Монгол Улаас Кувейтэд суугаа ЭСЯ чөлөөтийнхний тэмцээндээ орж чадаагүй талаар мэдээлэл хийлээ. Албаныхан энэхүү мэдээлэлдээ онгоцны буудал дээр саатуулагдсан тамирчдын асуудлыг мэдсэн даруйд шийдвэрлэх гэж Кувейтын гаалийн албаныхантай холбогдсон ч ямар нэгэн үр дүнд хүрээгүй тухайгаа мэдээлжээ.

Тодруулбал “Манай ЭСЯ энэ тухай мэдээлэл авмагцаа АНЭУ-ын ГХЯ-ны хариуцсан ажилтан, Эмиратын цагаачдын алба, Дубай-н олон улсын онгоцны буудлын цагаачдын албаны хүмүүстэй холбогдож ямар учраас манай тамирчдыг саатуулсан талаар тодруулсан.

Эдгээр тамирчид визийн болон бичиг баримтын зөрчилтэй, Катарт нэвтрэх боломжгүй учраас Дубайд саатуулагдсан ба Дубайн цагаачдын албанаас манай тамирчдын ирсэн Air China-гийн дараагийн нислэгээр буцаах болсныг мэдэгдсэн. Дараагийнх нь нислэгээр буюу тавдугаар сарын 6-ны 00:10 цагт Дубайгаас нисэхээр байсан ба манай тамирчид визийн болон бичиг баримтын зөрчилтэй учраас АНЭУ-аас нистэл нь саатуулсан байсныг Emirates airlines-д ажилладаг Намуун болон түүний хамт ажилладаг найзын туслалцаатайгаар хүлээлгийн танхимд оруулсан. Бид шөнөжин утсаар хоорондоо харилцаж юу болж байгаа талаар бие биендээ мэдээлэл өгч байсан.

Тодруулж хэлэхэд тавдугаар сарын 4-ний өдрөөс эхлэн бид олон газар луу утсаар ярьж аль болох тамирчдыг АНЭУ-аас Катар луу нисгэхээр хөөцөлдсөн боловч бичиг баримт визний зөрчилтэй байсан учраас Катарын тал хүлээж авах боломжгүй гэсэн. Мөн Катарт тэмцээнд оролцохоор ирсэн тамирчид болон дасгалжуулагч нар нэг удаагийн орж гарах визтэй байсан учраас бид хоорондоо байнга утсаар холбогдож мэдээллээ солилцож байсан.” хэмээжээ.

Ямартаа ч Ази тивийн аварга шалгаруулах тэмцээнд оролцох ёстой байсан манай шигшээ багийн гурван тамирчин болон нэг дасгалжуулагчийн визний зөрчлийн асуудал, гаалийнханы тамирчидтай гэмт хэрэгтэн мэтээр харьцсан, Д.Дагвадорж аваргын жиргээ үнэн байсан эсэх гэх мэт олон асуудлын үнэн мөн үүгээр тайлагдахгүй бололтой.

Эдгээрээс үзвэл хүн бүр өөрийн “арьсыг хамгаалах” оролдлого хийж байгаа нь ямарваа нэгэн асуудалд хариуцлага хүлээх эзэн байхгүй болсны тод жишээ болж байна.

Тамирчид визний зөрчилтэй байсан, тэмцээндээ оролцож чадаагүй нь үнэн болохоор хариуцлага хүлээх эзэн байх л учиртай санагдана. Энэ талаар Чөлөөт бөхийн холбоо одоог хүртэл албан ёсоор мэдээлэл хийгээгүй. Харин чөлөөтийн тамирчид өөрсдийн эрх ашиг, холбооныхоо цаашдын ирээдүйг баталгаажуулах, удирдлагуудаа өөрчлөхөөр түр хороо хүртэл байгуулсан нь олны анхаарлыг татаад байна. Бид энэ талаар эргэн мэдээллэх болно.