Нийслэлийн Засаг дарга бөгөөд Улаанбаатар хотын захирагчийн 2013-2016 оны үйл ажиллагааны хөтөлбөрт заагдсан гэр бүлийн хүчирхийлэл, ахуйн хүрээнд үйлдэгддэг гэмт хэргээс урьдчилан сэргийлэх, иргэдийн идэвхи, санаачлагад суурилсан "Хөршийн хамгаалалт" амгалан тайван байдлын тогтолцоог бүрдүүлэх ажлын хүрээнд Улаанбаатар хотын цагдаагийн газраас холбогдох албадтай хамтран “Хөршийн хяналт” холбоо хөтөлбөрийг туршилтын журмаар Нийслэлийн 30 хороонд энэ оны дөрөвдүгээр сараас эхлүүллээ.

Өнгөрсөн 7 хоногийн амралтын өдрөөр Улаанбаатар хотын цагдаагийн газар, Баянзүрх дүүрэг дэх цагдаагийн хоёрдугаар хэлтэс төрийн болон төрийн бус байгууллагатай хамтран Баянзүрх дүүргийн 26 дугаар хороо, Баянмонгол хорооллын төв талбайд "Хөршийн хамгаалалт" уулзалт, өдөрлөгийг зохион байгууллаа. Өдөрлөг, уулзалтад оролцсон хорооны 100 гаруй оршин суугч иргэд, СӨХ, Хамгаалалтын ажилтнуудад хөршийн хамгаалалтын үйл ажиллагааны журмын талаар ойлголт өгч, гадаад улс орнуудын хөршийн хяналтын үйл ажиллагааны мэдээллийг хүргэж, санал, хүсэлтийг нь хүлээн авлаа.

Д.Ундрах /24tsag.mn/