Монголын чөлөөт бөхийн холбооны удирдлагууд мэдээлэл хийлээ. Тус холбооны ерөнхий нарийн бичгийн дарга О.Баянмөнх “Саяхан Катарын Доха хотноо болж өнгөрсөн Азийн аварга шалгаруулах тэмцээнд оролцож чадаагүй манай гурван тамирчин Дубайн онгоцны буудалд саатуулагдсан талаар тодруулга хийе. Нэгд тус тэмцээнийг зохион байгуулагч Катарын бөхийн холбооноос тэмцээнд оролцох гадаадын тамирчдыг хилээр визгүй, төлбөргүй оруулах тухай албан бичиг ирсэн.

Хоёрт, тэмцээнд оролцох журмын дагуу Монголын баг тамирчдын тоо болон нэрний мэдүүлгийг явуулсан үндсэн дээр Катарын хилээр орох зөвшөөрлийн хуудас ирсэн. Энийг гадуур виз гэж яриад байгаа. Виз биш шүү. Үүнийг дахин онцлон хэлье. Ямар нэгэн виз авна гэсэн зүйл байгаагүй. Зөвхөн мэдүүлэг өгсөн. Мэдүүлгийн дагуу хуудас ирсэн. Энэ дагуу цаашаа орох хэрэгтэй. Тамирчин бүр дээр ирсэн энэ хуудсыг гадаад паспортын хамт хил дээр шалгуулаад цаашаа орно. Мэдүүлгийн хуудсан дээр бид эрэгтэй баг дээр 23, эмэгтэй баг дээр 14 хүний нэртэй мэдүүлэг өгсөн. Мэдүүлэг явуулахад процедурын алдаанууд гарсан.

Тухайлбал Оффисын аппаратын зүгээс бичиг бүрдүүлэлтийн тал дээр хянаагүй, нятглаагүйгээс алдаа гарсан. Хариуцлага тооцох хэмжээнд асуудал ярина. Хариуцлагаа хүлээнэ. Хил дээр ямар нэгэн виз олгоогүй шүү. Овог, нэр, төрсөн он сар энэ тэр гээд юм юу ч байхгүй шүү. Дээрх асуудалтай холбогдуулж  МЧБХ-ны Удирдах зөвлөлийн хурлыг ойрын хугацаанд хуралдуулна.

Холбооны зүгээс ямар ч арга хэмжээ аваагүй гэж яриад байгаа. Тийм асуудал байхгүй. Харин яаралтай шуурхай арга хэмжээ авахад гүн туслалцаа үзүүлсэн Кувейт дэх ЭСЯ-ны Алимаа, Эмират айрланс компанийн Номуулан, Содзул, Бээжин дэх Элчин сайд Ц.Сүхбаатар, ГХЯ-ны Консулын газрын дарга Н.Батаа, холбооны Удирдах зөвлөлийн гишүүддээ баярласан талархаснаа илэрхийлье” гэлээ. Харин Хурлын үеэр холбооны ерөнхийлөгч Д.Дагвадорж “Түр хорооноос тавьсан 16 асуулга бүхий шаардлагатай тодорхой танилцаагүй, өчигдөр харсан. Намайг бялдууч, хоёр нүүртэй, засрашгүй этгээд гэж доромжилсон байна. Энэ бол шаардлага биш шүү, багш нараа. Энэ хүний нэр хүнд, холбооны үйл ажиллагааг гутаасан доромж шүү. Визний асуудал дээр холбоо хариуцлагаа тооцно. Би хэр баргийн юмыг хэлүүлээд явдаг. Нэг тогоонд явсан хүмүүс намайг гутаан доромжилж байгаад сэтгэл эмзэг байгаа. Энэ асуудлаар хуулийн байгууллагуур явах уу, яах уу гэдгээ зөвлөнө” гэв.

Харин МЧБХ-ны удирдлагууд Түр хорооныхны тавьж буй шаардлагыг хүлээн зөвшөөрөхгүй байгаа гэдгээ илэрхийлж, холбоо маш сайн ажиллаж байгаа, холбооны ерөнхийлөгч Д.Дагвадорж алдаа дутагдал гаргаагүй, санхүүгийн тайлан зөрчилгүй гэсэн тайлбар өгсөн юм.