Монголын волейболын холбооноос зохион байгуулж байгаа Азийн зүүн бүсийн эрэгтэйчүүдийн АШТ хоёр дахь өдрөө Буянт Ухаа спортын ордонд үргэлжилж байна. Энэ удаагийн тэмцээнд өрсөлдөж байгаа Монголын шигшээ баг Хонконгийн багийг 3:0 онооны харьцаагаар хожсоноор эхний хожлоо аваад байна.
Азийн волейболын холбооны ивээл дор Монгол улсад болж байгаа тивийн зүүн бүсийн эрэгтэйчүүдийн аварга шалгаруулах тэмцээн өчигдөр Улаанбаатар хотод Буянт-Ухаа спортын ордонд эхэллээ. Азийн зүүн бүсэд найман үндэсний холбоод харьяалагддаг. Энэ жилийн тэмцээнд анх удаагаа бүрэн бүрэлдэхүүнээрээ оролцож байна. Учир нь сүүлийн жилүүдэд энэ тэмцээнд оролцоогүй байсан БНАСАУ-ын баг МВХ-ны урилгыг хүлээн авч энэ тэмцээнд өрсөлдөж байгаа юм. “А” хэсэгт Монгол, БНХАУ, БНСУ, Хонг Конг, “В” хэсэгт Япон, Макао, Тайвань, БНАСАУ-ын багууд багтсан юм. МОнголын волейболын шигшээ баг өчигдөр эхний тоглолтоо Хонконгийн багтай хийж 28:26, 25:21, 25:15 буюу 3:0 гэсэн онооны харьцаагаар өрсөлдөгчөө хожиж эхний ялалтаа авлаа. Өнөөдөр Монголын шигшээ баг БНХАУ-ын багтай тоглоно. Энэхүү тоглолтод манай баг хожиж чадвал хагас шигшээд өрсөлдөх боломж нээгдэх юм. Өчигдөр болсон тоглолтод манай улсын баг тамирчид хамгаалалт сайтай, хамгаалалтаас довтолгоонд шилжсэн нягт тоглолтыг үзүүлж байлаа. Энэ тоглолтонд багийн гишүүд жигд сайн тоглолтыг үзүүлж байлаа. Тэр дундаа Үндэсний шигшээ багийн гишүүн Эрдэнэбатын Сайханбаатар, Үндэсний шигшээ багийн гишүүн Эрдэнэбилэгийн Сайнбилэг нарыг онцлон дурьдах нь зүйтэй. Эдгээр тоглогчид багтаа голлох үүргийг гүйцэтгэж байлаа. Багтаа авчирсан онооны 60-70 орчим хувийг Сайханбаатар авч байсан юм. Манай улсын тамирчдын хувьд нурууны өндрөөр бас тоглолтын ур чадвараар маш сайн гэдгээ харуулж байлаа. Багийн ахлах дасгалжуулагчаар Япон улсын иргэн Койчи Шуто , туслах дасгалжуулагчаар Цэрэнпидийн Одхүү нар ажиллаж байна. Эрдэнэбатын Сайханбаатар Сима клубын багийн тамирчин, анхны багш Уранчимэг, волейболын спортоор 15 жил хичээллэж байгаа, биеийн өндөр 195 см, биеийн жин 85 кг. "Витафит групп" Номун Табак ХХК-д ажилладаг. Үндэсний шигшээ багийн гишүүн, Эрчим клубын багийн тамирчин, анхны багш н.Очирбат, волейболын спортоор 14 жил хичээллэж байгаа, биеийн өндөр 185 см, биеийн жин 80 кг. ДЦС-4 ТӨХК-д ажилладаг.
