УИХ-ын гишүүн Д.Тэрбишдагвын О.Чулуунбаттай авахуулсан зураг цахим ертөнцөд шуугиан тариад байсан.

О.Чулуунбатын хувьд бие нь тааруу, хүнд хагалгаанд орсон бөгөөд Японд эмчлүүлж байгаа юм. Д.Тэрбишдагва түүнийг өнгөрсөн амралтын өдрүүдэд эргэж очихдоо доорх зургийг авахуулсан байна. Гэтэл уг зургийг харсан хүмүүс О.Чулуунбат руу янз бүрээр дайрч, доромжилсон билээ. Тэгвэл энэ талаар УИХ-ын гишүүн Д.Тэрбишдагва байр сууриа илэрхийлжээ.

Тэрбээр "О.Чулуунбат маань нэг төрлийн хавдараар өвчлөөд Японд эмчлүүлж байна. Биеийнхээ гурав, дөрвөн газарт маш хүнд хагалгаа хийлгэсэн. Хагалгаа хийлгэхээсээ өмнө химийн хүчтэй эмчилгээ хийлгэсэн. Бие нь хүнд байгаа. Нэгэн зорилгын төлөө явж буй анд минь ийм болчихсон учраас хүн ёсны үүднээс очиж эргэсэн. Эдгэх магадлал өндөр байгаа. Нэг зүйлд сэтгэл үнэхээр гонсойж байна. Өвчтэй байгаа нэгэндээ монголчууд ямар муухай хандана вэ. Хамт авахуулсан зургаа тавьсан биш найзыгаа элдвээр доромжлуулж, хараалгаж зүхүүлсэндээ өөрийгөө буруутгаж сууна. Үнэхээр эмзэглэж байна. Би уг нь буруу санасандаа тэр зургийг тавиагүй. Монголын эдийн засагт маш их хувь нэмэр оруулсан хүн ийм маягтай байна гэдгийг л харуулах гэсэн юм. Монголын төрд зүтгэсэн хүн ийм байна гэдгийг журмын бусад нөхөд нь хараг гэсэн юм. Ядаж л түүнд ард түмэн урмын үг хайрлах болов уу гэж бодсон. Эрч хүч өгөх болов уу гэтэл эсрэгээрээ доромжиллоо. Монголын нийгэм ямар харгис хатуу болчихсон юм бэ хэмээн бодож сууна" гэжээ.

Тэрбээр Солонгост эмчлүүлж буй намын дарга Н.Энхбаяртайгаа мөн уулзаад ирсэн байна.

Т.Энхэлээ