“Тэнгэр трейд” ХХК-ийн импортын бүтээгдэхүүн болох “Урбаник”-ын сармисан дотроос ялаа гарсан талаар бид өмнө нь мэдээлсэн. Гэхдээ лац, ломбыг нь огт хөдөлгөөгүй сармис дотор шүү. Тэгэхээр уг бүтээгдэхүүнийг задлаад хэн, нэгэн нь ялаа хийгээгүй гэсэн үг юм. Манай сайт уг мэдээллийг сэрэмжлүүлэг болгож гаргасаны дараагаар тус компанийн хуулийн зөвлөх эмэгтэй бидэнтэй холбогдож “Танай байгууллагыг шүүхэд өгөх гэж байна. Танай хаяг хаана байдаг юм” хэмээн ёс суртахуунгүй авирлав.

Үнэхээр өөрсдийнх нь импортоор оруулж ирсэн бүтээгдэхүүн дотор ялаа хөвж байгаа нь нүдэн дээр ил байхад сэрэмжлүүлэг мэдээллийг түгээсэн биднийг шүүхэд өгнө хэмээн дарамталж буй нь тус байгууллагын хэрэглэгчдээ хүндэтгэдэггүй бас ёс суртахууны над захын хэм, хэмжээгүй гэдгийг харуулж байна.

Өнөөгийн ардчилсан нийгэмд хууль шүүхийн байгууллага хэн бүхэнд нээлттэй. Үнэхээр өөрсдийгөө буруугүй хэмээн үзэж байгаа бол хуульч хүн өөрөө бүхнийг судалж үзээд шүүхэд хандах учиртай байлтай. Гэтэл мэдээлэл гарсны дараа утас цохиж биднийг сүрдүүлж, заналхийлж байгаа гэлтэй ойлгогдож байгааг нуух юун.

1990 он Монгол Улс зах зээлийн нийгэмд шилжиж эхлэсэн тэр цагаас л “Тэнгэр”-ийнхэн үйл ажиллагаагаа эхлүүлсэн байдаг бөгөөд манай томоохон компаниудын нэг. Гэтэл импортын бараа нь ялаатай байхад ингэж авирласанд үнэхээр харамсах сэтгэлийг төрүүлж, үйлчлүүлэгч нарыгаа мөн бидний ажлыг үл хүндэтгэж буй илтгэж байна.

Хүнсний аюулгүй байдал гэдэг манай улс шиг цөөн хүн амтай оронд маш чухал сэдэв яахын аргагүй мөн. Үүнтэй маргах хүн үгүй биз.

“Тэнгэр трейд”-ийн ялаатай сармисны ард хүний амь нас, эрүүл мэнд байгаа гэдгийг ухамсарлах учиртай. Энэхүү сармис нь хэдий импортын бүтээгдэхүүн ч гэлээ мэдээж чанар аюулгүй байдлыг нь тухайн оруулж ирсэн байгууллага, аж ахуйн нэгж хангах ётой. Тиймээс ч мэргэжлийн байгууллагын шат шатных нь зохих зөвшөөрөл, дүгнэлтийг авдаг. Үүнийгээ ч үндэслэж зах зээлд нийлүүлдэг.

Харин “Тэнгэр”-ийнхэн уг ялаатай бараагаа шалгаж худалдаалаагүй бололтой. Үнэхээр шалгасан бол өнөөдөр ийм байдалд хүрэхгүй. Ер нь бүтээгдэхүүнээ шалгаж, эрүүл ахуйн шаадлага хангаж байгаа эсэхийг шинжилсний дараа иргэдийн гарт хүргэх, хэрэглэх боломжийг хангадаг болох нь юу, юунаас ч илүү чухал гэдгийг энд дурдах нь зүйтэй болов уу. Мэдээж энэ бүхэн тухайн компанийн хийх ажил.

Гэхдээ ялаатай сармис шиг  иргэдийн гар дээр дахин эрүүл ахуйн шаардлага хангахгүй тэр ч бүү хэл амь насанд хохирол учруулах хэмжээний бүтээгдэхүүн хүрэхгүй гэх баталгаа үнэхээр байхгүй байна гэдгийг Мэргэжлийн Хяналтын Ерөнхий газарт уламжилъя.

Хүнсний бүтээгдэхүүнд олноороо хордож, амь насаа алдсан гашуун түүх манай улсад нэг биш удаа тохиолдож байсан. Харин “Тэнгэр трейд” ХХК мэтийн хариуцлагагүй байгууллагын толгойг илж сууснаас хүний амь нас эрсдвэл хариуцлагыг нь хэн үүрэх вэ.

Энд дахин өгүүлэхэд үнэхээр “Тэнгэр трейд”-ийнхэн импортын бүтээгдэхүүнээ 100 хувь хянаж, шалгадаг байсан бол ялаатай сармис хэрэглэгчийн гарт хүрэхгүй байсан гэдгийг уламжлахыг хүсэв. Ямартай ч бид дахин энэхүү асуудлаар мэдээлэл хүргэх болно.      

24tsag.mn Б.Батчимэг