Хилээр ховордсон ан амьтны арьс, эд эрхтэн, байгалийн чулуу хууль бусаар давуулах тохиолдол буурахгүй байна.

Энэ талаар Хил хамгаалах ерөнхий газраас мэдээллээ. Өнгөрсөн мягмар гаригт иргэн Д-нь Булганы боомтоор БНХАУ руу 19 ширхэг чонын арьс, 12 кг цагаан өнгийн чулууг автомашинд нууж хил давуулахыг оролджээ.

Мөн Замын-Үүдийн боомтоор 1134 ширхэг тарваганы арьс, 303 хэсэг бугын цусан эвэр зэргийг хууль бусаар хил нэвтрүүлэх гэж байсныг хилчид илрүүлсэн байна.

Үүгээр зогсохгүй байгалийн үнэт олдвор гадагшаа гаргахыг завдсан тохиолдол гарчээ.

Буянт-Ухаа боомтоор манай улсын иргэн Г-нь 80 см урттай арслан зааны соёо, шүр болон номин шигтгээтэй мөнгөн суурин дээр сувд хэлхсэн үсний даруулга, сам,  уйгуржин монголоор бийрийн уран бичлэгээр 27 хуудас муутуу цаасан дээр бичигдсэн “Богд далай ламын цадиг” судар зэргийг хилээр гаргахыг завдсан байна.