Завхан аймгийн Прокурорын газраас аймгийн цагдаагийн газрын Захиргааны зөрчлийн хэрэг бүртгэх эрх бүхий албан тушаалтнуудаас явуулж буй захиргааны зөрчлийн хэрэг бүртгэлтийн ажиллагааны хууль зүйн үндэслэлийг 2015 оны эхний улирлын байдлаар шалгасан байна.
Шалгалтаар зөрчлийн тэмдэглэлийг хуулинд заасан шаардлагын хэмжээнд хөтөлдөггүй, зөрчлийн тэмдэглэл үйлдэхдээ захиргааны зөрчил гаргагчид хуулинд заасан эрхийг танилцуулдаггүй, зөрчлийг хянан шалгах тухай тэмдэглэлд удирдлага болгох хуулийн заалтыг буруу баримталдаг, эрх бүхий албан тушаалтнууд хариуцлага ногдуулахдаа “Захиргааны шийтгэл ногдуулах тухай шийдвэр”, “Захиргааны шийтгэл ногдуулах тухай тэмдэглэл”, “Захиргааны арга хэмжээ авахуулах тухай тэмдэглэл” гэж өөр өөр эрх зүйн акт үйлдэн, зөрчил гаргагчаас тайлбар авахдаа хууль сануулдаггүй, зарим хэсгийн байцаагч нар Эрүүгийн хуулийн 252 дугаар зүйл заалтыг, Хөдөлгөөний аюулгүй байдлыг хангах тасгийн зохицуулагч нар Захиргааны хариуцлагын тухай хуулийн 12 дугаар зүйлийн 2-т заасныг баримтлан мөн хуулийн 9 дүгээр зүйл заалтыг сануулж тайлбар авах зэргээр хуулийн зүйл заалтыг нэг мөр хэрэгжүүлдэггүй, захиргааны зөрчлийн талаарх гомдол мэдээллийг хүлээн авсан тухай тэмдэглэл үйлдэхгүй шууд зөрчлийг шалгадаг, зөрчлийн талаарх гомдол мэдээлэл гаргагчид худал мэдээлбэл хүлээлгэх хариуцлагын талаар тайлбарлаж хууль сануулан гарын үсэг зуруулдаггүй, зөрчил гаргасан этгээдэд шийтгэл ногдуулсан шийтгэврийг давж заалдах эрх, журмыг тайлбарлан танилцуулдаггүй, Захиргааны хариуцлагын тухай хууль болон Улсын Ерөнхий Прокурортой зөвшилцсөн Цагдаагийн Ерөнхий Газрын даргын 2015 оны 01 дүгээр сарын 10-ны өдрийн 15 дугаартай тушаалаар баталсан “Захиргааны зөрчлийг хянан шийдвэрлэх /408 код/ журам”-ын холбогдох заалтуудыг тус тус зөрчиж нэг мөр хэрэгжүүлэн ажилдаггүй зэрэг нийтлэг зөрчил илэрчээ.
Шалгалтын дүнг хамтарсан зөвлөгөөнөөр хэлэлцүүлж, илэрсэн зөрчлийг арилгуулахаар аймгийн Цагдаагийн газарт прокурорын шаардлага хүргүүлсэн байна.
Д.Ундрах /24tsag.mn/
