НИТХ ажлаа хийж чадахгүй байна. 60 тэрбумын хэргээр Ц.Сандуйг яах гэж “унагаасан” юм гэж байгаа мэт албан тушаалын төлөөх тэдний арсалдаан НИТХ-ыг ажилгүй болгоход хүргэв. Ингэж гацааж байгаа шалтгаан нь энгийн, зохион байгуулж буй хүмүүс нь тодорхой.
Ц.Сандуйг НИТХ-ын даргын албан тушаалаа өгөхөд нь М.Энхболдын хотод дахь хаанчлал төгслөө хэмээн олон хүн сэтгэгдэлээ бичиж байсан. Үнэндээ Ц.Сандуй УИХ-ын дарга М.Энхболдын гарын хүн гэдэг нь хэнд ч тодорхой. Түүний ажил амьдралын гараа, М.Энхболдын бизнестэй нягт уялдаатай байдаг. Тиймдээ ч Ц.Сандуйг буухад М.Энхболдыг ийн дурссан хэрэг. Гэвч баас хэдий хатавч өмхийгөө тавихгүй гэгчээр Ц.Сандуй хэдий буусан ч өөрийн орондоо өөр нэг өөрийн хүнээ тавих гэсэн санаархал нь нийслэлчүүдийг зутруулж мэдэх нь. Зөвхөн энэ албан тушаалын төлөө НИТ-ийн хоёр хурлыг тасдуулж дөнгөв. Нийслэлд тулгамдсан асуудал их байна. 2018 оны үндсэн чиглэлийг 10 дугаар сарын 05-ны дотор нийслэлийн Засаг дарга өргөн бариад бид хэлэлцэх ёстой. НИТХ-ын XI хуралдаанаар энэ асуудлыг хэлэлцэх ёстой байтал хуралдаан хаахгүй, нийслэлчүүдэд зориулсан бодлого гаргах боломжийг эрх баригч нам өгөхгүй байгаа нь хэний буруу вэ. Нийслэлийн жижиг дунд үйлдвэрлэлийг дэмжих төвийн дарга Д.Баярсайхан хэмээх ноёны бөхтэй өрсөлдөж буй С.Амарсайханы буруу юу.
НИТХ-ын даргад эхэндээ гурван хүн өрсөлдөх сураг байсан. Түүний нэг нь Ж.Батбаясгалан. Гэвч тэрбээр хурлын өмнөх нь өөрийн нэрээ татсан нь намаас нэр ирсэнтэй холбоотой. Өөрөөр хэлбэл МАН-ын дарга М.Энхболд нэг ангийн охин гэх Д.Баярсайханыгаа ногоон гэрлээр зүтгүүлсэн хэрэг. НИТХ дахь МАН-ын бүлэг ч ноёынхоо үгээр орж, ганцхан түүнийг нэр дэвшүүлсэн ч Ц.Сандуй, М.Энхболд нараас залхсан хэсэг нөхөд нь С.Амарсайханыг нэр дэвшүүлсэн нь ийнхүү тэдний төлөвлөгөөг баллаж орхижээ.
С.Амарсайхан ч энэ хугацаанд багагүй дарамтад орсон тухай ам алдаад авна билээ. "Энэ завсарлага авч байгаа байдал өнгөрсөн жил гаруйн хугацаанд нийслэлийн ажил яг ийм байдалтай явж ирсэн гэдгийг харуулж байна. Хуулиараа хоёр нэр дэвшигчийг эгүүлэн татах зүйл заалт байхгүй. НИТХ-ын даргад нэр дэвшигчдийн дунд эхлээд санал хураана. Тэнцвэл дахин санал хураана. Бүлгийн хурлаар хуулийн буруу зөв эсэх, нэрээ татах тухайд ярилаа. Нэрээ татаж хуулиас гадуур үйлдэл хий гэж шахаж байна. НИТХ дахь МАН-ын бүлгийн хурлыг зохих хэмжээнд явуулж чадахгүй байгаагаас үүдэж, завсарлага авч байна гэж ойлгож байгаа. НИТХ дахь МАН-ын бүлгийн хурал гэр бүлийн хурал шиг болсон. Би нэрээ татахгүй" хэмээн мэдэгдсэн нь М.Энхболд, Ц.Сандуй нар хотын эрх мэдлээ алдахгүйн тулд хэрхэн улайрч байгааг илчилсэн хэрэг.
НИТХ дахь МАН-ын бүлгийн дарга Ч.Мөнхчулууны ярьж байгаагаар Дээд шүүхийн тайлбартай холбоотой хуулийн маргааныг тэд хэлэлцэх гэнэ. Учир нь залуу хуульчдын клубээс албан бичиг ирсэн юм байх. “Нэгжийн тухай хуулийн 11.4, 11.5 дугаар заалтын дагуу хамгийн олон санал авсан хоёр төлөөлөгчийг дахин санал хураалтад оруулна гэж байгаа. Харин Дээд шүүхийн тайлбар дээр 11.4, 11.5 дугаар заалтын дагуу нэр дэвшигчдийн хэн нь ч олон санал аваагүй бол хоёр нэр дэвшигчийг дахин санал хураалтад оруулахгүй гэж заасан. Үүнээс үүдэн бүлэг дээр хоёр талын байр суурь байгаа” гэжээ. Түүний ярианы битүү утга хэрэв Д.Баярсайхан үгүй юм бол өөр нэгнийг НИТХ-ын даргад зүтгүүлнэ хэмээн ойлгогдож эхлэв. Энэ мэхээрээ С.Амарсайханыг ч мөн унагаж, дараагийн удаа араандаа баттай гэгч нь хийх санаархал агуулж байж ч мэдэх. Тэгэхээр МАН-ын тав хоногийн завсарлага НИТХ-ын даргад тохирох өөр нэгэн хүнийг гаргаж ирэх зорилготой юу гэдгийг ирэх өдрүүдийн улстөрийн өнгө харуулах биз.
Б.Өрнөх
Сэтгэгдэл (49)