Монголын волейболын холбооноос Азийн зүүн бүсийн эрэгтэйчүүдийн аварга шалгаруулах тэмцээнийг Улаанбаатар хотноо зохион байгуулах гэж байна. Азийн волейболын  холбооны ивээл дор болж буй тус тэмцээнд оролцох баг тамирчид Улаанбаатар хотод хүрэлцэн ирээд байна. Тэмцээн энэ сарын 10-15-ны хооронд Буянт-Ухаа спортын ордонд болох бөгөөд найман улсын баг оролцоно. Тодруулбал “А” хэсэгт Монгол, БНХАУ, БНСУ, ХонгКонг, “В” хэсэгт Япон, Макао, Тайвань, БНАСАУ-ын багууд багтсан.

 Тэмцээнд өрсөлдөх багуудаас Монгол, Макао, Хонконгийн багууд өнөөдрийн байдлаар Баянгол зочид буудалд байрлахын зэрэгцээ бэлтгэлдээ гарчээ. Азийн волейболын холбооноос зочид төлөөлөгчид бүгд Монгол улсад хүрэлцэн ирсэн байна. Тэд тэмцээнийг зохион байгуулах Монголын талынхантай хамтарсан хурал хийж, тэмцээний бэлтгэл ажилтай танилцжээ. Мөн тэмцээн болох заал, танхим, хурлын өрөө зэрэгтэй танилцаж тэмцээнийг зохион байгуулахад бэлэн гэж дүгнэсэн байна. Азийн зүүн бүсийн волейболын эрэгтэйчүүдийн АШТ-ий тоглолтуудыг Олон улсын 7 шүүгч мөн бусад туслах шүүгч шүүн явуулна. Өнөөдөр Азийн волейболын холбооны шүүгдчийн зөвлөлөөс томилогдон ирсэн төлөөлөл шүүгчдийн дунд сургалтыг Буянт-Ухаа спортын ордонд 13.30-аас зохион байгууллаа. Тэмцээний техникийн зөвлөгөөн яг одоо Баянгол зочид буудлын хурлын танхимд болно. Энэ сарын 15-ны өдөр буюу тэмцээний хаалтын ажиллагааны өдөр өглөө 09.00 цагаас Зүүн Азийн волейболын холбооны бүсийн ээлжит их хурлыг зохион байгуулах ажээ.

Тэмцээн маргааш 12.00 цагт Япон-БНАСАУ-ын багийн тоглолтоорх хөшгөө нээнэ. Эл өдөр 16.00 цагт тэмцээний нээлт болох бөгөөд үүний дараа Монголын шигшээ баг Хонконгийн багтай эхний тоглолтоо хийх юм. Энэ тоглолт 05-р сарын 10-ны өдөр Буянт-Ухаа спортын ордонд 17.00 цагт болно. Та бүхэн Монголынхоо шигшээ багаа дэмжээрэй.

Тэмцээнийг нийгмийн хариуцлагыг дэмжигч "Витафит" групп дэмжин ажиллаж байна.

24tsag.mn