Улсын төсөв 250 гаруй тэрбум төгрөгөөр тасарсан  учраас цалин тэтгэврээ тавьж чадахгүй хэмжээнд хүрээд байна хэмээн зарим гишүүд ярьж буй. Уг мэдээлэл хэр бодитой болохыг Сангийн сайд Ж.Эрдэнэбатаас тодрууллаа. 

- Улсын төсөв тасарч цалин тэтгэвэрээ тавьж чадахааргүй хэмжээнд хүрсэн гэдэг үнэн үү?

-Цалин тэтгэвэрээ тавьж чадахгүй хэмжээнд хүрэхгүй. Орлогын тасалдалтай холбоотойгоор цалин, тэтгэвэрээ нэмж чадахгүй байгаа гэсэн мэдээлэл гарсан. Энэ нь төлөвлөгөөний 87 орчим хувьтай явж байна гэсэн үг. Орлого ийм хэмжээнд байхад цалин тэтгэвэрээ тавьж чадахгүй болно гэсэн ойлголт байхгүй.

- Сард цалин, тэтгэвэрт хэдэн төгрөг зарцуулдаг вэ?

-Нэг сард 250-260 орчим тэрбум төгрөг зарцуулдаг.

-2016-2018 оны төсвийн төсөөллийг хэр бодотой төсөөлж чадсан бэ?

- Манай гадаад зээл 4-5 их наяд төгрөг болчихлоо гэж ярьж байна. Гэтэл бид өнөөдөр гадаад зээлээсээ илүү дотоод зээлдээ анхаарлаа хандуулах шаардлагатай. Дотоод бондын өр 3.1 их наяд төгрөг болсон байна. Энэ нь эдийн засагт эргэлдэж байгаа мөнгөний 33 хувь. Тэгэхээр Засгийн газар нь эдийн засагтаа мөнгө эргэлдүүлэхгүй, бүгдийг нь татаж авч үнэт цаас болгож банканд хадгалуулчихаад эдийн засгаа сэргээнэ гэж ярихад туйлын хүнд. Тиймээс ирэх оны төсөөллөөр Засгийн газар дотоод бондоор төсвийн алдагдлыг санхүүжүүлэхгүй байх чиглэл барина. Ингэснээр нэлээн бүсээ чангалах нөхцөл байдал үүснэ. Жил бүр гадаадын нэг их наядын дотоод бондын санхүүжилт аваад явбал хэдэн жилийн дараа төсвийн орлого, зарлагатай тэнцэх хэмжээний дотоод өртэй болно.

Т.Энхэлээ