Азийн хөгжлийн банкны дэмжлэгтэй Төв Азийн бүс нутгийн эдийн засгийн хамтын ажиллагаа /CAREC /-ны хөтөлбөрийн Тээврийн салбарын зохицуулах хорооны 14 дэх удаагийн хурлыг өнгөрсөн дөрөвдүгээр сарын 28-29-ний өдрүүдэд Улаанбаатар хотноо Зам, тээврийн яам, Азийн хөгжлийн банктай хамтран зохион байгууллаа. Энэ онд зохион байгуулагдах Төв Азийн бүс нутгийн эдийн засгийн хамтын ажиллагааны хөтөлбөрийн хурлуудыг Монгол Улс даргалагч орны хувьд зохион байгуулж буйгаараа онцлог болж байна.
Энэхүү хурлаар:
Тээврийг хөнгөвчлөх 2020 стратегийн хүрээнд хийгдсэн ажлын үр дүн, цаашид хэрэгжүүлэх арга хэмжээ,
CAREC-ийн орнууд хамтран харилцан уялдаатайгаар төмөр замын коридорыг хөгжүүлэх,
Автозамын тээврийн коридоруудын аюулгүй байдал
Улс хоорондын тээвэрлэлтийн үйл ажиллагааг хөнгөвчлөх
Автозамын өмч хөрөнгийн менежмент, автозамын засвар арчлалт зэрэг асуудлын талаар хэлэлцлээ.
Уулзалтын үр дүнд CAREC-ийн гишүүн орнуудын төмөр замын коридорыг хөгжүүлэх нь нэн чухал болохыг онцлон тэмдэглэж энэ хүрээнд 2050 он хүртэл төмөр замын сүлжээг хөгжүүлэх төлөвлөгөө, төмөр замын туршилтын коридорыг хөгжүүлэх боломжууд, төмөр замын салбарт үйл ажиллагаа явуулж буй байгууллагуудын хамтын ажиллагааг хөгжүүлэх чиглэлээр хэлэлцэж төмөр замын коридорыг хөгжүүлэх стратеги боловсруулахаар болж ирэх зургаадугаар сард Бангкок хотод болох Удирдах ажилтны хурлаар танилцуулахаар боллоо.
Мөн авто замын тээврийн аюулгүй байдлыг хангах хүний амь эрсдэхээс сэргийлэх, 2020 он гэхэд тээврийн ослыг 50 хувь буруулах зорилгоор CAREC-ийн гишүүн орнуудын автозамын корридорын аюулгүй байдлыг хангах 10 үйл ажиллагааны Сайд нарын тунхаглалыг ирэх есдүгээр сард Улаанбаатар хотод зохион байгуулагдах Тээврийн зохицуулах хорооны Сайд нарын хурлаар баталгаажуулахаар боллоо.
Монгол Улс CAREC-ийн Тээвэр болон худалдааг хөнгөвчлөх 2020 он хүртэл баримтлах стратегиар тодорхойлсон 3 үндсэн чиглэлийг баримтлан, дэмжиж ажиллахаа илэрхийлж бусад гишүүн орнуудтай хамтран хэрэгжүүлэх тээвэр, худалдаа, эдийн засгийн харилцан ашигтай хамтын ажиллагааг бэхжүүлэн хөгжүүлж ажиллахаа илэрхийллээ.
Тус хурлын хажуугаар өнгөрсөн дөрөвдүгээр сарын 27, 30-ны өдрүүдэд Тээврийн салбарын тэр дундаа улс хоорондын тээврийг хөнгөвчлөх, автозамын хөрөнгийн менежмент болон засвар арчлалтын талаарх сургалтыг мөн зохион байгуулж бусад орнуудын туршлага, амжилтаас суралцаж, харилцан мэдээлэл солилцон, алдаанаас зайлсхийх арга замыг эрэлхийлж, цаашид хамтран ажиллах боломж, чиглэлээ тодорхойлохоор зөвлөлдлөө гэж Зам, тээврийн яамны хэвлэлийн мэдээллийн албанаас мэдээлэв.
