Монгол Улсын Шадар сайд У.Хүрэлсүх Оюуны өмчийн газар, Шударга өрсөлдөөн, хэрэглэгчийн төлөө газар, Стандарчлал хэмжилзүйн газар, Худалдан авах ажиллагааны газар, Онцгой байдлын ерөнхий газрын удирдлагуудтай сар бүр уулзалт зохион байгуулдаг.

Өнөөдөр тэрбээр дээрх зургаан агентлагийн  үйл ажиллагааны тайланг сонсож, хууль эрхзүйн хүрээнд шинэчлэл хийх шаардлагатайг сануулаад, тодорхой яригдаж байгаа хуулийн төслүүдэд анхаарал хандуулж ажиллахыг хүсчээ.

Агентлагийн дарга нар тайлангийн хугацаанд хийсэн ажлаа танилцуулсны дараа Шадар сайд У.Хүрэлсүх “Та бүхний ажлын уялдаа их сайн байх ёстой. Нэг нэгнийхээ ажлын талаар мэдээлэл сайтай байж төрийн ажил явна. Иргэдээс ирсэн өргөдөл гомдолд заавал хариу өгөх ёстой. Эрхзүйн орчноо шинэчлэх чиглэлээр анхаарах шаардлагатай байна. Хууль гэдэг амьд зүйл учраас амьдралд нийцүүлэх учиртай.

Шинэчилж сайжруулах талаар анхаарал тавьж ажилламаар байна. Засгийн газрын үйл ажиллагааны мөрийн хөтөлбөр, хямралаас гарах төлөвлөгөөг бодож хэмнэлтийн горимд шилжиж ажиллах хэрэгтэй.

Газар хөдлөлт сэтгэл зовоож байна. 2015 он гарсаар 390 удаагийн газар хөдлөлт болсон байна.  Эмээлтийн хагарал, Хустайн хагарал Авдар уул, Шархайн Мөнгөнморьтын хагарал гээд зургаан газар байдаг юм байна. Эдгээр газруудад 6.5-7.5 баллын хүчтэй газар хөдлөлт болох төлөвтэй гэж мэргэжлийн байгууллагууд мэдээлсэн. Мэргэжлийн хяналтын газраас орон сууц, сургууль, цэцэрлэгүүдийн газар хөдлөлтөд тэсвэртэй эсэхэд шалгалт хийхэд сургууль цэцэрлэгийн 21-25 хувь нь тэсвэргүй, орон сууцны 86.7 хувь нь тэсвэргүй гэсэн нь санаа зовоож байна” гэжээ.