16 дугаар байрны дуулиан тасрах болоогүй л байна.

Сар гаруйн хугацаанд гэртээ орж чадахгүй байсан иргэд зочид буудлаар хоног төөрүүлж өнгөрсөн долоо хоногт гэртээ харьсан.

Гэтэл өдрийн гурван хоолтой байрласан тус байрныханы буудалсан зочид буудлуудын хөлсийг одоо болтол бүрэн барагдуулаагүй байна.

Уг нь 16 дугаар байрны оршин суугчдын буудлын хөлс болоод холбогдох бүхий л зардлыг нийслэлийн нөөц хөрөнгөнөөс гаргах шийдвэр гарсан. Харин хичнээн төгрөгийн зардал гарсан талаарх мэдээлэл одоогоор байхгүй байгаа юм.

Гэхдээ 16 дугаар байрны 200 орчим хүн буудлуудаар байрласан. Тэдгээрийг нэг өрөөнд 2-4 хүнтэй байлгахаар зохион байгуулж байсан билээ. Тэгэхээр хамгийн багадаа л гэхэд 60 орчим өрөөнд байруулна. Нэг өрөөг хоногийн 30 мянган төгрөг, үүн дээр хоногийн гурав хоолны мөнгө гэж тооцохоор нэлээд их хэмжээний зардал гарах нь дамжиггүй.

Энэ нь ч нийслэл зочид буудлуудад тооцоогоо бүрэн барагдуулахгүй "луу унжих" шалтгаан болсон байх. Харин 16 дугаар байрны оршин суугчдын аминд хүрэх шахсан тэр л үед нийслэлийн аминд орж иргэдийг зочид буудалдаа байрлуулсан буудлуудын хөлсийг хэзээ нэгэн цагт нийслэлийн хөрөнгөнөөс бүрэн барагдуулах нь дамжиггүй.

Харин татвар төлөгчдийн мөнгө хариуцлагагүй эрхэмүүдийн алдаанаас болж зочид буудлын хөлсөнд төлөгдөж байгаад харамсах хүмүүс ч байгаа гэдгийг энд өгүүлэх нь зүйтэй болов уу.

Тиймээс нийслэлийн "халааснаас" хумсалсан мөнгийг хариуцлагагүй, алдаа гаргасан этгээдүүд эргүүлэн хийж, тэрхүү мөнгө олон нийтийн эрх ашгийн төлөөх зүйл зарцуулахыг иргэд хүсч байгаа гэдгийг ч холбогдох албаныханд дуулгая.

Түүнчлэн 16 дугаар байрны асуудал гашуун түүх, сургамж болсон нь лавтай. Манай улсад гамшгийн үед ашиглах орон байр байдаг бол энэ мэт олон сая төгрөгийн зардал гарахгүй, газар, барилга байгууламжийн зөвшөөрөл хууль журмын дагуу явагддаг бол иргэд нурах шахаж, айдас дагуулсан байрандаа амьдарсаар байхгүй байсан юм.       

Ямартай ч 16 дугаар байрны дуулиан тасрах болоогүй л байгааг энэхүү мэдээлэл харуулав.