Монголын Хохирол Үнэлэгчдийн холбоо, БНСУ-ын Хохирол Үнэлэгчдийн Холбоод хамтран “Ослын улмаас гарсан хохирлын үнэлгээ” сэдэвт сургалтыг зохион байгуулж байна.

Сургалтаар ослын улмаас хүний эрүүл мэнд, амь нас болоод эд хөрөнгөнд учирсан хохирлыг бодитоор тодорхойлоход ач холбогдол өгөн ажиллах зарчмыг хэлэлцэж байгаа юм. Мөн үнэлгээ хийх арга аргачлал, үнэлгээ гаргахад тулгамдаж буй эрх зүйн орчин зэргийг хэрхэн сайжруулах талаар олон улсын жишигт нийцүүлэн боломжит гарцыг хайж байгаагаараа онцлог аж.

Энэхүү сургалт нь бодит болж ослоос үүссэн хохирлыг мөнгөн дүнгээр шийдвэрлэж чадсанаар Монголын нийгэмд хэд хэдэн дэвшлийг бий болгоно гэж үзэж байна. 

Тухайлбал хохирлын үнэлгээ хэрэгжиж эхэлснээр тухайн хохирол үүсгэсэн гэмт хэргийн шинж чанарыг тодорхойлох, шударга үнэнийг тогтоох, хэрэг бүртгэлт, мөрдөн байцаалт, шүүн таслах ажиллагаанд үзүүлэх суурь хүчин зүйлсийн нэг болно. Ер нь нийгмийн бүх хүрээнд хариуцлагыг дээшлүүлж, хүний төлөө тавих анхаарал халамж дээшилж, ялангуяа хөдөлмөр хамгааллыг сайжруулахад чухал ач холбогдол өгнө гэж үзэж байгаа юм байна.

Сургалтанд Монголын хохирол үнэлэгчдийн холбооны тусгай зөвшөөрөлтэй 20 гаруй компани, даатгагчдын холбоо, БНСУ-ын хохирлын үнэлгээний чиглэлээр мэргэшсэн есөн хүний бүрэлдэхүүнтэй эрдэмтэн докторууд, Албан журмын даатгалын холбоо, Монголын Үйлдвэрчний эвлэл, Эрүүл мэндийн яам, Монголын хүний эрхийн үндэсний комисс, Шүүхийн шинжилгээний үндэсний хүрээлэн, Тээврийн прокурорын газар, Санхүүгийн зохицуулах хороо болон холбогдох бусад байгууллагууд хамрагдаж байгаа аж.