин эрх баригч хүчин одоогоор ямар нэгэн мэдээлэл хийгээгүй байгаа юм. Ингээд намуудын байр суурийг хүргэж байна.
Монгол Улсын Ерөнхийлөгчийн сонгуульд одоогийн байдлаар хамгийн олон санал аваад буй Ардчилсан намаас нэр дэвшигч Х.Баттулга, Ардчилсан намын дарга С.Эрдэнэ нар сонгуулийн санал хураалтын дараа мэдээлэл хийв. Мэдээллийн эхэнд намын дарга С.Эрдэнэ АН-ыг дэмжиж саналаа өгсөн гадаад, дотоодын нийт иргэддээ талархал илэрхийлсэн. Харин нэр дэвшигч Х.Баттулга “Монгол ялна” уриагаар намайг дэмжсэн бүх хүмүүстээ баярлалаа гээд дараагийн шатны санал хураалтын товыг Сонгуулийн Ерөнхий хорооноос зарлах байх. Тиймээс Монгол ялна гэдэг уриагаа дахиад хэлье” гэлээ.
Санал хураалтын урьдчилсан дүнгээр Х.Баттулга тэргүүлж байгаа бөгөөд урьдчилсан дүнгээр 517478 хүний санал аваад байна.
Сонгуулийн үйл явцын талаах МАХН-аас шуурхай мэдээлэл хийж тус сонгуулийн штабын дарга Ц.Оюунбаатар “СЕХ бидэнтэй уулзахгүй байна. Сонгуулийн хэсгийн хороон дээр гарсан талонууд цагаараа хэвлэгдсэн байх ёстой. Цагтаа хэвлэгдээгүй бол луйврын нотолгоо. СЕХ Ерөнхийлөгчийн үе үеийн сонгуулийг будлиантуулдаг байдлаа зогсоох хэрэгтэй. Сонгуулийн дүн гаргах үйл ажиллагаа удааширж чирэгдэж байна. Энэ хугацаанд ноцтой нөхцөл байдал гарч болзошгүйг манай сонгуулийн штаб болон иргэд бухимдаж байна. Энэ асуудлаар СЕХ-ны удирдлагуудтай уулзая гэсэн боловч уулзахгүй байна. Сүүлийн хэдхэн минутын дотор МАН 10 гаруй мянган саналыг авч байгаа нь сонгуулийг луйвардах байдал явж байна. Сонгуулийг шударга явуулах бүх үйл ажиллагаанд хяналт тавьж тооллогыг ил тод байлгах хэрэгтэй” гэлээ.
Монгол Улсын Ерөнхийлөгчийн долоо дахь удаагийн сонгуулийн санал хураалт өндөрлөж, СЕХ-оос мэдээлэл хийв. Сонгуулийн Ерөнхий Хорооны дарга Ч.Содномцэрэн “Монгол Улсын хэмжээнд сүлжээнд холбогдоогүй 200 гаруй санал авах байр байна. Тэгэхээр ойр сүлжээтэй газар машинаар очиж, дүнгээ дамжуулах, хол хэсэг нь маргааш өглөө нь дүн мэдээгээ ирүүлдэг гэдгийг ойлгох хэрэгтэй. Монгол Улсын хэмжээнд бүх аймгийг сүлжээнд холбогдож амжаагүй байна. Сумын хэмжээнд сүлжээнд холбогдсон. Багийн хэмжээнд холбогдож амжаагүй байна. 1983 хэсэг байгаа гэж зарласан. Гадаадад байгаа сонгогчдын тооллогыг 1984-р хэсэг тоолж байна. Санал тоолох 10 машиныг тавьсан. 4800 гаруй хүний саналыг тоолж байгаа" гэлээ.
Энэ удаагийн сонгуулиар "Дахин сонгууль болохгүй, дахин санал хураалт гэж бий. Үндсэн хууль нь нэр дэвшигчдийн хэн нь ч олонхийн санал авч чадаагүй бол дахин санал хураана гэж бий. Сонгуулийн Ерөнхий Хороо 14 хоногийн дотор товыг зарлана. Олонхийн санал нь 50 хувь нэмэх нь нэг юм. Хамгийн олон санал авсан хоёр нэр дэвшигчийг хоёр дахь санал асуулгад оруулна. Хоёр дахь санал хураалтад олонхийн санал авсан нэр дэвшигчийг Монгол Улсын Ерөнхийлөгч гэж үзнэ" гэдгийг тодотгов.
Сэтгэгдэл (20)