Дорноговь аймгийн прокурорын газраас санаачлан Аймгийн цагдаагийн газрын сумдын хэсгийн төлөөлөгч, хэсгийн байцаагч нарын хамтарсан зөвлөгөөнийг 2015 оны 04 дүгээр сарын 17-ны өдөр  зохион байгуулсан байна.

Энэхүү арга хэмжээнд аймгийн прокурор хууль цаазын итгэмжит зөвлөх С.Цэрэнсамбуу Цагдаагийн байгууллагаас хорихоос өөр төрлийн ял шийтгүүлсэн ялтны ялын биелэлтэнд хяналт тавихад анхаарах асуудал, дээрх төрлийн ялаар шийтгүүлсэн этгээд захиргааны зөрчил гаргасан тохиолдолд материалын бүрдүүлбэрийг сайтар хангаж ялыг солиулахаар шүүхэд шилжүүлж байх талаар болон гэмт хэргийн талаархи гомдол мэдээллийг хүлээн авч 5 хоногт шуурхай шалгаж шийдвэрлэж байх, хэрэг бүртгэх эрх бүхий албан тушаалтнуудаас эрүүгийн хэрэг бүртгэх ажиллагаанд Эрүүгийн байцаан шийтгэх хуулийг нэг мөр  хэрэгжүүлэх, аливаа төрлийн эрүүдэн шүүх ажиллагаа гаргахгүй ажиллах, тухайн орон нутагт гэмт хэргээс урьдчилан сэргийлэх чиглэлээр сумын засаг дарга, Гэмт хэргээс урьдчилан сэргийлэх салбар зөвлөлтэй хамтран ажиллаж гэмт хэрэг зөрчлийн гаралтыг бууруулах, таслан зогсоох, урьдчилан сэргийлэх чиглэлээр бодитой ажил хийж хэрэгжүүлэх талаар дэлгэрэнгүй заавар, чиглэл өгчээ.

Мөн аймгийн прокурорын газрын ял эдлүүлэх ажиллагаанд хяналт тавих хянлтын прокурор Ж.Айжуу Цагдаагийн байгууллагаас “Хорих ялаас хугацааны өмнө тэнсэн суллагдсан болон ял нь тэнсэгдсэн, шүүхийн шийтгэх тогтоол биелүүлэхийг хойшлуулсан этгээдэд хяналт тогтоож байгаа байдал цаашид  анхаарах асуудал”, “Тэнсэгдсэн ялтан, ял хойшлогдсон болон эрх хасах ялаар шийтгүүлсэн этгээдийн ял эдлэлтийн байдалд гарч байгаа зөрчил түүнийг шийдвэрлэх арга зам”  зэрэг сэдвүүдээр мэдээлэл хийж  хэсгийн төлөөлөгч, хэсгийн байцаагч нараас шүүхээс хорихоос өөр  төрлийн ял шийтгүүлсэн этгээдийн ялын биелэлтэнд тавих хяналтыг сайжруулахад анхаарах асуудлаар зөвлөгөө  өгсөн нь үр дүнтэй болжээ.

Энэ арга хэмжээнд цагдаагийн байгууллагын бүх сумдын хэсгийн төлөөлөгч, хэсгийн байцаагч зэрэг 20 гаруй хүнийг хамруулсан байна.