Машин ачилтын төлбөрийн асуудал ШӨХТГ болон Нийслэлийн удирдлагуудыг хооронд нь муудалцуулаад байгаа.

 ШӨХТГ-ын дарга Т.Аюурсайханы хэлж буйгаар Э.Бат-Үүл тэргүүтэй Нийслэлийн удирдлагууд нь дугуй түгжих болон ачих журамлах журмыг хууль зөрчиж баталсан. Тиймээс машинаа 70-80 төгрөгөөр ачуулсан иргэд шүүхэд хандан зөрүү мөнгөө олж авах боломжтой гэж буй.

Харин Нийслэлийн удирдлагууд хууль зөрчиж журам батлаагүй. Шүүхийн шийдвэр гарсны дараа хууль зөрчсөн эсэх нь тодорхой болно гэж байгаа юм.

Тэр ч бүү хэл Нийслэлийн Засаг дарга Э.Бат-Үүл “Т.Аюурсайхан гэж МАН-ын нөхөр ШӨХТГ-т оччихсон улс төржүүлээд. Ингэх шаардлага байхгүй” гэж мэдэгдэж байсан билээ.

Гэдэн нь хөдөлсөн Нийслэлийн удирдлагууд уг асуудлаар улам зөрүүдэлж Автомашин ачилтын төлбөрийг нэмэх шийдвэрийг гаргаж магадгүй болжээ.

Тодруулбал, НИТХ-ын Тэргүүлэгчдийн өчигдрийн хуралдаанаар “Автозамын нэгдүгээр эгнээнд хууль зөрчин байрлуулсан автомашиныг ачиж журамлах журам”-д өөрчлөлт оруулах асуудлыг хэлэлцэж, төслийг батлахаа түр хойшлууллаа. Журмыг шинэчилсэн батлах ажлын хэсгийнхэн торгуулийн мөнгийг нэмэхээр төлөвлөжээ. Одоогийн байдлаар автомашинаа ачуулсан жолооч нарыг 55 мянган төгрөгөөр торгож байгаа. Харин шинэчилсэн журмыг баталбал жижиг оврын автомашиныг 60, жийпийг 70, том оврын автомашиныг 110 мянган төгрөгөөр торгох юм байна. Замын хөдөлгөөний удирдлагын төвийн дарга Л.Батцоожийн мэдээлснээр дээрх торгуульд ажилтнуудын цалин, чирэх машины элэгдэл хорогдол, 25-30 км, чирэх машины шатахууны болон зогсоолын төлбөр зэрэг багтаж байгаа аж. Гэхдээ дээрх журамд өөрчлөлт орсноор дараах газруудад автомашинаа байрлуулсан тохиолдолд л ачиж, журамлах гэнэ. Энэ нь гүүрэн дээр, доор автобусны буудлын ойролцоо, төмөр замын гарман дээр, явган хүний гарц уулзвар гарцын ойролцоо байрлуулсан тохиолдлууд юм байна. Эдгээрээс өөр байршилд автомашинаа зогсоосон тохиолдолд ачихгүй аж.

Т.Энхэлээ