Ээлжит сонгуулийн үр дүнгээр байгуулагдсан УИХ-д МАН үнэмлэхүй олон суудал авсан. Бусад улс төрийн хүчнүүдээ далаар нь цэвэр дарсан гэхэд болно. Хууль тогтоох байгууллагын 76 суудлын 65-ыг эзэгнэх тус намынхан өнөөдөр тийм ч сайн ажиллахгүй байгааг хэн хүнгүй хэлж байна. Тиймээс парламент дахь сөрөг хүчний зүгээс “Сүүдрийн Засгийн газар” байгуулах ажилд ханцуй шамлан оржээ. Ийнхүү Монгол Улс албан болон албан бус хоёр засаглалын тогтолцоотой болж байгаа аж.

УИХ дахь цөөнх буюу АН-ын зүгээс үүнийг тайлбарлахдаа сөрөг хүчний хяналт, алдааг залруулах алхам хэмжээн ярьж байна. Тэд МАН-ын хийж буй зөв үйлдлийг дэмжиж, алдааг нь засч залруулах бодлого барих нь. Гэхдээ алдаагаа ухамсарлахгүй бол алганы амт ч үзүүлж магадгүй биз.

АН ийм алхам хийж байгаа нь цаанаа учиртай гэх нэгэн ч байна. Өөрөөр хэлбэл, намын дотоод дахь тэмцлээ цэглэж, дүрмийн шинэчлэл, намын даргаа солих хүртэл алхмыг хийгээд амжсан. Өнгөрсөн он жилүүдэд алдаж байсан зүйлээ зассан гэж тэд үзэж байгаа юм. Үндсэндээ биеэ засчаад, гэрээ янзалчихсан гэсэн үг бололтой. Тиймээс одоо төрөө засч, түмэн олноо ядуурлаас аварч, санхүү эдийн засгийн хүндрэлийг давах гарц гаргалгааг гаргах зорилгоор албан ёсны засаглалын сүүдэрт хувийнхаа Засгийн газрыг байгуулж буй юм гэнэ.

Магадгүй өдгөө сэхээний орон дээр сэрэх үгүйгээ мэдэхгүй хэвтэн байгаа Монгол Улсын эдийн засгийг аврах эм танг ч найруулахыг үгүйсгэхгүй. Гэхдээ МАН парламент дахь 65 суудлаараа далайлган сөрөг хүчин оноо алдахгүй хэмээн гүрийх биз. Мөн АН-ын дэвшүүлсэн санааг дэмжээд явбал дараа дараагийн сонгуульд ялалт байгуулах магадлал багасна. Тиймээс сөрөг хүчний саналыг сонсч, үгийг авна гэдэг “лөөлөө” байх. Харин үүний хариуд АН ах намын “хонгонд” халуун, хүйтэн гэх мэт жин тавьж эхлэх нь гарцаагүй. За ингэснээр цусгүй, үзэн ядалт, өшөө хорслын тулаан өрнөнө дөө. Юун зөвлөгөө өгч муулахгүй гэсэн асуудал таг мартагдана.

Хэн нь хэнтэйгээ муудалцах, маргалдах иргэдэд сонин биш, өнөөдөр. Ганцхан албан ба албан бус засаглалынхны гаргах шийдвэр эмчилгээгээ хүлээн эрлэгийн хаалга тогшин байгаа эдийн засгийг аварч, иргэдийн амьжиргааг дээшлүүлэх чухал. Ямартай ч ах дүү намууд тус тусын засаглалын дэглэм, тоглоом тоглохоор болж байна. Цаашид эдийн засагт ямар хэмжээний эм тан бэлдэж, эмчилгээ нь үр дүнгээ өгөх эсэх нь сонирхол татна.