“Автобус-1”, “Автобус-2”, “Автобус-3” төрийн өмчит нийтийн тээврийн компанийн ажилчид ачаалал их, цалин бага гэх шалтгаанаар ажил хаялт зарласныг та бүхэн санаж байгаа биз ээ. Одоогоор ажил хаялт үргэлжилж байгаа гэх ч ихэнх нийтийн тээвэр үйлчилгээнд гарч, жолооч кондукторууд ажилдаа ороод байгаа юм.

Гэхдээ тэднийг асуудлыг нааштайгаар шийдэж өгөөгүй байгаа гэдгийг онцолмоор байна. Тухайлбал,  “Автобус-3” компани 400 гаруй ажилчинтай. Тэдний 90 гаруй хувь нь цалингийн зээлтэй.  Харамсалтай нь, тэдний авч буй сарын цалин нь банкныхаа зээлд ч хүрэхээ байсан учир арга буюу цалингаа нэмэхийг шаардаж, ийнхүү ажил хаяхад хүрсэн гэдгээ удаа дараа хэлж байгаа билээ. Ингээд тэдний заримынх нь байр суурийг хүргье.

 
-Нийтийн тээврийн ажилчид байсхийгээд л цалингаа нэмэхийг шаардаж, ажил хаялт зарладаг боллоо. Гэтэл та бүхнийг 800 мянган төгрөгөөс нэг сая хүртэлх цалин авдаг гэх юм. Энэ хэр бодитой мэдээлэл вэ?
 
-Үнэхээр ийм өндөр цалин авдаг байсан бол бид яасан гэж ажил хаях юм. Амьдралдаа нэг сая төгрөгийн цалин авч байгаагүй. Бид хөдөлмөрөө шударгаар үнэлүүлэхийг л хүсч байна. Өөрөөр хэлбэл, хийсэн ажлынхаа зохих хөлсийг нь авмаар байна. Өмнө нь, бид өдрийн орлогынхоо 8-10 хувийг авдаг байсан. Гэтэл өнөөдөр 3-4 хувийг л авдаг. Ийм байхад авч байгаа цалин яаж амьдралд хүрэх юм бэ.

 
-Үндсэн цалин хэдийг авдаг  вэ?
 
-Бидний үндсэн цалин 350 мянган төгрөг.

 
-Гэхдээ өнгөрсөн намар нийтийн тээврийнхэн бас л ажил хаялт зарласан. Тухайн үед та бүхний цалинг 25 хувь нэмсэн шүү дээ?
 
-Нэмнэ гэж хэлсэн ч нэмээгүй. Гэтэл хэвлэл мэдээллийн хэрэгслээр нэмсэн гэх юм. Ингэж биднийг хохироож болохгүй шүү дээ.

 
-Та бүхний ажил хаялт хэдий хугацаанд үргэлжлэх вэ?
 
-Хугацаагүй. Хэзээ бидний цалинг нэмнэ тэр болтол нь ажил хаялтаа үргэлжлүүлнэ.

 
-Тэгэхээр гурван талт хэлэлцээр батлагдтал ажил хаялт үргэлжилнэ гэсэн үг үү?
 
-Тийм ээ, гурван талт хэлэлцээрээр жолооч цагт таван мянга, кондуктор дөрвөн мянган төгрөгийн цалин авахаар заасан. Тэрийг л мөрдүүлэхийг шаардаж байна.

Ийн тэд амьдралынхаа төлөө ажил хаялт зарлахаас өөр аргагүй байдаг. Улмаар удирдлагуудынх нь зүгээс цалин хөлсийг нь нэмнэ гэж ам гарчихаад бодит байдал дээр хэрэгжүүлдэггүй аж.

24tsag.mn