Монгол хүний оюуны бүтээмж дэлхийн зах зээл дээр гарах хамгийн ойрын гарц бол соёлын бүтээлч үйлдвэрлэл гэж Боловсрол, соёл, шинжлэх ухааны яам үзэж байна. Иймээс өнөөдөр Соёлын бүтээлч үйлдвэрлэлийн Олон улсын чуулганыг эх орондоо зохиож байгаа юм. Уг чуулганд боловсрол, соёлын салбарын төлөөллүүдээс гадна бизнесийн байгууллагынхан, үйлдвэрлэл эрхлэгчид, иргэний нийгмийн төлөөллийнхөн оролцож байна.

Мөн Их Британи, АНУ, Франц, БНСУ, БНХАУ, Дани, Малайзын судлаач, шинжээч нийлсэн 200 гаруй төлөөлөгч оролцож санал, бодлоо солилцох юм. Чуулганы үеэр дизайн, киноны салбарын бүтээлч үйлдвэрлэлийг хөндсөн салбар хуралдаан болно. Эдгээр салбаруудыг төлөөлж загвар зохион бүтээгч Ариунаа Сури болон “Babies” киногоороо монголчуудад танигдсан найруулагч Томас Балмес, Загварын бизнесийн Солонгосын нийгэмлэгийн ерөнхийлөгч Пэ Сү Жон, Шанхайн Театрын академийн профессор, Хятадын нэрт кино найруулагч Шервуд Хунар оролцож байна. Харин тус салбарын тэргүүлэх мэргэжилтэн ТомФлеминг “Дэлхий дахины бүтээлч болон соёлын эдийн засгийн чиг хандлага, Монгол Улсын өмнө нээгдэж буй боломж гарц” сэдвээр сонирхолтой илтгэл тавив. Салбар яамнаас нь Соёлын бүтээлч үйлдвэрлэл үндэсний хөтөлбөрийн төслийг боловсруулсан ажээ. Харин энэхүү чуулганаар төслийн анхны хэлэлцүүлгийг хийж, дэлхийн түвшинд өөр өөрсдийн соёл бүтээлээ амжилггай нийл үүлж яваа уран бүтээлчдийн саналыг тусгахаар болжээ. Чуулган өнөөдөр үргэлжилнэ.