2015 оны эхний 4 сарын байдлаар нийтийн тээврийн үйлчилгээ эрхэлдэг аж ахуй нэгж байгууллагаас Хөдөлгөөний аюулгүй байдал ашиглалтын журмын эсрэг гэмт хэрэг, зам тээврийн осол 161 бүртгэгдснээс зорчигч унагасан 16, явган зорчигч мөргөсөн 29, шон мөргөсөн 2,  мөргөлдсөн 103 байна.

Үйлдэгдсэн зам тээврийн ослын улмаас 115 хүн хүнд хөнгөн гэмтсний 63 зорчигч, 44 явган зорчигч, 8 нь жолооч байгаа нь  нийтийн тээврийн үйлчилгээ эрхэлдэг аж ахуй нэгж байгууллагын үйл ажиллагаа доголдолтой, хяналт шалгалт хангалтгүй, жолоочийн урд чадвар дутмаг, замын хөдөлгөөний хууль дүрмийг хэрэгжүүлэх,  замын хөдөлгөөнд оролцох сахилга, дэг журам байхгүй, согтуугаар тээврийн хэрэгсэл жолоодох, зорчигчыг гүйцэд бууж суусны дараа хөдөлгөөнөө үргэлжлүүлдэггүй, дуртай газраа зогсож зорчигч суулгах,  буулгадаг ямарч  дүрэмгүй мэт замын хөдөлгөөнд оролцдогоос болж зам тээврийн осолд удаа дараа холбогдож хүний амь нас эрүүл мэндийг хохироосоор байна.

Тухайлбал: 2015 оны 05 дугаар сарын 11-ний өдөр БЗД-ийн нутаг ХХААЯ-ны урд замд Эрдэм транс ХХК-ний Х.Аеро Сити-540 маркийн автобусны жолооч Н нь явган зорчигч 61 настай эмэгтэй С-ийг, мөн  СХД-ийн нутаг Баянхошууны зам, Жанцангийн уулзварт Эрдэм транс ХХК-ний Х.Аеро Сити-540 маркийн автобусны жолооч П нь явган зорчигч 58 настай эмэгтэй А-г  мөргөж гэмтээсэн,  СБД-ийн нутаг Их тойруу Ардын эрхийн автобусны буудлын зогсоолд Автобус-1 ХХК-ны Daewoo  маркийн автобусны жолооч М нь зорчигч 61 настай эмэгтэй Б-г унагаж гэмтээсэн.

 Монгол улсын Гэмт хэргээс урьдчилан сэргийлэх тухай хууль, Замын хөдөлгөөний аюулгүй байдлын тухай хууль, дүрэм, нийтийн тээврийн стандартыг мөрдүүлэх, иргэдийг аюулгүй ая тухтай зорчуулах, гарч болзошгүй зам тээврийн олсоос урьдчилан сэргийлэх, Замын хөдөлгөөний хууль дүрмийг хэрэгжүүлэх, жолооч нарын сахилга дэг журмыг сайжруулах  тал дээр  нийслэлийн Тээврийн газар анхаарах цаг нь болжээ. Нийтийн тээврийнхэнд дэг журам хэрэгтэй байна.

Д.Ундрах /24tsag.mn/