Улаанбурхан өвчинд 15-24 насны хүмүүс илүү өртөх магадлалтай байгаа учир Эрүүл мэнд, спортын яамнаас аймаг, нийслэлийн засаг дарга нарт зуслангийн үйл ажиллагааг түр хугацаагаар хойшлуулах албан тоот хүргүүлсэн талаар бид мэдээлж байсан.
Харин хэдий хугацаагаар хойшлуулсан талаар Хүүхэд гэр бүл хөгжлийн газрын хэлтсийн дарга О.Есөнтамираас тодрууллаа. Тэрбээр “ЭМСЯ-ынаас ирсэн чиглэлийн дагуу энэ сарын 20-ны өдрийг хүртэл нийслэлийн ногоон бүсийн зуслангийн үйл ажиллагааг түр хойшлуулахаар болсон.
Тиймээс энэ хугацаанд зуслангуудад хяналт шалгалтыг хийнэ. Харин зуслангийн үйл ажиллагааг хэзээнээс эхлүүлэх талаар мэдээлэл алга байна” гэсэн юм. Түүнчлэн Мэргэжлийн хяналтын ерөнхий газраас халдварт өвчин, хоолны хордлогоос урьдчилан сэргийлэхийн тулд эцэг эхчүүдэд зөвлөмж өгч, зуслангийн удирдлагуудад танхимын болон онлайн сургалт явуулахаар болсон" хэмээв.
Харин "Маргаашийн хөгжил" зуслангийн захирал Х.Батбуянаас зуслангуудын үйл ажиллагааг хэзээнээс эхлүүлэх талаар албан ёсны мэдээлэл өгсөн эсэх, зусланд амрах хүүхдүүдийн эрүүл аюулгүй байдалд хэрхэн анхаарч ажиллах талаар лавлахад "Улаанбурхан өвчин гараад зуслангийн хүүхэд хүлээн авах хугацааг хойшлуулсан ч албан ёсоор бичгээр мэдэгдээгүй байна. Манайх шинээр байгуулагдсан учраас эрүүл ахуйн тал дээр сайн анхаарч байгаа. Нийслэлийн эрүүл мэндийн газраас заавар зөвлөгөө ч өгдөг.
Тухайн зуслангаас шалтгаалаад, бас хүүхдээ эргэж ирж байгаа эцэг эхчүүд эргэлтээр янз бүрийн зүйл авч ирдгээс янз бүрийн асуудал гарах нь бий. Хүний хүүхэд авч байгаа гэдэг утгаар бид өндөр хариуцлагатай ажилладаг" гэсэн юм.
Дашрамд сонирхуулахад Монгол Улсад 56 хүүхдийн зуслан байдаг аж. Эдгээрийн нийслэлийн ногоон бүсэд 32 зуслан байдаг байна. Харин энэ жил нийслэлийн хэмжээнд 21 хүүхдийн зуслан үйл ажиллагаа явуулах хүсэлтээ холбогдох байгууллагуудад хүргүүлээд байгаа аж. Мөн зуслангийн нэгдүгээр ээлжид 1500 гаруй хүүхэд хамрагдахаар бүртгүүлээд байгаа юм байна.
24tsag.mn